Read KIMERU BIBLE PROTESTANT EDITION Kum 30 Bible Online

Kum 30 - KIMERU BIBLE PROTESTANT EDITION bible

Kum 30

¹“Naagwe waake kîritîro kîa igongwana, nîûntû bwa kwîthîria ubaani; ûgîake na mbaaû cia mîgaa.

²Nakîo kîîthîrwe kîrî na ûraaja bwa nusu mita (0.5m) na wariî bwa nusu mita (0.5m); kîng'aneene, na gwitia bwa îgûrû kîîthîrwe kîrî kîa mita îmwe (1m). Ngoji cia mîthia ciaakîo ciîthîrwe irî gîntû kîmwe nakîo.

³Nakîo kîritîro kîa igongwana ûkîereerie na thaabu întheru buru kunthe îgûrû, na nteere ciaakio cionthe, na ngojine cia mîthia ciakîo biîthîrwe birî bia gîntû kîmwe.

⁴Ûkîthithîrie mîkang'i îîrî ya thaabu, nayo îîthîrwe îrî rungu rwa mûkûmo nteere cio-ijîîrî yerekeene. Mîkang'i îîu nîyo îkagwatagîîra itugî bia gûgîkamataga.

⁵Ûthithie itugî biu na mîtî ya mîgaa na ûcoke ûbiereerie na thaabu.

⁶Nakîo kîritîro kîa igongwana ûgîîke oome ya nanga îrîa îcuurîte o mbere ya Îthandûkû rîa kîrîkanîro, na mbere ya gîtî gîa Kîaao kîrîa kîrîkîîri îgûrû rîa Îthandûkû rîa kîrîkanîro, arîa ngatirimanagîra naagwe.

⁷Aaroni nawe akaaîthagîria ubaani kîritîro kîa igongwana kîu, o rûkîîrî rîonthe rîrîa eeta kûthuranîra taawa.

⁸Rîrîa Aaroni agwatia taawa ûgoro, nî athagie ubaani rîonthe arî mbere ya MWATHANI na kûthithague ûu nthukîîne cionthe.

⁹Ûkarîîthîria ubaani îtî întheru o, kana ûritîra kîgongwana gîa gwakîîria kana kîa irio kana gîa into bia gwîtûûrîria.

¹⁰Aaroni akaritagîra kîgongwana gîa kûthiria meeyia o, au ngojine cia mîthia ciaakîo o rîmwe mwaka. Agaatumîra tharike ya kîgongwana gîa kûthiria meeyia gûkîtheria o rîmwe mwaka nthukîîne cionthe. Naku nî antû arîa atheru buru meethoone ja MWATHANI.”

¹¹MWATHANI nî eerîre Musa atîrî,

¹²“Rîrîa rîonthe ûkaathithia ûtari bwa antû ba Israeli, nîrîo o muntû akarita mbeecha cia ûkûûri kîrî MWATHANI, nîkenda batîkagwatwe nî mîrimo rîrîa bagîtarwa.

¹³ O muntû wonthe ûrîa ûgatarwa kîrî ûtari bûu, akanenkanîra into bibi: mbeecha cia shekeli irîa cituui nî atongeeria. No mwanka o muntû wonthe arite mbeecha iu irî kîewa kîrî MWATHANI.

¹⁴Muntû wonthe ûrîa ûgatarwa ûtarine bûu wa mîaka mîrongo îîrî kana nkûrûki akarita kîewa kîa MWATHANI.

¹⁵Itonga bitîrita biewa bibingî nkûrûki na nkîa itîrita biewa binini nkûrûki ya kîagatî gîa shekeli, rîrîa bakîrita kîewa kîa MWATHANI gîa kûreeta ngwatanîro nawe.

¹⁶Naagwe ûkaajûkia mbeecha cia kweberua meeyia kuuma kîrî antû ba Israeli, nacio mbeecha iu ûcieethie cia gûtumîrwa Îemene rîa gûtirimanîra. Nacio ikaririkanagia MWATHANI antû ba Israeli, nîkenda bûgîta ngwatanîro na MWATHANI.”

