Read KIMERU BIBLE PROTESTANT EDITION Kum 34 Bible Online

Kum 34 - KIMERU BIBLE PROTESTANT EDITION bible

Kum 34

¹MWATHANI nî eerîre Musa atîrî, “Aja maiga jangî jaîrî o ta jarîa ja mbere; naani nkaandîka maigeene jau nteto irîa ciaarî maigeene ja mbere jarîa waunangîre.

²Rûûjû rûkîîrî withuranîre witie kîrîmeene gîa Sinai, wîje ûcemanie naani nau kîrîmeene îgûrû.

³Gûtî muntû ûbuîrîte kwîjania naagwe na ûkarekeeria muntû kinya ûrîkû oonekana kîrîmeene noo kû. Ndîîthia îkaarîîthua kîrîmeene kîu.”

⁴Tontû bûû, Musa araaja maiga jangî jaîrî ta jarîa ja mbere. Rûûnene rûkîîrî Musa arookîîra, araitia kîrîmeene gîa Sinai akamatîte maiga jau jo-jaîrî na njara o ta ûrîa MWATHANI aamwîrîte.

⁵MWATHANI areenama arî îtuune ararûngama au kîrî we na aragweta riîtwa rîa MWATHANI.

⁶ MWATHANI nî aakûrûkîrîîre mbere ya Musa akiugaga, “MWATHANI nî Mûrungu wa kîaao na wendo, atîthûûrangaga na mpwîî, na oojûri wendo bûrîa bûtîgarûkaga kana bûtaûka.

⁷Nî atûûragia kîaao kîrî antû ngiri inyiingî, na nî arekagîra auni Waatho, na athûûkia na eeyia, îndî atîrekagîîria ûûî bûkûrûka bûtîkanûkîîtue. Akanûkagia meeyia ja aciari kîrî aana baao, na kîrî aana ba aana baao, mwanka nthukîîne ya ithatû na ya inya.”

⁸Musa areenamîîria bwa nthî na mpwîî arathaathayia MWATHANI.

⁹Aracoka arauga, “Gûkëeja kwîthîrwa nkwoneka mbagîrîte meethoone jaaku, itû MWATHANI, ndakwerenca, wîtîkîre gwîtania naatuî, kinya këethîra baba nî antû boomîtie mîtwe. Ningî rekera mathûûkia jeetû na meeyia jeetû, ûtûjûkie tûrî rûgai rwaaku.”

¹⁰MWATHANI arauga, “Atîrî, nandî nîngwîka kîrîkanîro mbere ya meetho ja antû bonthe ba Israeli nkathithia mantû ja kûrigaria ta jarîa jatoonekana nthîgûrûûne kunthe kaîrî kana kîrî mûgongo noo jûrîkû. Nabo antû bonthe barîa bûtûûranagîra nabo bakoona ngûgî ya MWATHANI; nîûntû mantû jarîa mpengeerie kûthithia naabuî nî ja kûrigaria.

¹¹Menyeereeni mantû jarîa nkûbwîra naarua. Atîrî, nkabwîngîra Aamori, na Akanaani, na Ahiti, na Aperizi, na Ahivi, na Ajebusi, baume mbere yeenu.

¹²Imenyeereni akî bûtîkeeje kûrîîkania kîrîkanîro na antû barîa batwîre nthîgûrûûne îrîa bwîtîte, nabu ûntû bûu bwaa kîgitario gatîgatîîne keenu.

¹³ Naagwe ûtharie iritîro bia igongwana biaao, na ûthûûkangie mîng'uanano yaao ya itugî na ûgiitange itugî biaao bia Ashera.[10]

¹⁴Nîkwîthîrwa bûtîbuîrîte kûthaathayia mûrungu jûngî, nîûntû MWATHANI ûrîa wîtagwa ‘Wa Rûriitho,’ nî Mûrungu ûrî rûriitho.

¹⁵Bûthirie mîng'uanano bûtîkeeje gwîka kîrîkanîro na atûûri ba nthîgûrû îîu, na bûtîkeeje kûrîa igongwana biaao birîa baritagîra mîrungu yaao bagîtarataranagia nayo ûmarayeene.

¹⁶Bûtîkeje kûjûkîria nthaka cieenu aarî baao, nabo aarî bau baao beeja kûthaathayia mîrungu yaao amwe nabo batûma ataana beenu kinya bo bathaathayia mîrungu îngî.

¹⁷ “Bûkáithithîria mîrungu ya mîng'uanano ya gûkerûra.

