Read KIMERU BIBLE PROTESTANT EDITION Kum 29 Bible Online

Kum 29 - KIMERU BIBLE PROTESTANT EDITION bible

Kum 29

¹“Atîrî, mantû jaja nîjo ûkaathithia rîrîa ûkîathûra na kûrîkîîra Aaroni na ataana baawe njara baa athînjîri-Mûrungu: Ûjûkie kareegwa na ntûrûme ijîîrî itî antû athûûku kinya amwe,

²na mûgaate jwa mûtu jwa nkano jûtiimbithîtue, na tûmîgaate twa gûkanda tûtiimbithîtue tûûngeenue na maguta, na tûmîgaate tûtûceke buru twaaki maguta. Mîgaate îîu yonthe ûkamîthithia na mûtu jûmwinyu buru.

³Nayo mîgaate îîu ûmîîke gîkabûûne kîmwe, na ûmîreete îrî gîkabûûne o ûu amwe na kareegwa na ntûrûme cio-ijîîrî.

⁴“Ningî rî, ûreete Aaroni na ataana baawe au mînjîîroone ya îema rîa gûtirimanîra ûbathaambie bwega na rûûjî.

⁵Ûjûkie nguû wîkîre Aaroni; na ûmwîkîre îgoti, na rwambambio rwa efodi na efodi yongwa, na nguû ya kîbara, na ûmwoge mûcibi jwa efodi jûrîa jûtumi bwega.

⁶Ningî ûmwoge kîremba, nayo thirû îrîa ntheru ûmîîkîre îgûrû rîa kîremba.

⁷Rîu ûjûkie maguta ûmwîtûûrîrie kîongo.

⁸“Ningî rî, ûjûkie ataana ba Aaroni ûbeekîre magoti,

⁹na ûbaoge mîcibi na ûbeekîre nkobia. Nabo bakaa athînjîri-Mûrungu kenya na kenya amwe na nchiarwa ciaao. Ûu nîu ûkaathûra na kûrîkîîra Aaroni na ataana baawe njara.

¹⁰“Rîu bûkareeta ndeegwa mwariine jwa îema rîa gûtirimanîra. Aaroni na ataana baawe barîkîîre njara ciaao mûtwe jwa ndeegwa.

¹¹Naagwe ûjûkie ndeegwa ûmîûragîre mbere ya MWATHANI, mwariine jwa îema rîa gûtirimanîra.

¹²Ûjûkie tharike îmwe ûmîake kooneene cio-inya cia kîritîro kîa igongwana na kaara. Nayo tharike îîu îngî yonthe ûmîtûûrîrie gîtinene gîa kîritîro kîa igongwana.

¹³Ûjûkie maguta jonthe jarîa jarî nyameene cia kîu amwe na îtema arîa eega buru, na mpigo cio-ijîîrî na maguta jaacio, wîîthîîrie into biu kîritîro kîa igongwana.

¹⁴Îndî nyama cia ndeegwa, na mûgûûta na nyama ciaayo cia kîu wîîthîrie oome ya kambî, nîûntû nî kîgongwana gîa kûthiria meeyia.

¹⁵“Ningî ûjûkie ntûrûme îmwe, nawe Aaroni na ataana baawe barîîkîîre njara ciaao mûtwe jwaayo,

¹⁶naagwe ûmîthînje na ûjûkie tharike yaayo ûmîmiinye kûthiûrûkîra kîritîro kîa igongwana.

¹⁷Ûgitange ntûrûme tûchunchî tûchunchî, na ûthaambie into bia kîu, na magûrû ja nyuma na bionthe ûbiîke amwe na tûnuku tûu twa nyama na mûtwe.

¹⁸ Nayo ntûrûme yonthe ûmîîthîrie au kîritîro kîa igongwana. Kîu nî kîgongwana gîa gwakîîria kîrî MWATHANI, kîrî îera rîrîega nîûntû nî kîgongwana kîriti na mwanki kîrî MWATHANI.

