Read KIMERU BIBLE PROTESTANT EDITION Ayub 14 Bible Online

Ayub 14 - KIMERU BIBLE PROTESTANT EDITION bible

Ayub 14

¹Muntû ûciari nî mûka atûûraga ntukû inkai nacio nî cia thîîna akî.

²Akari ta îrao rîrîa riumaga na rîkooma ntûti aakûrûkangaga ta kîthiîki.

³Nîka gwe ûraithagîîria muntû ta ûu na ûkamûgambithia?

⁴Nûû ûûmba kûrita gîntû gîkîtheru kuuma kîrî gîntû gîtîtheri? Gûtî we ûûmba.

⁵Tontû matukû ja ûtûûro bwaawe nî jaijîkeene bwega na mîeri ya mîanka yaawe nî ûkûmenya ûrîa îng'ana ningî gwe nî ûmwîkîrîte mîanka îrîa atîûmba gûkûrûka.

⁶Tigana nawe, ûtige kûmûraithîîria. Noo këethîra akagwîrîrua ntukû ciaawe nîûntû akari ta mwandîkwa wa ntukû.

⁷Nî kaaba mûtî, jûrî wîrîgîîro bwa kuuma kaîrî jwarîîkia gûtemwa.

⁸Kinya mîri yaaju îgakûra mono îrî nthî, nakîo gîtinkî kîaaju gîkooma kîrî mûthetuune,

⁹amwe na ûu, jûkoona rûûjî jwauma kaîrî, jûkagîa mpang'i ta mûtî jûmwîthî.

¹⁰Îndî muntû akuujaga akathikwa muntû aikia mîrukî ya mûthia atîonagwa kaîrî.

¹¹O ta ûrîa rûûjî rwa îria rûgûûjaga, na ûrîa rûûjî rwa mûuro rûnyaaraga rûkathira,

¹²ûu nîu muntû akuujaga atîûkîîre kaîrî. Kinya rîrîa îgûrû rîkathira, we akeethîrwa o amami, na atîûmba gûûkua toroone yaawe.

¹³Wûi këethîra woomba kûmbitha gwa akuû; ûkaambitha ku mwanka mûthûûro jwaaku jûkathira, na ûkaambîîra rîrîa ûkaandirikana.

¹⁴Muntû agakua rî, oomba gûtûûra mwoyo kaîrî? Matukû jonthe jarîa nkarita ngûgî, ngaatûûra mbeteereete kûnogokua.

¹⁵Rîu wetana, ngagûcokeria, naagwe ûkaigua ûkîenda yûmba rîa njara ciaaku kaîrî.

¹⁶Nîkwîthîrwa kinya wakara ûgîtaraga makinya jarîa ngûkinya, ûtîkaraga ûraithîrîîtie meeyia jaakwa.

¹⁷Ûkandekîra mathûûkia jaakwa na ûjebie buru. Ûkangûra mathûûkia jaarîa nthithîtie.

¹⁸Îndî o ta ûrîa irîma bigûjaga bikathuthurûkanga, nacio ndwara cia maiga igakûûrwa ikauma arîa itwîre,

¹⁹ta ûrîa ndûûjî îng'enyûrangaga maiga, ngai înene îgeetithia mûthetu jwa nthî; ûu nîu gwe ûthiragia wîrîgîîro bwa muntû.

²⁰Ûmûkîragia inya kenya na kenya akathira, ûkamûthûkangia ûthiû rîu ûkamwenga buru.

²¹Aana baawe bagîîjaga îgweta na atîmenye, kinya baaringwa nthî baathirua atîmenye.

²²Nî ûrûrû bwa mwîrî jwaawe akî aigagua, na akairîrîra wenka akî.