¹⁸ “Bûmenyagîîre kwîthagîrwa bûrî na mambura ja mîgaate îtiimbithîtue. Bûrîjage mîgaate îtiimbithîtue ntukû mûgwanja îgiiteene rîa mweri jwa Abibu o ta ûrîa mbwîrîte nîkwîthîrwa nî mweriine jwa Abibu bwaumîre Misri.

¹⁹ Najo marikithathi jonthe nî jaakwa, marikithathi ja tûîjî tweenu jonthe, na ja ndîîthia cieenu jonthe na ja ng'ombe na ja ng'ondu.

²⁰ Nayo rikithathi ya ntigiri îgakûûragwa na gatûrûme, na wëethîrwa ûtîmîkûûra, ûmiune nkingo. Najo marikithathi ja tûîjî tweenu jonthe bûkaajakûûraga. Gûtî muntû ûbuîrîte kwîjaga kîrî ni njara intheri.

²¹ “Bûritage ngûgî ntukû ithanthatû, îndî ntukû ya mûgwanja bûnogokage; nogokageni kinya îgiita rîa kûrîma kana rîa gûketha.

²² Bûmenyagîîre kwîthagîrwa bûrî na mambura ja maketha; kîa maketha ja mbere ja nkano, na maketheene ja mûthia jwa mwaka.

²³Antûarûme beenu bonthe bakeejaga gûcionania mbere ya MWATHANI Mûrungu wa Israeli maita jathatû ndeene ya mwaka.

²⁴Naani nkeenga mîgongo yume mbere yeenu na neneyie nthîgûrû yeenu. Gûtî we ûkairîrîria kûjûkia nthîgûrû yeenu, rîrîa bûgeetaga gûcionania kîrî MWATHANI Mûrungu weenu maita jathatû ndeene ya mwaka.

²⁵ “Ûkáaritanîria kîgongwana kîa nyomoo amwe na mîgaate iimbithîtue; na ûgaatigaria kîgongwana gîa Pasaka kîraara mwanka gûkîa rûûnene.

²⁶ Irio bia mbere buru kîrî maketha jeenu ja mbere kuuma miuundeene yeenu noo mwanka bûkaajareetaga nyomba ya MWATHANI Mûrungu weenu. Ûkarîruga kabûri kana kang'ondu gagwonka.”

²⁷MWATHANI nî eerîre Musa atîrî, “Aandîka nteto iji: kûringana na nteto iji ngwîîka kîrîkanîro naagwe na kinya Israeli.”

²⁸Musa nî aakarîre kîrîmeene amwe na MWATHANI ntukû mîrongo îna ûtukû na mûthenya. Nawe ataarîjaga irio kana akunda rûûjî. Nî aandîkîre nteto iu cia kîrîkanîro maigeene jarîa jaîrî, tacio maathana îkûmi.

²⁹ Musa rîrîa eenamîre kuuma kîrîmeene gîa Sinai agwete maiga jaîrî jarîa jaandîki nteto cia kîrîkanîro, ataamenyaga atî ûthîû bwaawe nî bwaakengakengaga nîûntû nî arîîkîîtie kwaria na Mûrungu.

³⁰Aaroni na antû bonthe ba Israeli baatega Musa baroona ûthiû bwaawe bûgîkengakenga, nabo barakîra gwîta akuî nawe.

³¹Îndî Musa arabeeta, nawe Aaroni na atongeeria bonthe ba kîûthûrano kîa Israeli bacoka kîrî we nawe Musa arabaarîria.

³²Nyumeene antû bonthe ba Israeli barathengeera akuî Musa nawe arebeera jonthe jarîa MWATHANI aamwîrîrîte kîrîmeene gîa Sinai.

³³Musa aathiria kwaria nabo nî eekîîre kananga ga gûkunîka ûthiû bwaawe.

³⁴Îndî rîonthe rîrîa Musa aakûrûkaga îemeene kwaranîria na MWATHANI, nî aaritaga kananga kau gakunîkagîra ûthiû bwaawe, mwanka rîrîa akauma îemeene. Nawe rîrîa aumagara îemeene, eeta kwîra antû ba Israeli ûrîa MWATHANI amwîrîte,

³⁵antû ba Israeli nî boonaga gîkoonde kîa ûthiû bwa Musa gîgîkengakenga. Musa agakunîka ûthiû bwaawe kaîrî na kananga kau mwanka rîrîa agacoka kwaranîria na MWATHANI.