Read KIMERU BIBLE PROTESTANT EDITION Kum 36 Bible Online

Kum 36 - KIMERU BIBLE PROTESTANT EDITION bible

Kum 36

¹“Bezaleli, na Oholiabu, na antû bangî bonthe barîa MWATHANI aeete ûûme na inya ya kûrita ngûgî ya waaki bwa kîrombero, bakaarita ngûgî îîu kûringana na ûrîa MWATHANI augîîte bunthe.”

²Musa nawe nî eetîre Bezaleli, na Oholiabu na antû bonthe barîa MWATHANI aaete ûtea na barîa aringithîtie nkoro baacieejana kwîja kûrita ngûgî îîu.

³Nabo nî baajûkîrie kuuma kîrî Musa biewa birîa bionthe biaritîîtwe nî antû ba Israeli baciendereete bongwa nîûntû bwa gwaka kîrombero. Antû barakara bakîmûretagîra biewa biu o rûkîîrî o rûkîîrî rîonthe.

⁴Nabo atîa barîa baarî na ûûme bwa kûrita ngûgî cia waaki bunthe bwa kîrombero nî baatigîre ngûgî ciaao irîa baaritaga, bareeja.

⁵Nabo bareera Musa atîrî, “Antû nî bakûreeta into nkûrûki ya birîa bikwendekana ngûgîîne îrîa MWATHANI augîîte îritwe.”

⁶Tontû bûû, Musa araathana gûtûmîîrua kambîîne kunthe kwîranwe nteto iji, “Gûkaagîta muntû ûreeta kîewa kîngî nîûntû bwa kîrombero, eethîrwa arî mûka kana ntomûrûme.” Tontû bûû, antû bararigîîrua batîkareete into bingî.

⁷Into birîa biaarî bikûreetwa nî biang'ani bia kûthiria ngûgî îîu na bigatigara.

⁸Antû bonthe barîa baarî na ûtea bwa waaki nkûrûki ya bangî barîa baaritaga ngûgî, nî baakîre îema rîa gûtirimanîra baratumîra nanga îkûmi. Nanga iu ciaarî cia nguû irîa njega cia rangi ya wiirû bwa îgûrû, na ya mûkû, na întuune, îtumîîri maûa ja kerubimu jamathongi.

⁹Nanga o îmwe yaarî na ûraaja bwa mita îkûmi na inya (14m) na wariî bwa mita ijîîrî. Nanga cionthe ciaarî na ithimi bing'aneene.

¹⁰Nabo nî baatumîre baragwatithania nanga ithaano amwe, na nanga ingî ithaano kinya cio baraigwatithania.

¹¹Ningî barathithia inyûûrû bia nguû ya wiirû bwa îgûrû nangene ya mûthia ya kîogwa kîmwe kîa nanga, na barathithia o ûu kîrî kîogwa kîa biîrî.

¹²Nî baathithîrie inyûûrû mîrongo îtaano kîrî nanga ya mbere kîogweene kîa mbere, na barathithia inyûûrû bingî mîrongo îtaano nangeene ya mbere kîogweene kîa mbere na kîa biîrî nîka bierekanîrîte.

¹³Barathithia ibungo mîrongo îtaano bia thaabu, baragwatithania nanga cia kîogwa kîa mbere na kîa biîrî. Tontû bûû, nanga iu cia îema rîa gûtirimanîra iraa nanga îmwe.

¹⁴Ningî baracoka barathithia nanga îkûmi na îmwe cia guee ya mbûri cia gûkunîka îema rîa gûtirimanîra.

¹⁵O nanga îmwe yaacio yaarî na ûraaja bwa mita îkûmi na ithaano (15m), na wariî bwa mita ijîîrî (2m). Nanga iu îkûmi na îmwe cionthe ciaarî cia ithimi bing'anene.

¹⁶Kîrî nanga îîu baragwatithania nanga ithaano kîogwene kîmwe, na iu ingî ithanthatû kîngî.

¹⁷Nabo barathithia inyiûûrû mîrongo îtaano nangeene îrîa yaarî mûthia kîogwene kîmwe, na inyiûûrû mîrongo îtaano nangene ya mûthia îrîa yaarî akuî na kîogwene kîa biîrî.

