Read KIMERU BIBLE PROTESTANT EDITION Kum 7 Bible Online

Kum 7 - KIMERU BIBLE PROTESTANT EDITION bible

Kum 7

¹MWATHANI nî eerîre Musa atîrî, “Ngaakwethia ta Mûrungu kîrî Farao, na mûtaana wa nyakwe Aaroni akaa kîroria gîaaku.

²Ûkauga jonthe jarîa ngaakwîra; na mûtaana wa nyakwe Aaroni akeera Farao arekeerie antû ba Israeli baume nthîgûrûûne yaawe.

³ Îndî nkoomagaria nkoro ya Farao na ndinge biama bibingî na nthithie mantû jamathûûku jakûrigaria, nthîgûrûûne ya Misri,

⁴Îndî atîbûthikîîra. Rîu ngaakanûkia Misri na nkûûre njûûrî ciaakwa, antû baakwa tabo Aisraeli, kuuma nthîgûrû ya Misri na nthithie mantû jamanene jamathûûku ja kûbakanûkia.

⁵Antû ba Misri bakaamenya atî nî ni MWATHANI rîrîa ngaakanûkia nthîgûrû ya Misri na mbonokie antû ba Israeli kuuma kîrî bo.”

⁶Musa na Aaroni barathithia o ûrîa MWATHANI aabeerîte.

⁷Musa aarî na ûkûrû bwa mîaka mîrongo înaana (80) na Aaroni aarî na ûkûrû bwa mîaka mîrongo înaana na îthatû (83) rîrîa baarîîrie Farao.

⁸MWATHANI nî eerîre Musa na Aaroni atîrî,

⁹“Rîrîa Farao akaabwîra bûringe kîama kîeenu, rîu wîre Aaroni atîrî, ‘Jûkia rûturo rwaaku ûrûgere nthî mbere ya Farao, naru rûkaa njoka.’”

¹⁰Tontû bûû, Musa na Aaroni bareeta kîrî Farao nabo barathithia o ta ûrîa MWATHANI aabeerîte. Aaroni aragera rûturo rwaawe nthî mbere ya Farao na nchaama ciaawe, na rûraa njoka.

¹¹Rîu Farao nî oothûranirie antû barîa boome, na arogi na kinya aringi-biama ba Misri barathithia mantû ta jau bagîtumagîra inya yaao ya witho.

¹²Bonthe baragera nturo ciaao nthî na nturo iu iraa njoka. Îndî rûturo rwa Aaroni rûraimeria cionthe.

¹³Amwe na jau nkoro ya Farao nî yoomagari na ataabathikîîra o ta ûrîa MWATHANI augîîte.

¹⁴Rîu nîrîo MWATHANI eerîre Musa atîrî, “Farao nî oomîtie nkoro na atîkwenda kûrekeeria antû beeta.

¹⁵Rooka kîrî Farao rûkîîrî, nawe rî, akeethîrwa eetîte rûûjîîne. Naagwe ûmweteere rûteere rwa rûûjî ûgweete rûturo rûrîa rûraeete njoka na njara ciaaku.”

¹⁶Ûmwîre, “MWATHANI Mûrungu wa Ahibirania nî aantûmîre kîrî gwe akiugaga ûjû, ‘Rekeeria antû baakwa beete, bagaantumîkîre rwanda.’ Îndî gwe mwanka nandî ûtîretîkîîria.

¹⁷ “Nandî MWATHANI ariuga ûjû, Bûbû bûgatûma ûmenya atî nî ni MWATHANI. Ndîringa rûûjî rwa Naili na rûturo rûrîa rûrî njareene ciaakwa, na rûûjî rûgarûke rwee tharike.

¹⁸Makûyû jarîa jarî Naili jagaakua, na Naili înunke na Amisri baremwe kûnyua rûûjî rwaayo.”

¹⁹Rîu MWATHANI areera Musa, “Îîra Aaroni ûjû, ‘Jûkia rûturo rwaaku na ûtaambûrûkie njara yaaku îgûrû rîa rûûjî runthe Misri: îgûrû rîa ndûûjî ciaao, na îgûrû rîa tûrûûjî twaao, na îgûrû rîa tûria twaao, bionthe bikaa tharike. Gûkeethîrwa kûrî na tharike kûnthe nthîgûrûûne ya Misri, kinya rûûjîîne rûrîa beekîte intoone bithithitue na mîtî na kinya rûrîa rûrî kîrî birîa biaji maigeene.’”

²⁰Musa na Aaroni nî baathithîrie o ta ûrîa MWATHANI augîîte. Aaroni nî ookîrîrie rûturo araringa rûûjî rwa Naili Farao na nchaama ciaawe bakîonaga na rûûjî runthe rûragarûka rûraa tharike.

²¹Makûyû jarîa jaarî mûuroone jwa Naili jarakua, na rûûjî rûranuunka, mwanka Amisri bararemwa kûrûnyua. Kûreethîrwa kûrî na tharike kunthe nthîgûrûûne ya Misri.

²²Îndî aringi-biama ba Misri kinya bo barathitha mantû o ta jau bagîtumagîra inya yaao ya witho. Farao areeta na mbere kûûmia nkoro na ararega kûthikîîra Musa na Aaroni o ta ûrîa MWATHANI augîîte.

²³Farao aragarûka arakûrûka nyomba yaawe na mantû jau kinya jo jataamûmakîrie.

²⁴Antû ba Misri bareenja nteere cia Naili nîkenda boona rûûjî rwa kûnyua, nîkwîthîrwa batîngînyua rûûjî rwa Naili.

²⁵Ntukû mûgwanja nî ciathirîre kuuma MWATHANI akûringa Naili.