Read KIMERU BIBLE PROTESTANT EDITION Ayub 12 Bible Online

Ayub 12 - KIMERU BIBLE PROTESTANT EDITION bible

Ayub 12

¹Ayubu aracokia arauga atîrî:

²Gûtî nkaanja buî nî buî antû baakwa, ûmenyo bûkaathiranîria naabuî.

³Îndî kinya ni ndî na kîrîra o ta buî na gûtîkîo bûnkûrûkîte nakîo. Ningî rî, nûû ûtiijî mantû jau jonthe?

⁴Nîka nkûthekerwa kinya nî acoore baakwa, ûûni muntû waarombaga Mûrungu na agancokeria. Ûûni muntû ûmwagîru na ûtîona ûntû bwa kûguutîrwa, nî ni nkûthekerwa?

⁵Mathûgaanioone ja barîa bathinyaarîte nîku kuumaga rûmena rwa barîa barî thîîneene. Baringaga muntû nîûntû arî akuî kûgwa.

⁶Ikaro bia atuunyani birî na thîîrî, na barîa bamenaga Mûrungu batî ûgwatiine, bo barîa bajûkagia inya yaao îrî mûrungu jwaao.

⁷Îndî gwe rî, cwaa kîrîra kîrî nyamû cia kîthaka nacio igakûritana, Ûria nyoni, nacio igakwaa nteto.

⁸Kana warîrie imera bia nthî; nabio bigakûritana, ûûrie makûyû ja îria najo jagakwîra mantû bwega.

⁹Kîrî biu bionthe nî kîrîkû gîtiijî atî nî MWATHANI ûthithîtie ûntû bûbû?

¹⁰Into bionthe birîa birî mwoyo birî njareene ciaawe, na kinya ûtûûro bwa antû bonthe bûrî njareene ciaawe.

¹¹To mwanka matû jathûrane jarîa jakwigua o ta ûrîa kanyua kamenyaga mûchemo jwa irio?

¹²Antû barîa akûrû nîbo barî kîrîra gûciûra mantû bwega, kwîjanagia na ûkûrû bwa mîaka îmiingî.

¹³Îndî kîrî Mûrungu kûrî ûûme na inya nî aeejanaga kîrîra na ûmenyo.

¹⁴Akëeja kûtharia gûtî ûûmba gwaka kaîrî akëeja kûingîra muntû, gûtî we ûûmba kûmûrugûrîra.

¹⁵Akëeja kûrega kuura ka nthî yûûmaga na aurithia ngai inyiingî, gûkagîa na îkondoria nthîgûrû.

¹⁶Nîwe mwene inya na ûûme, mûrongo na ûrîa waîragûa bonthe nî baawe.

¹⁷Aatûmaga atongeeria beeta magûrû jamatheri nabo agambi akabaeethia biaa.

¹⁸Aatuunyaga anene waathani akabaethia nkombo.

¹⁹Aatûmaga athînjîri-Mûrungu beeta magûrû jamatheri na akathiria nchamba inya.

²⁰Atûmaga barîa baijî kwaria mono baaga nteto cia kwaria na agatuunya barîa akûrû kîrîra.

²¹Amenagîîria athani na akathiria inya ya barîa barî yo.

²²Jarîa jaithi muunduune nî ajaumagîria na akathiria muundu na weerû.

²³Nîwe ûtûmaga mîgongo înenea na nîwe ûmîthiragia buru. Nîwe ûtûmaga mîgongo îtaamba nawe akamînyagania.

²⁴Atûnyaga agambi ba nthî ûûme agatûma baûrîra gûntû gûtî njîra.

²⁵Baataataga muunduune gûtî na weerû agatûma bagatang'atang'a ta antû boogiti.