Read KIMERU BIBLE PROTESTANT EDITION Ayub 1 Bible Online

Ayub 1 - KIMERU BIBLE PROTESTANT EDITION bible

Ayub 1

¹Nî kwaarî muntû ûmwe nthîgûrûûne ya Uzi, nawe eetagwa Ayubu. Muntû ûu ataarî na ûntû bwa kûguutîrwa na mîîtîre yaawe yaarî îmîega mono. Aarî mûkîri Mûrungu na ataathithagia mantû jamaaî.

²Nawe aarî na ataana mûgwanja na aarî bathatû.

³Ûtonga bwaawe bwaarî ng'ondu ngiri mûgwanja (7,000), na nkamîîra ngiri ithatû (3,000), na ndeegwa irîa ikucagia mûraû magana jataano (500), na ntigiri nka ngiri îmwe (1,000), na nthûûmba inyiingî mono. Tontû bûû, muntû ûu nîwe waarî gîtonga nkûrûki ya antû bangî bonthe nthîgûrû cia bwa gaiti.

⁴Nabo ataana baawe nî beetaga bakarîîra kîatho nyomba ya o ûmwe waao ntukû yaawe yakinya. Nabo nî baatûmanagîra aarî ba ng'ina bo-bathatû bakeeja kûrîjanîra na kûnyunyanîra nabo.

⁵Naku nî gwakaraga atîrî, rîrîa ntukû cia biatho bia aana bau ciakûrûka, Ayubu nî aabatûmanagîra akabatheria. Ookagîîra rûkîîrî kainda akarita igongwana bia gwakîîria kûringana na ûrîa aana bau baang'anaga nîûntû Ayubu augaga, “Kwombîka ataana baakwa bakeethîrwa beeîîtie bakaruma Mûrungu nkoroone ciaao.” Ûu nîu Ayubu aathithagia magiita jonthe.

⁶ Ntukû îmwe biûmbe bia îgûrû nî bietîre gûcionania kîrî MWATHANI. Kinya Nkoma nî aarî amwe nabio.

⁷MWATHANI nî oorîrie Nkoma atîrî, “Nîkû uumîte?” Nkoma îracokeria MWATHANI îrauga, “Mpuumîte guitia na kwînama nthîgûrûûne, na gwîta na gûcoka ku.”

⁸MWATHANI arooria Nkoma atîrî, “Ûgûtegeera nthûûmba yaakwa Ayubu bwega woona gûtî ûngî ûkari tawe nthîgûrûûne? Muntû ûtî ûntû bwa kûguutîrwa na ûrî mîîtîre îmîega, muntû mûkîri Mûrungu na ûtîthithagia mantû jamaaî?”

⁹ Nkoma îracokeria MWATHANI îramwîra atîrî, “Nîka kûrîîndî Ayubu akîrîte Mûrungu ûtheri?

¹⁰Anga tîgwe ûmûkarîtie na wakaria nja yaawe na into birîa bionthe arî nabio? Ningî no gwe ûtharimîte ngûgî ciaawe cionthe, na ûtonga bwaawe bwaingîa nthîgûrûûne.

¹¹Îndî nandî û tambûrûkia njara ûringithie bionthe birîa arî nabio, woone këethîra atîkûruma ûtegeete.”

¹²MWATHANI areera Nkoma atîrî, “Ndîkûnenkanîra bionthe birîa Ayubu arî nabio njareene ciaaku îndî ûkamûringithia mwîrî jwaawe na njara yaaku.” Tontû bûû, Nkoma îreeta îrauma mbere ya MWATHANI.

¹³Ntukû îmwe ataana na aarî ba Ayubu nî baarîîjaga na kûnyua ndibei barî nyomba ya mûtaana wa ng'ina ûrîa mûkûrû.

¹⁴Rîu mûtûmwa ûmwe nî eetîre kîrî Ayubu arauga, “Ndegwa ikûrîmaga na mûraû na ntigiri ikûrîîjaga akuî nacio,

¹⁵nabo Asabea baciithûkîra baijûkia na booraga nthûûmba na nchiû. Nî ni ninka ndatigara ndeeja gûkûmenyithia.”

¹⁶Nthûûmba îîu îkîaragia o ûu, îngî îreeja îrauga, “Mwanki jwa Mûrungu jumîte îgûrû jûkûîîthia ng'ondu na nthûûmba jwathiria buru. Nî ni ninka ndatigara ndeeja gûkûmenyithia.”

¹⁷Îîu îngî îkîaragia o ûu nthûûmba îngî îreeja îrauga, “Ababiloni beejîre barî ikundi bithatû baithûkîra nkamîîra baijûkia na booraga nthûûmba na nchiû. Nî ni ninka ndaatigara ndeeja gûkûmenyithia.”

¹⁸Ningî akîaragia o ûu, ûngî areeja arauga, “Ataana baaku na aarî baaku bakûrîîjaga na kûnyua ndibei barî nyomba ya mûtaana wa ng'ina ûrîa mûkûrû.

¹⁹Kîbubani gîkînene kîaurutana kiumîte rwanda nakîo kîaringa nteere cio-inya cia nyomba nayo yaabagwîra baakua bonthe. Nî ni ninka ndaatigara ndeeja gûkûmenyithia.”

²⁰Nîrîo Ayubu ookîrîîre aratambûranga rwambambio rwaawe na areenja mûtwe jwaawe, araigwîthia nthîgûrû na arathaathayia Mûrungu.

²¹Arauga atîrî, “Ndaumîre kîu kîa maama ndî ûtheri na ngaacoka kûrîa ndaumîre ndî ûtheri. MWATHANI nîwe waeejanîre na MWATHANI nîwe wajûkia. Riîtwa rîa MWATHANI rîrokumagua.”

²²Mantûûne jau jonthe Ayubu ateyia na atauga Mûrungu nî amûthithîrîtie bûbûthûûku.