Read KIMERU BIBLE PROTESTANT EDITION Ayub 11 Bible Online

Ayub 11 - KIMERU BIBLE PROTESTANT EDITION bible

Ayub 11

¹Zofari wa kuuma Naama nî aarîrie aramwîra atîrî,

²“Mantû jamaingî ta jau nî jabuîrîte gûkirîrwa jatîcokeretue? A kwaria nteto inyiingî nîku kwagîrithagia muntû?

³Ûriuga kwaria nteto inyiingî gûgatûma antû baaga bwa kuuga? Waakurungana ûriuga ûtîona wa gûgûconorithia agwîkîrithia nthao?

⁴Nîkwîthîrwa gwe ûriuga ‘Mantû jarîa nkwaria nîjo ja mma na ndî ûmûtheru meethoone ja Mûrungu.’

⁵Îndî, wûi këethîra Mûrungu aatumûra kanyua kaawe agagûcokeria.

⁶Agakwîra jarîa ûtiijî jegiî ûmenyo nîûntû ûmenyo bûrî mantû jamaingî jatîmenyeka. Menya atî Mûrungu atîgûkanûkîîtie kûringana na ûrîa meeyia jaaku jabuîrîte gûtûma ûkanûkua.

⁷Woomba kûmenya mantû ja Mûrungu jarîa jarî withoone? Woomba kûmenya ûrîa inya yaawe îng'ana?

⁸Nîyo ndaaja nkûrûki ya gwitia îgûrû. Ûûgwe rî ûûmba kûthithia atîa kûmemenya? Ûmenyo bwaawe bworokereete nkûrûki ya kûrîa akuû batwîre. Ûûmba kûbûmenya atîa?

⁹Ûmenyo na inya yaawe nî biraaja nkûrûki ya nthî, ningî nî bibiaariî nkûrûki ya îria.

¹⁰Mûrungu akëeja agakûingîra, na agakûrûngîka îgambeene, nûû ûûmba kûmûgiria?

¹¹We nî aijî antû barîa baaî. Rîrîa oona wîyia bûkîthithua rî, nîka oomba kûrega kûnogua nîbu?

¹²Îndî kîaa gîkagîta ûûme rîrîa ntigiri ikauma ngoji.

¹³Îndî ûkeerekania nkoro yaaku woomba gûtambûrûkia njara ûkamûromba.

¹⁴Wethîrwa ûthithîtie wîîyia, bûthaambe. Ûkárekeeria ûûî bûtûûra gwaaku.

¹⁵Rîu nîrîo ûkoomba gûûkîîria mûtwe ûtî na îgi, nîrîo ûkairikîria na wîthîrwe ûtî na bia gûkîra.

¹⁶Naagwe ûkoorîrua nî mîthangîko yaaku ûmîonage ja rûûjî rûrîîkîîtie gûkûrûka.

¹⁷Nabu ûtûûro bwaaku bûkathaara nkûrûki ya riûa mûthenya. Naju muundu jûrîa jûrî ûtûûroone bwaaku jûkathira ta rûkîîrî gûgîkia.

¹⁸Ûkaagîta ûchamba nîûntû ûkûgîa wîrîgîîro ûkeethîrwa ûkarîîtue ûnogoke kiindajî.

¹⁹Ûkaamamaga gûtî gîntû ûgûkîra antû babaingî nabo bagakûrombaga ûteethio.

²⁰Îndî barîa baaî bakaûra meetho bakirimanue baage njîra ya kûmatûka. Wîrîgîîro bwaao no gîkuû.”