Read KIMERU BIBLE PROTESTANT EDITION Ayub 16 Bible Online

Ayub 16 - KIMERU BIBLE PROTESTANT EDITION bible

Ayub 16

¹Ayubu aracokia atîrî:

²Ndîraigua mantû jamaingî ta jau o kaîrî, buî bûrî abooranîria ba ûtheri bwinthe.

³Nîrî bûgaakinyia rwaria rweenu rwa ûtheri mûthia? Kana rî, nîmbi îkûbûûkaûkia tontû bûgûncokeria?

⁴Kinya ni no mbarie ta ûu bûkwaria këethîra nî buî bûrî arîa ndî. Ndîngî gûcwaa nteto cia kûbwîra kinya ni nkabwarîria nkîbwinainagîria kîongo nkîbûtimbaga.

⁵Ndîngî kûbwîkîra inya na kûbwarîria kanyua mûrio nkîbûboreria na nteto cia kanyua kenda ibûthiria rwakaî.

⁶Îndî kinya ndaaria ûrûrû bwaakwa bûtîkûnyianyia na kinya ndaakira bûtîkûthira.

⁷Nî mma nandî Mûrungu akûnthiria inya aathiria nja yaakwa buru.

⁸Ningî aangwatîte andikia nîwe mûnthû waakwa. Mwîrî jwaakwa jûtigi gîkoonde na marûitû akî nabo antû boona ûu bakauga nîka mbîîtie.

⁹Mwathani antambûrangîte na marûrû jaawe na anthûûra buru. Aankabakabanîtie na maîgo na ankûûrîra meetho na mûthûûro.

¹⁰Antû barîndaithîîria baagamîtie tûnyua bakandinga rûthea na rûmena, bakothûrana bonthe nîkenda bampûûra.

¹¹Mûrungu aanenkanîrîte kîrî barîa batîmwijî, ampeejana njareene cia barîa baaî.

¹²Ntwîre ndî thîîria, mwanka rîrîa angwatîre arambunanga. Arangwata nkingo arandingania nthî, ndîraunîkanga tûchunchî. Andûngîkîte ampeethia gîntû kîaawe gîa kûrathaga.

¹³Arathi baawe baatua kûndathaga na mîgwî banthîûrûkîrîte nteere cionthe. Antambûrangîte kîbara gîaakwa atî na kîaao akamutanga mpigo ciaakwa, na nyongo yaakwa ageetûûra.

¹⁴Aandingangîte jamaingî ambithûkîrîte ja asikarî ûrî ndweene.

¹⁵Mbîkîrîte mathango mwîrî jwaakwa ndakara tîîriine ndîkûûmbwa buru.

¹⁶Meetho jaakwa nî jamatuune nîûntû bwa kûrîra, na meetho jaakwa nî jaimbi nîûntû bwa kûrîra.

¹⁷Kinya këethîra ntaathithia ûthûûku ningî maromba jaakwa nî ja mma.

¹⁸Itû nthîgûrû ûgákunîkîra tharike yaakwa îrîa îtîkîte; ûkárekeeria gûkaya gwaakwa kûûrîra nthî ûtheri.

¹⁹ Kinya nandî mûkûûjî waakwa nî ûrîa ûrî îgûrû, mûnteteeri no ûrîa ûrî îgûrû.

²⁰Acoore baakwa nîka bagûncikûûra, naani no Mûrungu nkaarîrîra.

²¹Nî nkwenda muntû wa kûmbarîîria kîrî Mûrungu o ta ûrîa muntû aaragîîria mûcoore waawe.

²²Tontû mîaka îmîkai îkîthira ngaaciîtîra njîra îrîa antû batîcokaga kaîrî.