Read KIMERU BIBLE PROTESTANT EDITION Ayub 15 Bible Online

Ayub 15 - KIMERU BIBLE PROTESTANT EDITION bible

Ayub 15

¹Elifazi wa kuuma Tema aramûcokeria atîrî,

²“Ka muntû ûmûûme oomba gûcokia na nteto itî na gîtûmi? Agaciûjûria nteto ikari ta ruuo rûrûûmo rwa gaiti?

³Nîka abuîrîte gwiteteera na nteto itî na umithio, kana aaria mantû jatî na ûteethio?

⁴Kinya gûkîra Mûrungu gwe nîka ûgûkûmeneeria, na wîru bwa kûthûgaanagia mantû jaawe wabûtiganîria.

⁵Nî meeyia jaaku jagûtûma waria ûu, Wîthûûrîra kwaria nteto cia waayia.

⁶Nteto cia kanyua gaaku nîcio ciongwa igûkûgambithia; tî ûûni, nî mîromo yaaku yongwa îgûgûkûûjîîra.

⁷Nîgwe muntû wa mbere gûciarwa nthîgûrûûne? Nîgwe woombîrwe kinya mbere ya irîma?

⁸Nîka ûkûmenya jarîa jagiiti nî Mûrungu withoone? Nîka ûkwona ta ûûgwe wenka ûrî na kîrîra?

⁹Nî mantû jarîku wiijî baatuî tûtiijî? Nî jarîkû ûûmba gûciûra naatuî tûtîûmba gûciûra?

¹⁰Gatîgatîîne geetû kûrî barî na mbuî na babakûrû mma, babakûrû kinya nkûrûki ya abaagu.

¹¹Nîka woonaga nteto irîa Mûrungu akûboreragia nacio irî inkai, kana mantû jameega jarîa waragîrua?

¹²Nîkî tontû ûkûrekeeria mantû jarîa ûkwenda jakwatha? Nîkî tontû meetho jaaku jakûrîgarîga?

¹³Mwanka ûkathûûrîîra Mûrungu ûkarekeeria nteto ta iu ciuma kanyueene gaaku?

¹⁴ Muntû oomba kwaa ûmûtheru? Muntû ûciari nî mûka omba gûtuîka ûmwagîru?

¹⁵Atîrî, Mûrungu atîûmba gwîtîkia kinya araîka baawe. Meethoone jaawe kinya îgûrû rîtîtheri.

¹⁶Nîatîa îndî akoona muntû ûmûthûûku na mûmaramari atîtheri bûng'ana? Muntû ûnyunyaga meeyia ta rûûjî akûnyua.

¹⁷Nthikîîra nandî naani nkwîre jarîa ndoona, Nkwonie jarîa mbijî.

¹⁸Jarîa barîa boome baanditanîre nabo bairitanîîte jo kuuma kîrî beethe, nabo beethe gûtî bu babaitha.

¹⁹Baatûûraga nthîgûrû yaao bonka na gûtî antû bakuuma kûngî bakaranîra nabo babamenithania na Mûrungu.

²⁰Matukû jonthe ja muntû ûmûthûûku nî ja ûrûrû na nîo u mîaka yonthe ya barîa banyamaaragia bangî.

²¹Akaraga akiigagua tûjû twa kûmakania, Rîrîa akûthûgaania nîîndî aathinyaara, maitha jakamwithûkîra.

²²Atîîtîkagia keethîra akorouma muunduune akaraga eeteerete gûkua nîûntû nîku eerîri.

²³Kinya eetîte nî aijî nderi imwetereete imweethia nyama nî akûmenya arî akuî kûthirua.

²⁴Mîthangîko na rwakaî bitûûraga bimûmakîtie bimûkindîte ja mûnene ûrî ndweene.

²⁵Nîkwîthîrwa nî eendere kûrega kwathîkîra Mûrungu aararegana na Waatho bwa Mweneinya yonthe.

²⁶Oomia mûtwe oogîa kûrwaa nawe agwete rong'o înene îmatu.

²⁷Nîkwîthîrwa anoreete mwanka oojûra maguta ûthiû nawe atî kauna nî kûnora.

²⁸Atûûraga ntûûreene irîa ciaarî maganjo nyomba irîa itîngîtûûrwa nî antû, nacio ciengeretie kûthirua ciaa maganjo.

²⁹Îndî atîtûûra atongi, into biaawe bitûûra o ningî atîkoroirikîria nthîgûrûûne.

³⁰Atîkoromatûka auma muunduune agakaraga ta mûtî jûrîa jwîîthagua mathundo jaaju nî mwanki. Îrao rîaaju rîkaurutwa nî ruuo rîgateewa.

³¹Nî atige gûciayia na gwîtîkia mantû ja ûtheri nîkwîthîrwa kinya we akaarîwa o najo.

³²Akaanyaara ta mûtî mbere ya îgiita rîaaju rîa kûûma, na mpang'i ciaaju itîkarîonekana irî imbîthî.

³³Agakara ta mûzabibû jûrîa jûgwîthagia nzabibû itîkûri, kana ja mûzeituni jûrîa jûgiitaga îrao rîaaju.

³⁴Barîa batiijî Mûrungu nîka bathaataga na ikaro biaao birîa biaki na nkunkumo bikaîthua nî mwanki.

³⁵Bagîîjaga maûa ja wûûî bagaciara ûthûûku, na nkoro ciaao ikaraga îkîthuranagîra ûrongo.”