Read KIMERU BIBLE PROTESTANT EDITION Kum 32 Bible Online

Kum 32 - KIMERU BIBLE PROTESTANT EDITION bible

Kum 32

¹ Rîrîa antû boonîre Musa agûkara mono atîrauma kîrîmeene, nî boothûranîre kîrî Aaroni baramwîra atîrî, “Tûthithîrie mûrungu jwa gûtûtongagîîria; nîkwîthîrwa Musa muntû ûrîa waatûritîre nthîgûrû ya Misri tûtîkûmenya nîatîa arakarîre.”

²Aaroni arabeera atîrî, “Riteeni mina cia thaabu irîa irî matûûne ja aka beenu, na nthaka cieenu na aarî beenu, bûndeetere.”

³Tontû bûû, antû bonthe bararita mina cia thaabu irîa ciaarî matûûne jaao baraireta kîrî Aaroni.

⁴ Aaroni araijûkia araikerûra na arathithia njaû. Nabo barauga, “Jûjû nîju mûrungu jweenu Israeli jûrîa jwaabûritîre kuuma nthîgûrû ya Misri.”

⁵Aaroni oona mantû jau araaka kîritîro kîa igongwana mbere ya njaû îîu na aratûmîîria akiugaga, “Rûûjû nîrîo tûkaathithia kîatho nîûntû bwa gûkumia MWATHANI!”

⁶ Nabo, rûûnene rûkîîrî kainda, barookîîra bararita igongwana bia gwakîîria na igongwana bia thîîrî. Antû barakara nthî kûrîa na kûnyua baracoka barookîîra kwina.

⁷Nîrîo MWATHANI eerîre Musa atîrî, “Înama nîûntû antû baaku barîa waaritîre nthîgûrû ya Misri nî baeete babathûûku.

⁸Nî bagarûkîte ntûti bauma njîreene îrîa ndaabeerîîre. Nî baithithîrîtie njaû ya thaabu na bamîthaathayia na bamîritîra igongwana bakiugaga, ‘Jûjû nîju mûrungu jweenu buî Israeli jûrîa jwaabûritîre nthîgûrûûne ya Misri!’”

⁹MWATHANI areeta mbere kwîra Musa ûjû, “Nî ndaithîrîîtie antû baba, na ûrîa mboneete nî atî baba nî antû baboomo mîtwe.

¹⁰Nandî ûkangiria mbathirie buru nîûntû bwa mûthûûro jûrîa ndî naju îgûrû rîaao. Îndî gwe ngakweethia mûgongo jûmûnene.”

¹¹ Îndî Musa areerenca MWATHANI Mûrungu waawe aramwîra, “Itû MWATHANI nîmbi yatûma ûthûûra ûjû nîûntû bwa antû baaku barîa gwe waritîre nthîgûrû ya Misri na inya înene?

¹²Nîkî ûkarekeeria Amisri bauga, ‘Aabaritîre Misri arî na ûthûûku nabo, nîkenda abooragîra irîmeene na abathiria nthîgûrûûne.’ Tiga kûthûûra mono; rekana na yeerekeeria rîu ûrî narîo rîa gûkanûkia antû baaku.

¹³ Ririkana nthûûmba ciaaku Abrahamu, na Isaaka na Jakubu barîa gwe gwengwa waciîtîîrie ûrabeera, ‘Nkathegeyia nchiarwa ciaaku ciingîe o ta njota cia îgûrû, na nthîgûrû îîjî yonthe îrîa ndaabwîrîîre, nkanenkera nchiarwa cieenu nayo yee yaao kenya na kenya.’”

¹⁴MWATHANI aragarûka aratigana na ûthûûku bûrîa eendaga kûthithîria antû baawe.

¹⁵Musa aragarûka areenama kuuma kîrîmeene akamatîte maiga jaîrî jarîa jaandîki kîrîkanîro nteere cio-ijîîrî.

¹⁶Najo maiga jau jaathithîtue nî Mûrungu, na nî Mûrungu wajandîkîte, akîajaga ntemwa cia maathana maigeene jau.

¹⁷Rîrîa Joshua aigîrue gîtuma gîkînene mono gîkiuma naarîa antû baarî, nî eerîre Musa atîrî, “Kûrî na gîtûma ta kîa ndwaa kambîîne.”

