Read KIMERU BIBLE PROTESTANT EDITION Ayub 13 Bible Online

Ayub 13 - KIMERU BIBLE PROTESTANT EDITION bible

Ayub 13

¹Atîrî, jaja jonthe nî mantû mboneete na meetho jaakwa; nî njaigîîtue na matû jaakwa na nkajamenya.

²Jarîa bûkûmenya kinya ni no njaijî na ntî ûmûnini kîrî buî na njîra noo îrîkû.

³Îndî ni nî Mweneinya nkwenda kwarîria, ûrîa nkwenda nî kûgambana na Mûrungu.

⁴Îndî buî, buithongomeetie na bûrî arongo bwinthe bûkari ta ndagitarî ba ûtheri buru.

⁵Këethîra bûrîngî gûkira ki, bûrîngî kwoonekana teeka bûrî baboome.

⁶Thikîîreeni nandî ûrîa ngwiteteera bwigue ngîciarîrîîria.

⁷Ka bûkwaria ûrongo na nî antûûne a Mûrungu bûkwaria? Bûkaîrania na nî antûûne aawe bûkwaria?

⁸Nîka bûkwenda kwarîrîîria Mûrungu? Nîka bûkwenda kûmûteteera?

⁹Akabûthûûja ri oona bûtî na ûthûûku? Bûriuga bwoomba kûmwaîria ta ûrîa muntû aîragua?

¹⁰Nî mma akabûgondokera bwethîrwa bwendaga bamwe bûkîthûûraga bangî.

¹¹Ûkumio bwa ûnene bwaawe bûtîbwîkîra kîmako, bûgwatwa nî ûguaa nîûntû bwaawe?

¹²Njuno cieenu ikari ta mûju jûrîa jûtigaraga mwanki jwathiria gwakana. Najo mantû jau bûgwiteteera najo jakamomoka ta nthingo cia mûthetu.

¹³Mpeeni kaanya naani mbarie gûkare ûrîa gûgakara.

¹⁴Ntîkîra gwîkîra mwîrî jwaakwa ûgwatiine mbuga ûrîa ngakara nî nkare u.

¹⁵Nî mbijî ntî na wîrîgîîro nîûntû akambûraga. Amwe na jau, nî kaaba nteteere mîîtîre yaakwa kîrî we.

¹⁶Ûu nîu wonokio bwaakwa bûkoonora, nîûntû muntû ûtiijî Mûrungu atîûmba kûrûngama mbere yaawe.

¹⁷Thikîîreeni nteto ciaakwa, buigue na matû jeenu mantû jarîa nkuuga.

¹⁸Atîrî, nî ndiithuranîrîte kûgamba îgamba rîaakwa, nî nkûmenya nkoonwa ntî na îthûûkia.

¹⁹Arîkû wa kûngambithia? Tontû athithia ûu ngakira nkue nkiri.

²⁰Nthithîria mantû jaîrî akî rîu ntige gûgwiciitha.

²¹Cokia njara ûtige gûnkanûkia na ûtige kûmbûraga na ûguaa.

²²Aria mbere naani ngûcokerie kana mbarie mbere naagwe ûncokerie.

²³Nîatîa mathûûkia jaakwa na meeyia jaakwa jang'ana? Menyithia Waatho bûrîa mbunîte na îîyia rîrîa nthithîtie.

²⁴Nîkî tontû ûkûmbiciithîra ûgantua ta ndî mûnthû waaku?

²⁵Nîka gwe ûgûntemûra na nkari ta îbûûra riurutîîtwe nî ruuo, kana ûkeengana naani na nkari ta matî jamoomo?

²⁶Gwe ûrînthitangîra mantû jamaaî mono ûgankanûkîria maatia ndaathithagia ndî mwana.

²⁷ Gwe ûntheeke magûrû, îndî ûcoke wende kûmenya kunthe kûrîa ngwîtîîra. Ningî makinya jaakwa nî ûjairigîîrîte.

²⁸Muntû ang'unyûkangaga ta gîntû gîkîoru akathira ta nguû îrîi nî mûthwaa.