¹⁹“Ningî ûjûkie ntûrûme îîu îngî nawe Aaroni na ataana baakwe barîîkîîre njara ciaao mûtwe jwaayo,

²⁰naagwe ûmîthînje. Ûjûkie tharike îmwe yaayo ûmîake nchuuruune ya gûtû kwa ûrîo kwa Aaroni na ûmîake kinya nchuuruune cia matû ja ûrîo ja ataana baawe, na ûmîake biarene birîa inene bia njara ciaao cia ûrîo, na biarene birîa inene bia magûrû jaao ja ûrîo. Nayo tharike îngî ûmîminye kûthiûrûkîra kîritîro kîa igongwana.

²¹Naagwe ûjûkie tharike îmwe ya îrîa îrî kîritîro kîa igongwana, na ûjûkie maguta jamwe ûbiminyaminyîrie kîrî Aaroni na nguû ciaawe, na kîrî ataana baawe na kîrî nguû cia ataana baawe; nawe rîu amwe na nguû ciaawe ae ûmûtheru, nabo ataana baawe amwe na nguû ciaao baee babatheru.

²²“Ningî rî, ûjûkie maguta ja ntûrûme na maguta ja kînyanya gîa ntûrûme na maguta ja nyama cia kîu, na îtema arîa eega, na mpigo cio-ijîîrî na maguta jaacio, na kîero gîa kûgûrû kwa ûrîo, (nîûntû nî ntûrûme ya kwitheria nayo.)

²³Ningî ûjûkie mûgaate jûmwe junthe, na kamûgaate ka gûkaanda na maguta, na kamûgaate karîa kanini buru kuuma gîkabûûne kîa mîgaate îrîa îtiimbithîtue îrîa îrî mbere ya MWATHANI.

²⁴Into biu bionthe ûbirîîkîîre njareene cia Aaroni na njareene cia ataana baawe, naagwe ûtaambûrûkie njara teeka ûkûbirita birî kîgongwana gîa gûkîîrua kîrî MWATHANI.

²⁵Rîu, ûcoke ûbijûkie kuuma njareene ciaao naagwe ûbiîthîrie kîritîro kîa igongwana amwe na kîgongwana gîa gwakîîria, kîrîa kîeraga bwega kîrî MWATHANI; nakîo kîgongwana na njîra ya mwanki kîrî MWATHANI.

²⁶“Ningî ûjûkie kîbara gîa ntûrûme îû îriti nîûntû bwa kwathûrwa kwa Aaroni, ûkîrite kîrî kîgongwana gîa gûkîîrua kîrî MWATHANI; warîîkia gûgîtambûrûkîria njara, rîu gîkaa gîaaku.

²⁷Naagwe ûtherie kîbara kîu gîa ntûrûme na njîra ya gûgîûkîîria mbere ya MWATHANI, na amwe na kîero gîa ntûrûme îîu îritîri MWATHANI, bikaa bia Aaroni na ataana baawe.

²⁸Biu nîbio bikaa ichunchî bia Aaroni na ataana baawe mwanka kenya kuuma kîrî antû ba Israeli. Nîbio bikaa îtuui rîa athînjîri-Mûrungu kuuma kîrî igongwana bia thîîrî birîa bikaaritagwa nî antû ba Israeli; nîûntû nî kîgongwana kîrî MWATHANI.

²⁹Nguû irîa ntheru cia Aaroni ikaa cia ataana baawe arîîkia gûkua. Nîcio bageekagîra rîrîa bakîtherua na bakîathûrwa.

³⁰Mûtaana waawe ûrîa ûkaa mûthînjîri-Mûrungu antûûne aawe, nîwe ûgeekagîra nguû iu ntukû mûgwanja rîrîa arî îemeene rîa gûtirimanîra agûtumîkîra arî au atheru.

