Read KIMERU BIBLE PROTESTANT EDITION Kum 5 Bible Online

Kum 5 - KIMERU BIBLE PROTESTANT EDITION bible

Kum 5

¹Nyumeene Musa na Aaroni nî beetîre kîrî Farao bamwîra, “MWATHANI Mûrungu wa Israeli ariuga ûjû, ‘Rekeeria antû baakwa beete bakathithie kîatho nîûntû bwaakwa rwanda.’”

²Îndî Farao arabooria, “Nîka MWATHANI arî ûû, nîkenda nthikîîra ûrîa akuuga na ndekeeria Aisraeli beeta? Ntiijî MWATHANI, na ntîrekeeria Aisraeli beeta.”

³Nabo baramwîra, “Mûrungu wa Ahibirania nî athirîtie gûtirimana naatuî. Twakûromba tûrekeerie twîte rûgendo rwa ntukû ithatû rwanda tûkaaritîre MWATHANI Mûrungu weetû kîgongwana, atîkeeje gûtûthiria na mîrimo kana ndwaa.”

⁴Îndî mûnene wa Misri areera Musa na Aaroni, “Nîkî bûkûrita antû ngûgîîne yaao? Cokeeni ngûgîîne cieenu.”

⁵Farao areeta mbere kuuga atîrî, “Nandî antû beenu nî baingîîte, naabuî nîka bûkûbaremia batigana na ngûgî ciaao.”

⁶Ntukû o îîu Farao nî eerîre arûngamîîri ba antû na aritithia-ngûgî atîrî,

⁷“Bûkanenkereni antû rûûa rwa kûûmba maturubarî kaîrî ta ûrîa bûrathithagia. Nî beetage bagaciûthûranîrie rûûa bongwa.

⁸Îndî maturubarî o jarîa baratwîre kûûmba nîo jo bûkabeera boombe na bûkajataûrataûra. Kwîthîrwa batî na ngûgî îng'ani ya kûrîta nîkîo gîgûtûma bandîrîra bakiugaga, ‘Tûrekeerie twîte tûkaritîre Mûrungu weetû kîgongwana.’

⁹Antû baba nî boongeerwe ngûgî indito nîkenda banoga baremwa kûthikîîra nteto cia ûrongo.”

¹⁰Tontû bûû, arûngamîîri na aritithia-ngûgî baraumagara bareeta bareera antû atîrî, “Farao auga ûjû; ‘Ntîbûnenkera rûûa.

¹¹Bûgeetaga guicwîra rûûa o kûrîa bûkaarwona. Îndî ngûgî yeenu nayo îtînyiua kinya aniini.’”

¹²Rîu antû baranyagania kunthe nthîgûrûûne yonthe ya Misri kûûthûrania rûûa rwa gûtumîra.

¹³Arûngamîîri nî babeengaîngaga bakiugaga, “Thirieni ngûgî yeenu ya o ntukû, ta rîrîa bûranenkagîrwa rûûa.”

¹⁴Arûngamîîri Amisri barîa baagaîra Aisraeli ngûgî nî baaûrîre aritithia-ngûgî Aisraeli barîa beekîte barûngamîîra ngûgî bakîbooragia, “Nîkî bûtîrathirîrie ngûgî yeenu ya îgoro na ya naarua ta ûrîa bûtwîre kûthithia o ntukû o ntukû?”

¹⁵Rîu aritithia-ngûgî Aisraeli bareeta kîrî Farao na baramûrîrîra bakîûragia, “Nîkî ûkûthithîria nthûûmba ciaaku mantû jaja?

¹⁶Gûtî rûûa nthûûmba ciaaku ikûnenkerwa, îndî no bagûtwîra, ‘Ûûmbeni maturubarî!’ Ningî nthûûmba ciaaku nî ikûûrwa; îndî antû baaku nîbo barî na maatia.”

¹⁷Îndî nawe arabeera, “Bûrî ithao, bûrî ithao! Nîkîo gîgûtûma buuga, ‘Tûrekeerie tûkaritîre MWATHANI weetû kîgongwana.’

¹⁸Îteeni nandî bûkarite ngûgî, nîkwîthîrwa gûtî rûûa bûkanenkerwa, îndî bûkoombaga maturubarî jang'ana o ta jarîa bûroombaga.”

¹⁹Rîu nîrîo aritithia-ngûgî Aisraeli boonere atî barî thîîneene rîrîa beerîrwe “Gûtîûmbîka banyianyiîrua maturubarî jarîa bakombaga o ntukû.”

²⁰Bakiuma kwa Farao, bareethîra Musa na Aaroni babetereete.

²¹Bareera Musa na Aaroni atîrî, “MWATHANI nî ooneete jarîa bûthithîtie na akabûkanûkia nîûntû bûgûtûma twaa babathûûku kîrî Farao na nchaama ciaawe. Ningî bwatûma boona ûntû bwa kwîgwatia nîkenda batûûraga.”

²²Rîu Musa aragarûkîîra MWATHANI aramwîra, “Itû MWATHANI nîkî ûthithîrîtie antû baba ûthûûku? Nîmbi yatûmîre ûntûma?

²³Nîkwîthîrwa kuuma rîrîa ndeejîre kîrî Farao kwaria nawe riîtweene rîaaku, nî athithîrîtie antû baba ûthûûku, îndî gwe ûtaatunyûkia antû baaku.”