Read KIMERU BIBLE PROTESTANT EDITION Kum 6 Bible Online

Kum 6 - KIMERU BIBLE PROTESTANT EDITION bible

Kum 6

¹MWATHANI nî eerîre Musa atîrî, “Nandî ûkoona mantû jarîa nkaathithîria Farao. Ngatumîra inya nîkenda abarekeeria na ntumîre inya kûmûkinyîîria abeenge kuuma nthîgûrûûne yaawe.”

² Mûrungu nî aarîîrie Musa aramwîra atîrî, “Nî ni MWATHANI.

³Nî ndaacionanîrie kîrî Abrahamu, na kîrî Isaaka, na kîrî Jakubu ja Mûrungu Mweneinya yonthe, îndî ntaimenyithanîrie kîrî bo mbeera mbîtagwa MWATHANI.

⁴Ningî nî ndeekîre kîrîkanîro nabo atî nkabaa nthîgûrû ya Kanaani, nthîgûrû îrîa baatûûraga barî ageni.

⁵Ningî nî nthirîtie kwigua gûkaya kwa antû ba Israeli barîa Amisri baethetie nkombo na ndaririkana kîrîkanîro gîaakwa.

⁶Tontû bûû, îîra antû ba Israeli, ‘Nî ni MWATHANI, na nkaabwonokia na mbûtunyûkie kuuma ûkomboone bwa Amisri. Ngatumîra njara yaakwa îrîa îrî na inya kûbûkûûra na mbakanûkie ngîtumagîra biama bibinene.

⁷Nkaabûjûkia bwee antû baakwa na naani mpee Mûrungu weenu. Bûkaamenya atî nî ni MWATHANI Mûrungu weenu ûrîa waabûkûrîre kuuma ûkomboone bwa Amisri.

⁸Nkaabwikia nthîgûrûûne îrîa ndaaciîtîrie atî nkanenkera Abrahamu, na Isaaka na Jakubu. Nkabûnenkera yo yee yeenu. Nî ni MWATHANI!’”

⁹Musa nawe nî eerîre antû ba Israeli mantû jau îndî bataamûthikîrîîre, nîûntû nkoro ciaao nî ciathiri inya nîûntû bwa ûrîa baathangîkîtue barî ûkomboone.

¹⁰MWATHANI nî eerîre Musa atîrî,

¹¹“Îta kîrî Farao mûnene wa Misri ûmwîre arekeerie antû ba Israeli baume nthîgûrûûne yaawe.”

¹²Îndî Musa aracokeria MWATHANI aramwîra, “Këethîra antû ba Israeli nî baregeete kûnthikîîra rî, nîatîa Farao akanthikîîra? Ûûni ndî ûû, muntû ûtîûmbaga kwaria bwega?”

¹³MWATHANI araarîria Musa na Aaroni arabeera ûrîa bakeera antû ba Israeli na ûrîa bakeera Farao mûnene wa Misri nîkenda barita antû ba Israeli kuuma nthîgûrûûne ya Misri.

¹⁴Baba nîbo atongeeria mîciî ya antû ba Israeli: Ataana ba Rubeni, ûrîa mwana wa kîranga wa Jakubu: Hanoki, na Palu, na Hezironi, na Karami. Iu nîcio nja cia Rubeni.

¹⁵Ataana ba Simioni baarî, Jemueli, na Jamini, na Ohadi, Jakini, na Zohari, na Shaulu, ûrîa waarî mûtaana wa mûka Mûkanaani. Iu nîcio nja cia Simioni.

¹⁶ Jaja nîjo mariîtwa ja ataana ba Lawi kûringana na nthukî ciaao ta cio; Gerishoni, na Kohathi, na Merari. Lawi aatûûrîre mîaka îgana rîa mîrongo îthatû na mûgwanja (137).

¹⁷Ataana ba Gerishoni baarî, Libini na Shimei na nja ciaao.

¹⁸Ataana ba Kohathi baarî, Amuramu, na Izihari, na Heburoni na Uzieli. Kohathi aatûûrîre mîaka îgana rîa mîrongo îthatû na îthatû (133).

¹⁹Ataana ba Merari baarî, Mahili na Mushi. Îîu nîyo mîciî ya Alawi kûringana na nthukî ciaao.

²⁰Amuramu nawe nî aajûkîrie mûka weetagwa Jokebedi, mwarî wa ng'ina wa îthe. Jokebedi aramûciarîra Aaroni na Musa. Amuramu aatûûrîre mîaka îgana rîa mîrongo îthatû na mûgwanja (137).

²¹Ataana ba Izihari baarî, Kora, na Nefegi, na Zikiri.

²²Nabo ataana ba Uzieli baarî, Mishaeli, na Elizafani, na Sithiri.

²³Aaroni nî aajûkîrie mwekûrû weetagwa Elisheba mwarî wa Aminadabu, nawe Elisheba aarî mwarî wa ng'ina wa Nahashoni. Elisheba nî aamûciarîre Nadabu, na Abihu, na Eleazari, na Ithamari.

²⁴Nabo ataana ba Kora baarî, Asiri, na Elikana, na Abiasafu. Îîu nîyo mîciî ya antû ba Kora.

²⁵Eleazari mûtaana wa Aaroni nî aajûkîrie mwekûrû, ûmwe wa aarî ba Putieli. Aramûciarîra Fineasi. Bau nîbo atongeeria ba mîciî ya Alawi na nja ciaao.

²⁶Aaroni na Musa nîbo barîa MWATHANI eerîre atîrî, “Riteeni antû bonthe ba Israeli kuuma nthîgûrû ya Misri.”

²⁷Musa na Aaroni noo bo baarîîrie Farao mûnene wa Misri nteto ciegiî kûrita antû ba Israeli kuuma Misri.

²⁸Rîrîa MWATHANI aarîîrie Musa arî nthîgûrû ya Misri

²⁹nî aamwîrîre atîrî, “Ni nî ni MWATHANI. Îîra Farao mûnene wa Misri jarîa jonthe ngûkwîra.”

³⁰Îndî Musa areera MWATHANI Atîrî, “Nî wiijî ntîûmbaga kwaria bwega, nîatîa îndî Farao akaanthikîîra?”