¹⁷MWATHANI nî eerîre Musa atîrî,

¹⁸ “Ningî ûthithie kîraî gîa kwîria gîa îturutia, kîrî na gîtina gîa îturutia. Ûgîîke gatîgatîîne ka îema rîa gûtirimanîra na kîritîro kîa igongwana, ningî wîkagîre rûûjî kû.

¹⁹Kûu nîku Aaroni na ataana baawe bagatua kûthambagîra njara na magûrû.

²⁰Rîrîa bakeejaga îemeene rîa gûtirimanîra kana rîrîa bakaathengagîîra kîritîro kîa igongwana, gûtirimana bakîrita igongwana bia gwakîîrua na mwanki kîrî MWATHANI nîrîo bakathambaga na rûûjî batîgakue.

²¹Nabo bakathambaga njara na magûrû batîgakue. Bûu nabu bûkaa waatho kîrî gwe na nchiarwa ciaawe mwanka kenya, nthukîîne cionthe.”

²² Ningî rî, MWATHANI nî eerîre Musa atîrî,

²³“Jûkia maguta jarîa jaeeraga bwega buru ja manemane shekeli magana jataano, na ja ndalasini shekeli magana jaîrî na mîrongo îtaano, na matî jarîa jaeeraga bwega ja mûuro shekeli magana jaîrî na mîrongo îtaano;

²⁴na ûjûkie ja maguta jeetagwa kasia kilo ithanthatû na maguta ja nzeituni lita inya.

²⁵Jau jonthe nîjo ûkaathithia najo maguta ja gwîtûûriria athînjîri jaugeenue. Najo jakaa maguta jamatheru ja kwathûra na kûtheria najo.

²⁶Maguta jau nîjo ûkatheria najo îema rîa gûtirimanîra na Îthandûkû rîa kîrîkanîro,

²⁷na meetha amwe na into biaayo bionthe, na gîtugî gîa kûrîkîîra taawa na kîritîro kîa igongwana gîa kwîîthîria ubaani.

²⁸Ûtherie kîritîro kîa igongwana gîa gwakîîria, amwe na into biaakîo na karaî gaakîo na gîkinyithio gîaako.

²⁹Into biu bionthe ûkabitheria na kûbiathûre nîkenda biaa bibitheru. Noo bunka kîrîa gîkabitongithia gîkathera.

³⁰Naagwe wîtûûrîrie Aaroni na ataana baawe maguta ûbaathûre na ûbatherie nîkenda bantumîkagîra barî athînjîri-Mûrungu.

³¹Ningî ûkeera antû ba Israeli atîrî, ‘Maguta ta jaja nîjo maguta jarîa jakatheranagia na kwathûranaga nthukîîne cieenu cionthe.

³²Jakarîîtûûrîrua kîrî antû ûtheri o ûu, na bûkarîthithia maguta jangî jakari ta jaja nîûntû jaja nî maguta jamatheru na kîrî buî nîjabuîrîte kwonagwa jatheri.

³³O muntû wonthe ûrîa ûkaathithia jangî jang'uanene najo kana ajatumîre jau ndabwîrîra kîrî gwîtûûrîria antû batî athînjîri-Mûrungu, muntû ûu agatewa atige kwaa ûmwe wa antû baakwa’”

³⁴MWATHANI nî eerîre Musa atîrî, “Jûkia maguta jarîa jaeeraga bwega jarîa jaumaga ta ntaanta mûtîîne jeetagwa stakite, onyaka na galabanumu nîûntû jaumanîtie na macoco jarîa jaeeraga bwega (jonthe jeethîrwe jarî na ithimi bing'anene.)

³⁵Naagwe ûthithie ubaani na into biu biungeenue bwega na chumbî, îrîa ntheru na njega buru.

³⁶Naagwe ûtutume ubaani îmwe kîrî îîu yee mûtu naju ûjwikie îemeene rîa gûtirimanîra arîa ngatirimanîra naagwe. Kîrî gwe antû au nîo gûkaa antû arîa atheru buru.

³⁷Ubaani îrîa bûkathithia na njîra îîu bûkéeja kwithithîria îngî tayo, nîûntû ubaani îîu nî întheru kîrî MWATHANI.

³⁸O muntû wonthe ûrîa ûkaathithia ubaani ta bûu nîkenda aakaga ta maguta agatewa atige kwaa ûmwe wa antû baakwa.”