³¹“Nacio nyama cia ntûrûme îîu ya kîgongwana gîa kwathûra îrugîrwe antûûne au atheru,

³²nawe Aaroni na ataana baawe bakarîjanîria nyama iu cia ntûrûme na mîgaate îrîa îrî gîkabûûne mwariine jwa îema rîa gûtirimanîra.

³³Nîbo bakarîa into biu biriti kîgongwana nîûntû bwa kûbatheria na kûbaathûra, îndî antû ba oome bakárîa nîûntû batîthereetue.

³⁴Nyama kinya îrîkû kîrî iu cia kîgongwana kîu gîa kûtheria na kwathûra kana mîgaate îgatigara îgakara mwanka rûkîîrî bitîrîgi bithira, biu bitigarîte no mwanka wîîthîîrie na mwanki. Bitîrîîwa kaîrî nîûntû nî bibitherie.

³⁵“Ûu nîu ûkaathithia ûkîathûra na kûtheria Aaroni na ataana baawe kûringana na jarîa ndakwîra; najo mantû jau jakajûkia ntukû mûgwanja.

³⁶O ntukû o ntukû, ûukaritaga ndeegwa îrî kîgongwana kîa ûrekeri bwa meeyia nîûntû bwa kûgwatithania muntû na Mûrungu. Ningî ûrite kîgongwana gîa kûthiria meeyia na kûtheria kîritîro kîa igongwana, rîrîa ûkaarita kîgongwana nîûntû bwakîo na gûgîtûûrîria maguta na gûkîathûra.

³⁷Naagwe ûkaarita kîgongwana kîa ûrekeri bwa meeyia nîûntû bwa kûtherua na kwathûrwa gwa kîritîro kîa igongwana ntukû mûgwanja; na ûkîtheria na ûkîathûre. Nakîo kîritîro kîa igongwana gîkaa antû arîa atheru buru, na gîntû kîonthe kîrîa gîkaringîthia kîritîro kîa igongwana gîkaeejaga gîkîtheru.

³⁸“Atîrî, bibi nîbio into birîa ûkaritagîra kîritîroone kîa igongwana: tûng'ondu twîrî twa ûkûrû bwa mwaka jûmwe, o ntukû o ntukû.

³⁹Nako kang'ondu kamwe ûkaritage rûkîîrî na kangî ûgoro.

⁴⁰Amwe na kang'ondu kau ka mbere ûrite kilo îmwe ya mûtu jûmwinyu buru, juungeenue na lita îmwe ya maguta jamathuke, na lita îmwe ya ndibei birî kîgongwana gîa gwîtûûrîria.

⁴¹Nako kang'ondu kau kangî ûkarite kîgongwana ûgoro amwe na kîgongwana kîa irio na gîa gwîtûûrîria o ta rûkîîrî. Kîu nîkîo kîgongwana kîrîa kîeraga bwega kîrî MWATHANI nakîo nî gîa gwakîîria.

⁴²Kîu nîkîo kîgongwana gîa gwakîîria kîrîa gîkaritagwa magiita jonthe nthukîîne cionthe, kîritagîrwe au oome ya îema rîa gûtirimanîra mbere ya MWATHANI, na nîo ngatirimanagîra naagwe nîkenda mbaranîria naagwe.

⁴³Antû au nîo ngatirimanagîra na antû ba Israeli, naku gûkatherua nî mwanki jwa ûkumio bwaakwa.

⁴⁴Naani nkaatheria îema rîa gûtirimanîra, na kîritîro kîa igongwana; ningî ntherie Aaroni na ataana baawe nîkenda bantumîkagîra barî athînjîri-Mûrungu.

⁴⁵Ningî ngaatûûranîra na antû ba Israeli, mpee Mûrungu waao.

⁴⁶Nabo bakaamenya atî nî ni MWATHANI Mûrungu waao ûrîa waabaritîre nthîgûrû ya Misri, nîkenda ntûûranagîra nabo. Nî ni MWATHANI Mûrungu waao.”