Read KIMERU BIBLE PROTESTANT EDITION Kum 37 Bible Online

Kum 37 - KIMERU BIBLE PROTESTANT EDITION bible

Kum 37

¹Bezaleli nî aathithîrie Îthandûkû rîa kîrîkanîro na mbaaû cia mîgaa. Ithimi biaario biaarî ûraaja bwa centimita îgana na mîrongo îîrî na ithaano (125cm) na wariî bwa centimita mîrongo mûgwanja na ithaano (75cm) na gwitia bwa îgûrû centimita mîrongo mûgwanja na ithaano (75cm).

²Nawe ararîereeria na thaabu întheru oome na ndeene, na arathithia mûkûmo jwa thaabu kûrîthiûrûkîra.

³Arathithia mîkang'i îna ya thaabu nîûntû bwa mîthia yo-îna ya Îthandûkû rîu. Rûreere rûmwe rûreethîrwa rûrî na mîkang'i îîrî, na rûteere rûngî mîkang'i îîrî.

⁴Ningî arathithia mîgaamba ya mîtî ya mîgaa nawe aramîereeria na thaabu.

⁵Aratonyithia mîgaamba îîu mîkang'iine îrîa yaarî nteere cia îthandûkû nîkenda îtumagîrwa kûrîkamataga.

⁶Arathithia gîtî gîa Kîaao kîa thaabu întheru. Gîtî kîu gîa kîaao nakîo kîaarî kîa ûraaja bwa centimita îgana rîmwe rîa mîrongo îîrî na ithaano (125cm) na wariî bwa centimita mîrongo mûgwanja na ithaano (75cm).

⁷Aarathithia kerubimu ijîîrî cia thaabu împuure bwega araciîka nteere cio-ijîîrî cia gîtî gîa Kîaao.

⁸Kerubi îmwe yaakaraga rûteere rûmwe rwa gîtî gîa Kîaao na îngî îgakara rûteere rûngî. Nacio kerubimu iu ciathithîtue irî gîntû kîmwe na gîtî kîu gîa kîaao.

⁹Nacio kerubimu iu ciatambûrûkîtie mathagu jagakunîkîra gîtî gîa Kîaao. Nacio cieeki cierekanîrîte.

¹⁰Ningî Bezaleli nî aathithîrie meetha ya mbaaû cia mîgaa. Ithimi biaayo biaarî ûraaja bwa centimita îgana rîmwe (100cm) na wariî bwa centimita mîrongo îtaano (50cm) na gwitia bwa îgûrû centimita mîrongo mûgwanja na ithaano (75cm).

¹¹Nawe aramîereeria na thaabu întheru na arathithia mûkûmo kûmîthiûrûkîra.

¹²Arathithia rûbaû rwa wariî bwa ûmatu bwa centimita inyanya (8cm) kûthiûrûkîra meetha îîu, na arathithia mûkûmo jwa thaabu jwa kûthika rûbaû rûu.

¹³Arathithia mîkang'i îna ya thaabu nayo aramîgwatithanîria mîthieene yo-îna ya meetha arîa magûrû jaagwatithanîrîîtue nayo.

¹⁴Mîkang'i îîu ya gûtonyithagua mîgaamba ya gûkamata meetha yaarî rûteere rwa rûbaû rûu rwakunîki nî mûkûmo jwa thaabu.

¹⁵Nî aathithîrie mîgaamba ya mîtî ya mîgaa ya gûkamataga nayo meetha îîu. Nayo mîgaamba îîu aramîereeria na thaabu.

¹⁶Into biagûtumîrwa meetheene îîu arabithithia na thaabu întheru akî, nabio nî thaani, na ikombe nîûntû bwa Kîgongwana kîa ubaani, na mpakûri na itai bia gwîtûûrîria kîgongwana kîa gwîtûûrîria.

¹⁷Ningî nî aathithîrie gîtugî gîa kûrîkîîra taawa kîa thaabu întheru. Naju mûthîrî na gîkinyithio kîaaju biathithîtue na thaabu împûûre bwega. Najo maûa jarîa kîagemetue najo, na mpang'i ciakîo biathithîtue na gîntû kîmwe na gîtugî kîu.

¹⁸Nakîo gîtugî kîu gîa kûrîkîîra taawa kîaarî na mpang'i ithanthatû ciumîrîte nteere ciaakîo. O rûteere rûmwe rwa gîtugî kîu rwaarî na mpang'i ithatû-ithatû.

¹⁹O rwang'i kîrî iu ithanthatû rweethagîrwa rûrî na ikombe bithatû, bikari ta maûa jakunûki jakari ja mîtî îkarî ta mîkandamia. Maûa jau nî jaarî na karwang'i na kabûûra.

²⁰Gîtugîîne kîu gîa kûrîkîîra taawa kîongwa nî kwathithîtue maûa jana ja ikombe bikari ta maûa ja mîtî îkarî ta mîkandamia jarî na karwang'i na tûbûûra.

²¹Gîkombe kîmwe kîethagîrwa kîrî rungu rwa mpang'i ijîîrî-ijîîrî, na kîthithîtue na gîntû kîmwe nacio. Ûu nîu gwakari kîrî mpang'i iu ithanthatû.

²²Maûa jau ja ikombe na mpang'i ciaabio ciathithîtue irî gîntû kîmwe na gîtugî gîa taawa. Tontû bûû, kîonthe kîaarî kîa thaabu împûûre bwega.

²³Nawe arathithia taawa ciaakîo mûgwanja, na ntambi ciaakîo, na tûraî twaakîo na thaabu întheru.

²⁴Aathithîrie gîtugî kîu na into biaakîo bionthe na talanta îmwe ya thaabu întherû.

²⁵Bezaleli nî aathithîrie kîritîro kîa igongwana gîa kwîîthîria ubaani na mbaaû cia mîgaa. Ithimi biaakîo biaarî ûraaja bwa nusu mita (0.5m) na wariî bwa nusu mita (0.5m); kîng'aneene kûreea na kwarama. Gwitia bwa îgûrû kîaarî kîa mita îmwe (1m). Ngoji cia mîthia ciakîo ciathithîtue na gîntû kîmwe na kîritîro kîa igongwana.

²⁶Nakîo kîritîro kîa igongwana kîu arakîereeria na thaabu întheru; îgûrû rîaakîo, na nteere kunthe kûthiûrûkîra, na ngoji ciaakîo. Aracoka arakîthithîria mûkûmo jwa thaabu gûkîthiûrûkîra.

²⁷Arakîthithîria mîkang'i îîrî rungu rwa mûkûmo jûu nteere ijîîrî yerekanîrîte nîkenda îgwatagîîra mîgaamba ya gûgîkamata.

²⁸Arathithia mîgaamba ya mîtî ya mîgaa na aramîereeria na thaabu.

²⁹ Ningî nî aathithîrie maguta ja kwathûra na kûtheria antû najo, na maguta jamatheru ja ubaani întheru îrîa yeeraga bwega jathithîtue ta marashi.