Read KIMERU BIBLE PROTESTANT EDITION Kum 40 Bible Online

Kum 40 - KIMERU BIBLE PROTESTANT EDITION bible

Kum 40

¹MWATHANI nî eerîre Musa atîrî,

²“Ntukû ya mbere mweriine jwa mbere nîrîo bûkarûngîka îema rîa gûtirimanîra.

³Bwîîke Îthandûkû rîa kîrîkanîro ku ndeene, na îthandûkû rîu bûrîkunîkîre na rwambambio.

⁴Nayo meetha bûmîkûrûkie ndeene na into biaayo bûbiîke bwega meetheene. Bûkûrûkie gîtugî gîa kûrîkîîrwa taawa amwe na tawe ciaakîo.

⁵Nakîo kîritîro kîa igongwana kîrîa kîa thaabu gîa kûritîra igongwana bia ubaani bûgîîke mbere ya Îthandûkû rîa kîrîkanîro na bwîîkîre rwambambio rwa gûkunîka mwari jwa îema rîa gûtirimanîra.

⁶Nakîo kîritîro kîa igongwana bia gwakîîria no mwanka bûgîîke mbere ya mwari jwa îema rîa gûtirimanîra.

⁷Nakîo kîraî bûgîîke gatîgatî ka îema rîa gûtirimanîra na kîritîro kîa igongwana, na bwîkîre rûûjî kîraîîne kîu.

⁸Naabuî bûthithie kîarago kûthiûrûkîra îema na bûkunîke mpingîro yaakio na rwambambio.

⁹“Rîu, nîrîo naagwe ûkaajûkia maguta ja kûtheria na kwathûra, wîîtûûrîrie îema rîa gûtirimanîra, na bionthe birîa birî ku ûkîtherie na gûkîathûra o amwe na into bia mîtî bionthe biaakio. Narîo îema rîu rîa gûtirimanîra rîkaa rîrîtheru.

¹⁰Ûgatûûrîria maguta jau kîrî kîritîro kîa igongwana gîa kûritîra igongwana bia gwakîîria na into biaakîo bionthe ûbiathûre na ûbitherie. Nakîo kîritîro kîa igongwana kîu gîkaa gîkîtheru buru.

¹¹Wîîtûûre maguta kîrî kîraî kîrîa na gîkinyithio gîaakîo ûkîtherie na ûkîathûre.

¹²Rîu nîrîo ûkareeta Aaroni na ataana baawe mwariine jwa îema rîa gûtirimanîra ûbathaambie na rûûjî,

¹³na wîkîre Aaroni nguû irîa ntheru, na ûmwîtûûrîrie maguta ûmûtherie na ûmwathûre nîkenda antumîkagîra arî mûthînjîri-Mûrungu.

¹⁴Kinya ataana baawe ûbareete ûbeekîre kanjû,

¹⁵ningî ûbeetûûrîrie maguta ûbatherie na ûbaathûre o ta ûrîa wathithîria îthe, nîkenda bantûmîkagîra barî athînjîri-Mûrungu. Naku gwîîtûûrîrua maguta kûu nîku gûkabeetikîîria kwaa athînjîri-Mûrungu amwe na nchiarwa ciaao rîonthe na nthukîîne cionthe.”

¹⁶Ûu nîu Musa aathithîrie, kûringana na jarîa MWATHANI aamwîrîte.

¹⁷Tontû bûû, ntukû ya mbere ya mweri jwa mbere jwa mwaka jwa îîrî nîrîo îema rîa gûtirimanîra rîarûngîkîrwe.

¹⁸Musa nîwe waarîrûngîkîre; ararikia ikinyithio biaarîo na areenjîra mîînjîro yaarîo, na mîgaamba yaarîo aramîîkîra na kûrûngîka itugî biaarîo.

¹⁹Aratambûrûkia îema îgûrû rîa kîrombero kîu, na mîgûûta îrîa yaarî ya kûrîkunîkîra aramîrîkîîra îgûrû rîaarîo, o ta ûrîa MWATHANI aamwîrîte.

²⁰Arajûkia maiga jarîa ja maathana arajeekîra îthandûkûûne. Areekîra mîgaamba mîkang'iine ya îthandûkû na aracoka ararekîîra gîtî gîa Kîaao îgûrû rîaarîo.

²¹Nawe arakûrûkia Îthandûkû rîa kîrîkanîro îemeene, na aracuuria rwambambio au mbere yaarîo ararîthiîka, o ta ûrîa MWATHANI aamwîrîte.

²²Areeka meetha îemeene rîa gûtirimanîra rûteere rwa ûrîo na oome ya rwambambio rûu.

²³Areeka mîgaate îrîa îritîri MWATHANI îgûrû rîa meetha, o ta ûrîa MWATHANI aamwîrîte.

²⁴Areeka gîtugî gîa kûrîkîîra taawa rûteere rwa ûmotho îemeene rîa gûtirimanîra kîerekanîrîte na meetha îîu.

²⁵Nawe aragwatia taawa au mbere ya MWATHANI o ta ûrîa MWATHANI aamwîrîte.

²⁶Au mbere ya rwambambio îemeene rîa gûtirimanîra ndeene, Musa nî eekîre kîritîro kîa igongwana kîrîa kîa thaabu o,

²⁷na araîîthîîria ubaani o kûringana na ûrîa MWATHANI aamwîrîte.

²⁸Ningî aracuuria rwambambio mwariine jwa îema rîa gûtirimanîra.

²⁹Au oome ya mwari jwa îema rîa gûtirimanîra areeka kîritîro kîa igongwana gîa kûritîra igongwana bia gwakîîria o. Nî aaritîîre kîgongwana gîa gwakîîria na kîa irio îgûrû rîaakîo ta ûrîa MWATHANI aamwîrîte.

³⁰Gatîgatî ka îema rîa gûtirimanîra na kîritîro kîa igongwana kîu areeka kîraî o na areekîra rûûjî rwa kûthaamba kû.

³¹Au nîo Musa na Aaroni na ataana ba Aaroni baathaambaga njara na magûrû.

³²Nabo baathaambaga rîrîa bagûkûrûka îemeene rîa gûtirimanîra na rîrîa bagûkueria kîritîro kîa igongwana o ta ûrîa MWATHANI eerîte Musa.

³³Musa nî airigîîre kîarago kûthiûrûkîra îema rîa gûtirimanîra na kîritîro kîa igongwana. Ningî aracuuria nanga mpingîroone ya kîarago. Tontû bûû, Musa ararîîkia ngûgî îîu.

³⁴ Nîrîo îtu rîakunîkîre îema rîa gûtirimanîra na weerû bwa ûkumio bwa MWATHANI bûroojûra îemeene.

³⁵Musa atoombîre gûtonya îemeene rîa gûtirimanîra tontû îtu nî rîarîkunîkîte na weerû bwa ûkumio bwa MWATHANI bwojûra îemeene.

³⁶Antû ba Israeli, rûgendoone rwaao runthe, baakamataga îema rîa gûtirimanîra bagîîta rîrîa akî îtu rîu rîatiga gûkunîka îema.

³⁷Nabo antû ba Israeli batîngîûmba gwîta bauma antû au mwanka ntukû îrîa îtu rîu rîkauma îemeene.

³⁸Narîo îtu rîu rîa MWATHANI nî rîakaranagia nabo rûgendoone rwaao runthe rîgîkunîkaga îema rîa gûtirimanîra mûthenya, na ûtukû nî mwanki jwakunîkaga îema rîa gûtirimanîra. Îtu na mwanki jûu nî bionagwa nî antû ba Israeli bonthe.