Read KIMERU BIBLE PROTESTANT EDITION Kum 38 Bible Online

Kum 38 - KIMERU BIBLE PROTESTANT EDITION bible

Kum 38

¹Bezaleli nî aacokîre arathithia kîritîro kîa igongwana gîa kûritîra igongwana bia gwakîîria na mîtî ya mîgaa. Ithimi biaakîo biaarî ûraaja bwa mita ijîîrî na nusu (2.5m) na wariî bwa mita ijîîrî na nusu (2.5m), kîng'aneene ûraaja na wariî. Gwitia bwa îgûrû kîaarî kîa mita îmwe na nusu (1.5m).

²Ningî nî aathithîrie ngoji mîthieene yo-ina ya kîritîro kîa igongwana. Ngoji iu ciaakîo ciaathithîtue na gîntû kîmwe nakîo, na araciereeria na îturutia.

³Nî aathithîrie into bia gûtumîrwa kîritîro kîa igongwana bionthe; nyongû, na iciko na mpakûri, na nchibe, na tûraî. Into biu bia kîritîro kîa igongwana biathithîtue na îturutia.

⁴Ningî nî aathithîrie kîritîro kîa igongwana rûtara rwa îturutia, ararwîka rungu rwa mûkûmo jwaakîo, rûtara rûreethîrwa kwînama rumîte îgûrû mwanka gatîgatî ga kîritîro kîa igongwana.

⁵Mîthieene yo-îna ya rûtara rûu nî aathithîrie mîkang'i îna ya gûtonyithiûa mîgaamba.

⁶Arathithia mîgaamba ya mîtî ya mîgaa na aramîereeria na îturutia.

⁷Nayo mîgaamba îîu aramîtonyithîria mîkang'iine îrîa yaarî nteereene cia kîritîro kîa igongwana nîkenda gîkamatagwa nayo. Kîritîro kîa igongwana kîathithîtue na mbaaû na kîaarî na gîkurie.

⁸ Nî aathithîrie kîraî kîa îturutia na gîkinyithio gîaakio kîa îturutia, kuumanîa na iciicio bia aka barîa batumîkaga îemeene rîa gûtirimanîra.

⁹Nî aathithîrie kîarago. Rûteere rwa ûmotho rwathithîtue na nanga itumi bwega cia mita mîrongo îtaano (50m).

¹⁰Nabio itugî biaarî mîrongo îîrî na biathithîtue na îturutia nîûntû bwa rûteere rûu rwa ûmotho. Îndî biango bia itugî biu na tûrûkuurio twaabio biathithîtue na fetha.

¹¹Nîûntû bwa rûteere rwa ûrîo rûrîa rwaarî na ûraaja bwa mita mîrongo îtaano (50m) nî aathithîrie itugî mîrongo îîrî na ikinyithio biaabio mîrongo îîrî bia îturutia. Îndî biango bia itugî na tûrûkuurio twaabio biathithîtue na fetha.

¹²Naru rûteere rwa rûgûrû nî rwaarî na nanga cia gûcuurua cia mita mîrongo îîrî na ithaano (25m) na itugî îkûmi, na ikinyithio îkûmi. Nabio biango bia itugî biu na tûrûkuurio twaabio biathithîtue na fetha.

¹³Naru rûteere rwa gaiti, ntûrîro ya kîarago kwaarî mita mîrongo îîrî na îthaano (25m).

¹⁴Nacio nanga cia rûteere rûmwe rwa mpingîro ciaarî cia mita mûgwanja na nusu (7.5m) na itugî bithatû, na ikinyithio bithatû.

¹⁵Ûu nîu rûteere rûngî rwa mpingîro ya kîarago bwa ûmotho na bwa ûrîo. O rûteere gwacuurîîtue nanga cia mita mûgwanja na nusu (7.5m) na itugî bithatû na ikinyithio bithatû.

¹⁶Nacio nanga cionthe irîa ciacuurîtue kîaragoone ciaarî cia gîtambaa gîtumi bwega mono.

¹⁷Nabio ikinyithio bia itugî biaarî bia îturutia, îndî biango bia itugî na turukuurio twaabio biathithîtue na fetha. Biûmbwa birîa biaarî îgûrû rîa itugî bierereetue na fetha na itugî bionthe bia kîarago biagwatithanîtue na tûrûkuurio twa fetha.

