Read KIMERU BIBLE PROTESTANT EDITION Kum 9 Bible Online

Kum 9 - KIMERU BIBLE PROTESTANT EDITION bible

Kum 9

¹MWATHANI nî eerîre Musa atîrî, “Îta kîrî Farao ûmwîre MWATHANI Mûrungu wa Ahibirania ariuga ûjû, ‘Rekeeria antû baakwa beete bagaantûmîkîre.

²Nîkwîthîrwa ûkarega kûbeetîkîîria beeta na ûgeeta na mbere kûbarigîîria,

³MWATHANI agatumîra înya yaawe kûringa mbarathi, na ntigiri, na nkamîîra, na ng'ombe na ng'ondu, na mûrimo jûmûthûûku, cionthe ikue.

⁴Îndî MWATHANI akaathûrana ndîîthia cia Israeli na cia Amisri, nacio irîa cionthe irî cia antû ba Israeli gûtî noo îmwe îgaakua.’”

⁵MWATHANI areeka ntukû îrîa akathithia ûntû bûu arauga, “Rûûjû nîrîo MWATHANI akaathithia ûntû bûu nthîgûrûûne.”

⁶Rûûneene MWATHANI arathithia ûntû bûbû; ndîîthia cionthe cia Amisri irakua, îndî kîrî ndîîthia cia antû ba Israeli gûtî noo îmwe yaakua.

⁷Farao nî aatûmanîre, na areerwa gûtî nyomoo noo îmwe ya antû Israeli îkuîte. Îndî nkoro ya Farao nî yoomagari, na ataarekererie antû beeta.

⁸MWATHANI nî eerîre Musa na Aaroni atîrî, “Kumbateeni nkuundi inkai cia mûju riikoone. Musa nî ajûgere bwa îgûrû Farao ategeete.

⁹Naju jûkagûrûka ta tîîri jûjûre kunthe nthîgûrûûne ya Misri, na jwîkîre antû na nyomoo maûûtî jagûtûrîkanga jakaa ironda kunthe nthîgûrûûne ya Misri.”

¹⁰ Tontû bûû, barajûkia mûju kuuma riiko nabo bararûngama mbere ya Farao. Musa arajûgera bwa îgûrû naju jûreekîra antû na nyomoo maûûtî jagûtûrîkanga jakaa ironda.

¹¹Nabo aringi-biama batîngîûmba kûrûngama mbere ya Musa nîûntû bwa maûûtî, nîkwîthîrwa aringi-biama nî baumîte maûûtî o ta ûrîa jaumîte kîrî antû bangî bonthe ba Misri.

¹²Îndî MWATHANI nî oomagarîrie nkoro ya Farao na ataabathikîîra o ta ûrîa MWATHANI eerîte Musa.

¹³MWATHANI nî eerîre Musa atîrî, “Rooka gûkîîra rûkîîrî kainda ûrûngame mbere ya Farao ûmwîre atîrî, ‘MWATHANI Mûrungu wa Ahibirania ariuga ûjû, Rekeeria antû baakwa beete bagantumîkîre.

¹⁴Îgiita rîrî ngagûtûmîra mantû jamathûûku jarî ikanûkia kîrî gwe na nthûûmba ciaaku na antû baaku, nîkenda ûkaamenya gûtî ûngî taani nthîgûrûûne kunthe.

¹⁵Nîkwîthîrwa mwanka nandî ndîngî kwîthîrwa ntaambûrûkîîtie njara yaakwa na ngatûma bûgwatwa nî mîrimo îmîthûûku bûthira nthîgûrûûne.

¹⁶ Îndî nîûntû bwa gîtûmi gîkî nî ndekeeretie ûtûûra mwanka nandî, nîkenda nkwonia inya yaakwa, narîo riîtwa rîaakwa rîmenyithanua nthîgûrûûne yonthe.

¹⁷Naagwe kinya nandî no ûciûmîtie na antû baakwa na ûtîkûbarekeeria beeta.

