Read KIMERU BIBLE PROTESTANT EDITION Kum 3 Bible Online

Kum 3 - KIMERU BIBLE PROTESTANT EDITION bible

Kum 3

¹Ntukû îmwe Musa nî aarîthîtie ng'ondu na mbûri cia mûthoni waawe Jethro mûthînjîri-mûrungu wa Midiani. Nî eetîre arîthîtie rwanda ndeene na arakinya Horebu[2] kîrîmeene kîa Mûrungu.

² Mûraîka wa MWATHANI aracionania kîrî we na njîra ya rûmûrî rwa mwanki rûkiumaga gîkambene. Musa atega, oonaga gîkamba gîgîakana, îndî gîtaîjaga.

³Musa arauga, “Ngeeta akuî mbone ûntû bûbû bwa kûrigaria bûkwoneka; nîatia gîkamba gîtîkûya!”

⁴MWATHANI akwona atî akwîjaîja nîkenda oona bwega, Mûrungu arî gîkambene aramwîta arauga, “Musa! Musa!” Nawe aracokia, “Ndî aja.”

⁵Mûrungu arauga, “Ûkéejaîja akuî aja; rita iraatû biaaku, nîûntû antû arîa ûrûngami nî antû aatheru.”

⁶Rîu arauga, “Nî ni Mûrungu wa abaagu, Mûrungu wa Abrahamu, Mûrungu wa Isaaka na Mûrungu wa Jakubu.” Musa araitha ûthiû bwaawe, nîûntû nî aakîraga kûraithîria Mûrungu.

⁷Nîrîo MWATHANI augîre, “Gûtî nkaanja nî mboneete mathîîna ja antû baakwa barîa barî Misri, na nî mbigîîtue kîrîro kîaao nîûntû bwa arûngamîîri baao, na nî nkûmenya kûthangîka kwaao.

⁸Naani nkwînama kûbatunyûkia kuuma kîrî Amisri na mbarite nthîgûrûûne îîu mbaikie nthîgûrûûne înjega îrî na webero, nthîgûrû îrîa nthongi na îrî mûthetu jûmûnoru na ûtonga bûbwingî; nthîgûrû îrîa Akanaani, na Ahiti, na Aamori, na Aperizi, na Ahivi, na Ajebusi batûûraga.

⁹Rîu rî, ngûkinyîrwa nî kîrîro gîa nchiarwa cia Israeli, na nî mboneete kûinyîîrua kûrîa bainyîîrîîtue nî antû ba Misri.

¹⁰Nandî ka ngûtûme kîrî Farao wîte ûkarite antû baakwa, nchiarwa cia Israeli kuuma Misri.”

¹¹Îndî Musa areera Mûrungu atîrî, “Ûûni ndî ûû nîkenda mbîta kîrî Farao, na nîkenda ndita nchiarwa cia Israeli kuuma Misri?”

¹²Mûrungu aramwîra, “Nkeethîrwa ndî amwe naagwe na gîkî nîkîo gîkaa kîonanîîria kîrî gwe atî nî ni ngûgûtûma. Rîrîa ûkaarita antû kuuma Misri, bûgaatumîkîra Mûrungu kîrîmeene gîkî.”

¹³ Musa areera Mûrungu, “Nkëeja gwîta kîrî antû ba Israeli nkabeera, ‘Mûrungu wa biûjûjû bieenu agûntûma kîrî buî,’ nabo bakambûûria, ‘Nîatîa eetagwa?’ Nkabeera atîa?”

¹⁴ Mûrungu areera Musa atîrî, “NI NDÎ ÛRÎA NDÎ.” Ningî aramwîra, “Îîra antû ba Israeli ûjû, ‘NDÎ ÛRÎA NDÎ’ agûntûma kîrî buî.”

¹⁵Mûrungu areera Musa atîrî, “Ûjû nîu ûkeera antû ba Israeli, ‘MWATHANI Mûrungu wa biûjûjû bieenu, Mûrungu wa Abrahamu, Mûrungu wa Isaaka, na Mûrungu wa Jakubu agûntûma kîrî buî: Rîrî nîrîo riîtwa rîaakwa kenya na kenya na ûu nîu ngeetagwa nî nthukî cionthe.’

¹⁶Îta ûûthûranie akûrû ba Israeli amwe ûbeere ûjû, MWATHANI Mûrungu wa biûjûjû bieenu, Mûrungu wa Abrahamu, Mûrungu wa Isaaka, na Mûrungu wa Jakubu nî acionanîtie kîrî ni na auga, ‘Nî mbûtegereete bwega na nî mboneete mantû jarîa bûthithîrîîtue Misri.

¹⁷Naani nî mbugîîte atî nkabûrita mîthangîkoone ya Misri, mbûikie nthîgûrû ya Akanaani na Ahiti, na Aamori, na Aperizi, na Ahivi, na Ajebusi; nthîgûrû îrîa nthongi na îrî mûthetu jûmûnoru na ûtonga bûbwingî.’

¹⁸Nabo bakaathîkîra kajû gaaku; naagwe amwe na akûrû ba Israeli bûgeeta kîrî mûnene wa Misri bûmwîre ûjû, ‘MWATHANI Mûrungu wa Ahibirania nî athirîtie gûtirimana naatuî. Nandî nî tûgûkûromba ûtûrekeerie twîte rûgendo rwa ntukû ithatû rwanda nîkenda tûritîra MWATHANI Mûrungu weetû kîgongwana.’

¹⁹Nî nkûmenya mûnene wa Misri atîbûrekeeria bwîta tiga agakinyîîrua na inya nkûrûki.

²⁰Tontû bûû, ngaatambûrûkia njara yaakwa ndiinge Misri ngîtumagîra biama bia kûrigaria. Nyumeene akaabûrekeeria bwîte.

²¹ Ngaatûma antû baba bathithîrua mantû jameega nî Amisri; na rîrîa bûgeeta, bûtîîta njara intheri.

²²O mûka wonthe akooria mûtûûri waawe na mûka mûgeni ûrîa ûtwîre nyomba yaawe aamûnenkere into bia fetha na thaabu na nguû na bûnenkere ataana beenu na aarî beenu beekîre. Ûu nîu bûkaajûkia into bia Amisri.”