¹⁸Nayo nanga îrîa yaingaga mpingîro ya kîarago yatumi na mîtumi bwega na mîrigi ya rangi ya wiirû bwa îgûrû na ya mûkû na întuune. Nayo yaarî na ûraaja bwa mita îkûmi (10m) na mita ijîîrî na nusu (2.5m) gwitia bwa îgûrû kunthe kûthiûrûkîra, kûringana na ûrîa nanga irîa ciacuurîtue kîaragoone ciaakari.

¹⁹Nabio itugî bia nanga îîu biaarî bina, na ikinyithio biaabio bina biathithîtue na îturutia, nabio biango biaarî bia fetha, na biûmbwa birîa biaarî îgûrû itugîîne bierereetue na fetha, na itugî biagwatithenue na tûrûkuurio twa fetha.

²⁰Nabio biango bia kîarago bionthe bia îema rîa gûtirimanîra kûthiûrûkîra biaarî bia îturutia.

²¹Into bibi bikagwetwa nîbio biatumîkîre kîrî gwaka îema rîa gûtirimanîra, o ta ûrîa biatari maathaneene ja Musa, nîûntû bwa ngûgî ya Alawi batongeeretue nî Ithamari mûtaana wa mûthînjîri-Mûrungu Aaroni.

²²Bezaleli mûtaana wa Uri, Uri mûtaana wa Huri wa mwîrîga jwa Juda, nîwe wathithîrie into bionthe birîa MWATHANI eerîrîte Musa.

²³Ûrîa waamûteethagîîria aarî Oholiabu mûtaana wa Ahisamaki kuuma mwîrîgeene jwa Dani, Oholiabu aarî mûtea ûmûnene na mûbangi mîthithîrie ya into, na mûtumi nguû injega na mûtumi agîtumagîra rangi cia wiirû bwa îgûrû, na mûkû na întuune.

²⁴Nayo thaabu yonthe îrîa yaatumîkîre mwakoone junthe jwa kîrombero, yaarî talanta mîrongo îîrî na kenda cia thaabu îrîa yariti îrî biewa, na shekeli magana mûgwanja ja mîrongo îthatû kûringana na kîthimi kîa shekeli gîa kîrombero.

²⁵ Nayo fetha îrîa yaumîte kîrî kîûthûrano kîa antû barîa baatarîtwe ûtarine yaarî talanta îgana, na shekeli ngiri îmwe magana mûgwanja ja mîrongo mûgwanja na ithaano kûringana na kîthimi kîa shekeli gîa kîrombero.

²⁶ O muntû wonthe ûrîa waatarîîtwe ûtarine wa mîaka mîrongo îîrî na nkûrûki nî aarîaga nusu shekeli kana beka îmwe kûringana na kîthimi gîa shekeli gîa kîrombero. Nabo antû barîa baaritîre nî antû ngiri magana jatantatû ja ithatû, na magana jataano ja mîrongo îtaano.

²⁷Talanta iu îgana rîmwe cia fetha nîcio ciatûmîîrwe kûthithia ikinyithio bia kîrombero, na ikinyithio bia itugî bia gûcuuria nanga. Nabio biathithîrue ikinyithio îgana rîmwe, o talanta îmwe ya fetha îkathithia gîkinyithio kîmwe.

²⁸Nî aathithîrie biango nîûntû bwa itugî na eereeria biûmbwa biaabio na tûrûkuurio twaabio bagîtumagîra fetha îîu yaarî shekeli ngiri îmwe ya magana mûgwanja ja mîrongo mûgwanja na ithaano.

²⁹Narîo îturutia rîrîa rîaritîîtwe rîaarî talanta mîrongo mûgwanja na shekeli ngiri ijîîrî cia magana jana.

³⁰Îturutia rîu nîrîo rîatumîîrwe kûthithia ikinyithio bia mwari jwa îema rîa gûtirimanîra, na kîritîro kîa igongwana kîrîa gîa îturutia, na rûtara rwaakîo rwa îturutia, na into bionthe bia kîritîro kîa igongwana,

³¹na ikinyithio bionthe bia kîarago kîrîa kîathiûrûkîrîte îema, na ikinyithio bia mpingîro ya kîarago, na biango bionthe bia îema rîa gûtirimanîra, na bia kîarago kîrîa kîathiûrûkîrîte îema.