Read KIMERU BIBLE PROTESTANT EDITION Kum 31 Bible Online

Kum 31 - KIMERU BIBLE PROTESTANT EDITION bible

Kum 31

¹MWATHANI nî eerîre Musa ûjû,

²“Atîrî, tega ndîgwîta Bezaleli mûtaana wa Uri, Uri mûtaana wa Huri wa mwîrîga jwa Juda na riîtwa rîaawe.

³Ningî nkûmûûjûria na Roho wa Mûrungu, ndamwaa ûûme na ûmenyo bwa ûtea bwa waaki,

⁴nîkenda athithia mbicha îrîa îkaathingatagwa nîûntû bwa kûthithia into bia thaabu, na fetha na îturutia;

⁵cia kwaja maiga ja kûgemia, na cia gwatûra mbaaû na ûtea bûngî bunthe.

⁶Ningî amwe nawe nî nenkanîrîte Oholiabu mûtaana wa Ahisamaki wa mwîrîga jwa Dani amûteethagia. Nî mpeejanîte ûûme kîrî atea bonthe barîa nkwîrîrîte.

⁷Nabio nî îema rîa gûtirimanîra, na Îthandûkû rîa kîrîkanîro, na gîtî gîa Kîaao kîrîa kîrîkîîri îgûrû rîa Îthandûkû na into bionthe bia kûgemia îema rîa gûtirimanîra.

⁸Meetha na into bia gûtumîrwa meetheene na gîtugî gîkîtheru gîa kûrîkîîrwa taawa na into biaakîo bionthe, na kîritîro kîa igongwana gîa kwîîthîria ubaani.

⁹Kinya kîritîro kîa igongwana kîa kûritîraga igongwana bia gwakîîria na into biaakîo bionthe, na kîraî na gîkinyithio gîaakîo.

¹⁰Nguû îrîa îtumi bûbûthongi, na nguû intheru cia mûthînjîri-Mûrungu Aaroni na cia ataana baawe nîûntû bwa ngûgî yaao ya gûtumîka barî athînjîri-Mûrungu.

¹¹Maguta ja kwathûrana na kûtheria najo, na ubaani îrîa yeeraga bwega ya antû arîa atheru. Nabo nî bathithie kûringana na jonthe jarîa nkwîrîte.”

¹²MWATHANI nî eerîre Musa atîrî,

¹³“Îîra antû ba Israeli, ‘Noo mwanka bûmenyagîîre sabatû ciaakwa, nîkwîthîrwa nîru rwano gatîgatî keenu naani na nthukîîne cieenu cionthe rwa kûbûririkanagia atî nî ni MWATHANI mbûtheretie na nkabwathûra.

¹⁴Noo mwanka bûmenyeere sabatû nîûntû kîrî buî nî întheru. O muntû wonthe ûrîa ûkamîîkîra mûgiro noo mwanka ooragwe. O muntû ûrîa wonthe ûkarita ngûgî kinya îrîkû ntukû ya sabatû agatewa aumaume kîrî antû bangî.

¹⁵ Ngûgî îritagwe ntukû ithanthatû, îndî ntukû ya mûgwanja nî sabatû ya kûnogoka nayo nî întheru kîrî MWATHANI. O muntû wonthe ûrîa ûkarita ngûgî ntukû ya sabatû nî abuîrîte kûûragwa.

¹⁶Tontû bûû, antû ba Israeli bakamenyagîîra sabatû nthukîîne ciaao cionthe îrî kîrîkanîro gîa kenya.

¹⁷ Nîyo rwano rwa kenya gatîgatîîne gaakwa na antû ba Israeli rwa kwonania antû MWATHANI oombîre nthîgûrû na îgûrû ntukû ithanthatû na ntukû ya mûgwanja aranogoka.’”

¹⁸MWATHANI athiria kwarîria Musa kîrîmeene gîa Sinai, aramûnenkera tûkongoro twîrî twa maiga jarîa jaandîki maathana ja kîrîkanîro, najo jaandîki na kîara kîa Mûrungu.