Read KIMERU BIBLE PROTESTANT EDITION Ayub 10 Bible Online

Ayub 10 - KIMERU BIBLE PROTESTANT EDITION bible

Ayub 10

¹“Ûtûûro bwaakwa nî bûnogeetie. Tontû bûû, ngaikaîra ntîgûkîra, nkaarita marûrû jarîa jarî nkoroone yaakwa.

²Naani nkeera Mûrungu atîrî: Ûkaangitîra îgamba bûbûthûûku. Nî kaaba ûmbîîre nîmbi ûgûnkanûkiria.

³Nîka gwe ûgwîragîrua kûthîînia muntû, kûmenithia yûûmba rîa njara ciaaku na kûgwîrîrua mîbango ya barîa baaî?

⁴Nîka gwe ûrî meetho jakari ta ja antû? Nîka gwe woonaga mantû ûrîa bajoonaga?

⁵Matukû jaaku nî ûmwe na ja ûtûûro bwa muntû? Kana mîaka yaaku nî ûmwe na yaawe?

⁶Nîkî gwe ûgûcwaa maatia jaakwa na kûnthûûja kenda woona meeyia jaakwa?

⁷Gwe nî ûkûmenya gûtî ûthûûku nthithîtie, na atî gûtî we ûûmba gûntunyûkia njareene ciaaku.

⁸Nî gwe wantaramîre na wampûûmba na njara ciaaku ûu nkari; na nandî nî ûngarûkîrîte ûnthiria.

⁹Ririkana wampûmbîre na mûthetu jwa yûmba, Nîka ûkwenda kûnthetheranga mpaa mûthetu kaîrî?

¹⁰Tî gwe wambîtûûrîrie kîu kîa maama na ûrampûmbaûmbanîria ku?

¹¹Nîgwe weekîîre mwîrî jwaakwa nyama na ûrajûguîkîra na gîkoonde ûrantumania na marûitû na mîkiia.

¹²Nîgwe ûmpeete mwoyo wambîîka kîaoone gîaaku gîa kenya. Naani ntwîre mwoyo nîûntû bwa ûmenyeeri bwaaku.

¹³Nandî nkûmenya ûtwîre wetereete, wîkîîte mantû jaja withoone.

¹⁴Gwe gûtî îîyia ûtîntaragîra na ûtîndekagîra meeyia jaakwa.

¹⁵Wûi kîrî ni ndëethîrwa mbîîtie. Ningî kinya nkëethîrwa ndî ûmwagîru ntîûmba gûûkîîria mûtwe kîrî antû nîkwîthîrwa nî mbûjûrîte nthao nî ûrîa ndî na mîthangîko îmingî.

¹⁶Ningî rîrîa ndookîîria kîongo, gwe ûncwaga ta ngatûnyi îgûcwaa gîa kûrîa, ûkanthithîria mantû jamathûûku kaîrî na kaîrî.

¹⁷Magiita jonthe wîthagîrwa ûrî na akûûjî ba kûnthitanga, naagwe noka ûkaraga ûkîongagîîra mûthûûro jwaaku îgûrû rîaakwa. Ûkagîîria anthû baberû nîkenda babithûkîra

¹⁸Nîmbi yatûmîre ûrekeeria nchiarwa? Nî kaaba ndîngîkua mbere ya ntîroonwa nî muntû kinya ûrîku.

¹⁹Këethîra ka ndaakamatîrwe nkiuma kîu kîa maama ndîraikua mbîrîreene, ndîngî gûkara teeka ntëethîrwa ndî o.

²⁰Ntukû ciaakwa cia gûtûûra mwoyo nî inkai, nîûntû bûu tigana naani ngwîrîrue iu itigeere,

²¹Mbere ya mbîta kûrîa ntigacoka kaîrî, nthîgûrû ya kwîthîkîîra na muundu jûmûnene,

²²nthîgûrû îrîa îrî muundu ta jwa gîkuû jûmûrito na yarageene, kûrîa weerû bûkari ûmwe na muundu.”