Read KIMERU BIBLE PROTESTANT EDITION Kum 4 Bible Online

Kum 4 - KIMERU BIBLE PROTESTANT EDITION bible

Kum 4

¹Musa nî aacokerie arauga, “Atîrî, batîmbîtîkia kana banthikîîra nîûntû bakauga, ‘MWATHANI atîcionanîtie kîrî gwe.’”

²MWATHANI aramwîra, “Nîmbi îîu ûgwete njareene yaaku?” Musa arauga, “Nî rûturo.”

³MWATHANI aramwîra, “Rûgere nthîgûrû.” Musa ararûgera nthîgûrû, naru rûraa njoka; na Musa aramatûka kuuma kîrî yo.

⁴Îndî MWATHANI aramwîra, “Tambûrûkia njara ûmîgwate kînyiritha.” Tontû bûû, aratambûrûkia njara aramîgwata, nayo îraa rûturo njareene yaawe.

⁵MWATHANI aramwîra, “Ringa kîama gîkî nîkenda beetîkîa atî MWATHANI Mûrungu wa biûjûjû biaao, Mûrungu wa Abrahamu, Mûrungu wa Isaaka, na Mûrungu wa Jakubu nî acionanîtie kîrî gwe.”

⁶MWATHANI aramwîra kaîrî, “Tonyithia njara yaaku ûtonge kîbara.” Nawe aratonyithia njara yaawe na aratonga kîbara na rîrîa aamîritîre, nî yagwati nî mûtigiri na yaarî înjerû o ta nkamia.

⁷Rîu Mûrungu aramwîra, “Cokia njara yaaku ûtonge kîbara.” Nawe aracokia njara yaawe na aratonga kîbara. Rîrîa aamîritîre ku nî yaarî îgûkara ûmwe na mwîrî jûngî.

⁸MWATHANI arauga, “Bakëeja kûrega gûkwîtîkia na bakarega gûtindanîra na kîama kîa mbere, bageetîkia kîama rîa jaîrî.

⁹Bakëeja kûrega gwîtîkia kinya biama biu bio biîrî kana bagwîtikia, taa rûûjî mûuroone jwa Naili na ûrwîtûûre nthîgûrû. Rûûjî rûu rûkaagarûka rwee tharike.”

¹⁰Îndî Musa nî eerîre MWATHANI atîrî, “Itû MWATHANI waakwa ntîûmbaga kwaria bwega kuuma tene na kinya nandî ûkûmbarîria ni nthûûmba yaaku. Ni mbaragia na kîûtû.”

¹¹Rîu MWATHANI aramûûria atîrî, “Nûû woombîre kanyua ka muntû? Nûû ûtûmaga muntû aremwa kwaria, kana aremwa kwigua kana oona kana aa mûtumuumu? Anga tî ni, MWATHANI?

¹²Rîu rî îta, naani nkethagîrwa ndî amwe naagwe na ûkîaria ngakûritanaga jarîa ûkaugaga.”

¹³Îndî Musa arauga, “Itû MWATHANI ndakwerenca tûma muntû ûngî.”

¹⁴MWATHANI arathûûra mono nî Musa arauga, “Ka Aaroni mûtaana wa nyakwe ûrîa Mûlawi atî o? Nî mbijî nî aaragia bwega. Nî eejîte gûcemania naagwe na rîrîa agakwona akagwîrua nkoroone.

¹⁵Naagwe ûmûtarîîrîe nteto irîa akaaria, naani nkethagîrwa ndî amwe naagwe ûkîaria. Nkethagîrwa ndî amwe nawe akîaria na nkabûritanaga jarîa bûkathithagia.

¹⁶Aaroni akaaria antûûne aaku kîrî antû, nawe aee ta kanyua gaaku naagwe wee ta Mûrungu waawe.

¹⁷Naagwe ûgakamataga rûturo rûrû, na nîru ûkaringaga biama naru.”

¹⁸Musa nî aacokere kîrî mûthoni waawe Jethro aramwîra ûjû, “Ndakwerenca ûndekeerie ncoke kîrî antû beetû Misri nkoone këethîra barî mwoyo.” Jethro areera Musa atîrî, “Îta na thîîria.”

¹⁹Rîrîa Musa aarî Midiani, MWATHANI nî aamwîrîre atîrî, “Coka Misri; nîûntû antû bonthe barîa baacwaga gûkûûraga nî bakuîte.”

²⁰Tontû bûû, Musa arajûkia mwekûrû waawe na ataana baawe arabaitithia ntigiriine na aracoka nthîgûrûûne ya Misri. Musa nî aakamatîre rûturo rwa Mûrungu na njara.

²¹MWATHANI nî eerîre Musa atîrî, “Rîrîa ûgaacoka Misri, no mwana ûringe biama birîa bionthe nkweete inya ya kûringa ûrî mbere ya Farao. Îndî nkoomia nkoro yaawe, nîkenda atîkarekeerie antû beeta.

²²Naagwe ûkeera Farao, ‘MWATHANI ariuga ûjû: Israeli nî mûtaana waakwa wa kîranga.’

²³ Ûûmwîre, ‘Rekeeria mûtaana waakwa eete agantumîkîre, na ûkëeja kûmûgiria eeta, nkooraga mûtaana waaku wa kîranga.’”

²⁴Antû amwe kwararagwa njîreene ya gwîta Misri MWATHANI nî atirimanîre na Musa na areenda kûmûûraga.

²⁵Rîu Zipora arajûkia iiga rîrîûgî na arataana mûtaana waawe na araringithia Musa gatîgatî ka magûrû na gîkonde kîu na arauga, “Ûûgwe ûrî mûkûrû waakwa wa tharike.”

²⁶Tontû bûû, MWATHANI aratigana na Musa. Rîu Zipora nî aarî akuuga, “Gwe ûrî mûkûrû waakwa wa tharike,” nîûntû bwa rûtaano.

²⁷MWATHANI nî eerîre Aaroni atîrî, “Îta rwanda ûgatirimane na Musa.” Aaroni areeta aramûtirima Kîrîmeene kîa Mûrungu na aramûncûnca.

²⁸Musa areera Aaroni nteto cionthe îrîa MWATHANI aamûtûmîte nacio na mantû jegiî biama bionthe birîa aamwîrîte aringe.

²⁹Rîu Musa na Aaroni bareeta na baroothûrania akûrû barîa atongeeria ba antû ba Israeli.

³⁰Aaroni arabeera nteto cionthe irîa MWATHANI aarî akwaarîria Musa na Musa araringa biama antû bonthe bakîonaga.

³¹Antû bareetîkia, rîrîa baigîrue atî MWATHANI nî ariûngîrîte antû ba Israeli na atî nî oonete mîthangîko yaao, bareenîka mîtwe yaao na baramûthaathayia.