¹⁸Atîrî, rûûjû îgiita ta rîrî ngatûma ngai ya nchûgû înene yura, îrîa îtoonekana kaîrî Misri kuuma ntukû îrîa yoombîrwe mwanka nandî.

¹⁹Tontû bûû, tûmanîra ndîîthia na bingî bionthe birîa ûrî nabio bûûrîîne biîje antû atî na ûgwati. Nîkwîthîrwa ngai ya ncugu îkaurîra o muntû wonthe ûrî bûûrîîne, na nyomoo yonthe îrî bûûrîîne îtîreeti nja, bionthe bikue.’”

²⁰O muntû wonthe ûrîa waakîraga rûteto rwa MWATHANI kîrî nthûûmba cia Farao nî aakûrûkîrie nkombo ciaawe na ndîîthia ciaawe nyomba.

²¹Îndî ûrîa ûteetîkagîra rûteto rwa MWATHANI nî aatigîre nkombo ciaawe na ndîîthia ciaawe bûûrîîne.

²²MWATHANI nî eerîre Musa atîrî, “Taambûrûkia njara yaaku bwa îgûrû kuure ngai ya nchûgû nthîgûrûûne ya Misri yonthe, yurîre antû na nyomoo, na imera bionthe na matî jonthe nthîgûrûûne ya Misri.”

²³Musa nî aataambûrûkîrie rûturo rwaawe bwa îgûrû; nawe MWATHANI aratûma ngorogoro, na ngai ya nchûgû, na ndweni kuuma îgûrû. MWATHANI araurithia ngai ya nchûgû nthîgûrû ya Misri.

²⁴ Kûraura ngai ya nchûgû na ndweni irakara ikîenagia. Ngai ta îîu îtaarî îkwoneka kaîrî no kû nthîgûrûûne ya Misri kuuma rîrîa yaaere mûgongo.

²⁵Nayo ngai ya nchûgû nî yaathirîrie bionthe birîa biaarî bûûrîîne kunthe nthîgûrûûne ya Misri: îrathiria antû na nyomoo. Ngai ya nchûgû îreenyangia imera bionthe na îraunanga mîtî yonthe.

²⁶Nî nthî ya Gosheni akî kûrîa antû ba Israeli baatwîre gûtaarî na ngai ya nchûgû.

²⁷Nîrîo Farao aatûmanîîre Musa na Aaroni arabeera atîrî, “Îgiita rîrî nî mbîîtie. MWATHANI nîwe ûrî ûûmeene îndî ûûni na antû baakwa nî tûthûûkîtie.

²⁸Ndombereni MWATHANI nîûntû ngorogoro na ngai ya nchûgû bikûng'ana. Naani nkabûrekeeria bwîte, bûtîkarakara kaîrî.”

²⁹Musa nawe aramwîra, “Ndaumagara ntûûreene o rîo ngaatambûrûkia njara kîrî MWATHANI; nayo ngorogoro îtige kûthandîka, nayo ngai ya nchûgû îkîe, nîkenda ûmenya atî nthîgûrû nî ya MWATHANI.

³⁰Îndî ûûgwe na nthûûmba ciaaku nî nkûmenya bûtîkinyîtie rîa gûkîra MWATHANI Mûrungu.”

³¹Bamba na nî bienyangîrue, nîûntû mûnyaki nî jwaarî jûgûkûra na bamba nî yaarî akuî gûkomoka.

³²Îndî nkano iteenyangîrue, nîûntû ikûraga icereeri.

³³Musa araumagara ntûûreene akuî na Farao aratambûrûkia njara kîrî MWATHANI na araromba. Nayo ngorogoro na ngai ya nchûgû birathira, nayo ngai îrakea îratiga kuura nthîgûrûûne.

³⁴Îndî rîrîa Farao oonere ngai ya nchûgû na ngorogoro bikûthira, areeyia nkûrûki, na aroomia nkoro yaawe, we amwe na nthûûmba ciaawe.

³⁵Tontû bûû, nkoro ya Farao îroomagara nawe ataarekeeria antû ba Israeli beeta, o ta ûrîa MWATHANI eerîte Musa auge.