¹⁸Barathithia ibungo mîrongo îtaano bia îturutia bia kûgwatithania nanga iu cia guee ya mbûri nîkenda yaa nanga îmwe.

¹⁹Nîûntû bwa gûkunîka îema rîa gûtirimanîra, barathithia ndwaara cia mîgûûta ya ntûrûme na ya mbûri.

²⁰Nîrîo bacokîre barathithia mîînjîro ya mîgaa nîûntû bwa îema.

²¹O Mwîînjîro jwaarî na ûraaja bwa mita ithaano (5 m) na wariî bwa centimita mîrongo mûgwanja na ithaano (75 cm).

²²O Mwîînjîro nî jwaarî na mpang'i ijîîrî cia kwîja kûmîgwatithania. Mîînjîro yonthe ya îema rîa gûtirimanîra yaathithîtue ûu.

²³Oû nîu mîînjîro ya îema rîa gûtirimanîra yaathithîtue. Rûteere rwa ûmotho îrathithua mîînjîro mîrongo îîrî.

²⁴Itineene bia mîînjîro îîu barathithia ikinyithio mîrongo îna bia fetha, o ikinyithio biîrî kîrî mwîînjîro jûmwe, nîûntû bwa mpatha cio-ijîîrî cia mwîînjîro.

²⁵Rûteereene rwa ûrîo rwa îema nî baathithîrie mîînjîro mîrongo îîrî.

²⁶Baramîthithîria ikinyithio bia fetha mîrongo îîrî, o mwîînjîro jûrî na ikinyithio biîrî.

²⁷Ningî barathithia mîînjîro îtaantatû ya gwîkîrwa nyuma ya îema rûteere rwa rûgûrû.

²⁸Mîînjîro îîrî nayo ya gwîkîîrwa mîthieene yo-îîrî ya îema rûteere rwa nyuma.

²⁹Nayo mîînjîro îîu ya mîthia ya îema nî yaathûkene bwa nthîgûrû, îndî nî yaagwatithanîîrîtue bwa îgûrû, mûkîîndoone jwa mbere. Rîu mînjîîro yo-îîrî ya mîthia yo-îîrî ya îema yathithîtue.

³⁰Îîu nayo yaarî mîînjîro înaana na ikinyithio îkûmi na bitantatû bia fetha, o Mwîînjîro ikinyithio biîrî biîrî.

³¹Ningî nî baathithîrie mîgaamba ya mîtî ya mîgaa, îtaano nîûntû bwa mîînjîro ya rûteere rûmwe rwa îema,

³²na îtaano îngî nîûntû bwa mîînjîro ya rûteere rûngî rwa îema, na îtaano îngî nîûntû bwa mîînjîro ya rûteere rwa rûgûrû rwa îema bwa nyuma.

³³Mûgaamba jûrîa jwagitanîtie îema gatîgatî kuuma mûthia jûmwe mwanka jûngî, jwagiitanîîrîîtie gatîgatî ka mîînjîro.

³⁴Nabo barereeria mîînjîro na thaabu na mîkang'i ya kûgwatîîra mîgaamba baramîthithia na thaabu, na mîgaamba nayo baramîereeria na thaabu.

³⁵Nabo barathithia nanga ya rangi ya wiirû bwa îgûrû na ya mûkû na întuune, îtumi bwega. Baragemia nanga îîu na mbicha cia kerubimu.

³⁶Naru rwambambio rûu bararûthithîria itugî bina bia mîgaa na barabiereeria na thaabu. Ningi barabithithîria ikinyithio bina bia fetha.

³⁷Tontû bwa mwari jwa îema nî baathithîrie nanga înthongi îtumi na mîtumi ya rangi ya wiirû bwa îgûrû na ya mûkû na întuune.

³⁸Nayo nanga îîu baramîthithîria itugî bitaano amwe na biango biaabio. Ningî barereeria mîthia ya îgûrû ya itugî biu amwe na tûmîkuurio twaabio na thaabu. Îndî ikinyithio biaabio biaarî bia îturutia.