¹⁸Îndî arauga, “Gîtuma kîrîa nkwigua tî kîa ûûmbani ndweene kana kîrîro gîa kûûmbwa; nî gîtuma gîa kwina.”

¹⁹O rîrîa aakuîrîîrie kambî na aroona njaû nî aagwatîrwe nî marûrû jamanene aragera maiga jarîa jaandîki kîrîkanîro agûkinya mûgwanthîîne jwa kîrîma najo jaraunîkanga.

²⁰Musa arajûkia njaû îîu baathithîtie aramîakîîria na mwanki îraa mûju, naju arajwîkîra rûûjîîne aranyuithia antû ba Israeli.

²¹Musa aracoka arooria Aaroni atîrî, “Nîatîa antû baba baakûthithîrie tontû wabareetere meeyia jamanene ûjû?”

²²Aaroni aramûcokeria aramwîra, “Mwathi waakwa, tiga gwakanwa nî mûthûûro mono nîûntû gwe nî ûkûmenya ûrîa antû baba beendeete kûthithia jarîa mathûûku.

²³Nîkwîthîrwa nîbo barambîrîre ‘Tûthithîrie mûrungu jûrîa jûgatûtongagîîria, nîûntû Musa muntû ûrîa waatûritîre nthîgûrûûne ya Misri, tûtîkûmenya ûrîa arakarîîre kîrîmeene.’

²⁴Naani ndabeera, ‘O muntû wonthe ûrîa ûrî na gîntû kîa thaabu akîrite.’ Tontû bûû, banenkera, ndamîîkîra mwankiine nayo yauma njaû îîjî.”

²⁵Musa rîrîa oonîre atî antû bakûremwa nî kwigwata mantûûne jamathûûku mbere ya antû baao (na atî Aaroni akûremwa kûbarigîîria),

²⁶nîrîo Musa aarûngamîre mpingîroone ya kambî arauga, “O bunka muntû ûrîa ûrî rûteereene rwa MWATHANI nî eeje kîrî ni!” Nabo antû ba mwîrîga jwa Lawi bonthe baroothûrana kîrî we.

²⁷Rîu arabeera atîrî, “MWATHANI Mûrungu wa Israeli ariuga ûjû, ‘O muntû o muntû kîrî buî nî ajûkie rûchiû, akûrûkîîre mpingîroone îîjî gûtonyeera kambîîne mwanka îrîa îngî akîûragaga mûtaana wa ng'ina, na mûcoore waawe, na mûtûûri waawe.’”

²⁸Nabo antû ba mwîrîga jwa Lawi barathithia mantû jau kûringana na ûrîa Musa augîîte. Ntukû îîu antû ta ngiri ithatû barooragwa.

²⁹Musa arabeera, “Naarua bûgûciathûrana na bwaitheria nîûntû bwa gûtumîkîra MWATHANI nîkwîthîrwa o ûmwe weenu aakûrekeeria mwoyo jwa mûtaana waawe, na jwa mûtaana wa ng'ina nîkenda MWATHANI abûreetera kîtharimo naarua.”

³⁰Rûûneene Musa areera antû atîrî, “Buî nî bûthithîtie meeyia jamanene. Nandî ka mbitie kîrî MWATHANI nkabwerencanîîre nîûntû bwa meeyia jeenu noo këethîra bûkagîa na ngwatanîro nawe.”

³¹Tontû bûû, Musa aracoka kîrî MWATHANI aramwîra, “Nkûrigara! Antû baba nî beîîtie meeyia jamanene; nîûntû nî baithithîrîtie mûrungu jwa thaabu.

³² Nandî rî, barekere meeyia jaao na kwëethîrwa ûtîbarekera itû mpaangûra mpuume yukuune rîrîa waandîkaga mantû ja antû.”

³³MWATHANI areera Musa atîrî, “Nî muntû ûrîa ûthithîtie meeyia kîrî ni nîwe nkaangûra yukuune rîaakwa.

³⁴Îndî gwe nandî îta ûtongeeria antû ûbaikie gûntû kûrîa nkwîrîrîte. Mûraîka waakwa ageeta arî mbere yaaku. Îndî ntukû ya îkanûkia yakinya, nkaabakanûkia nîûntû bwa meeyia jaao.”

³⁵MWATHANI aratûma mîrimo kîrî antû nîûntû nî baatûmîte Aaroni akathithia njaû ya thaabu.