Read KIMERU BIBLE PROTESTANT EDITION Ayub 17 Bible Online

Ayub 17 - KIMERU BIBLE PROTESTANT EDITION bible

Ayub 17

¹Ntukû ciaakwa nî ithiri, ntîkûûmba kinya gwikia mîrukî bwega, mbîrîra nîyo îmbeteereete rîu.

²Ancikûûri banthiûrûkîrîte, no riitho akî mbarûmagia bagînkurunga.

³Mûrungu nditîîra îrîi ûnkûûre îgambeene rîrî. Ga kûrî ûngî ûrî o wa gûnkûûra?

⁴Nîkwîthîrwa nî ûgirîîtie baciûkîrwa ûkábarekeeria bampûûmba.

⁵Muntû ûrîa ûkunyanagîra acoore baawe nîkenda oona îrîi, aana baawe bakoona thîîna.

⁶Rîu mpeete mwarua nî akûrûki njîreene, antû baambona bagatuîra mata nthî.

⁷Meetho jaakwa jatûngûkîte nî kwithikîîra nacio njara na magûrû jaakwa jonthe jacekeete ta mîrigi.

⁸Barîa barî mîîtîre îmîega nî barigarîtue nî mantû jaja, barîa batî îthûûkia batîkwenda kwona barîa batiijî Mûrungu.

⁹Îndî muntû ûmwagîru atîtiganaga na mîîtîre yaawe, barîa batîîagia bakaraga bakîgîîjaga inya nkûrûki.

¹⁰Îndî buî, njûûni bwinthe kaîrî, na nkaabwonia gûtî we gatîgatîîne keenu ûûmîi.

¹¹Ntukû ciaakwa nî ithiri, na mîbango yaakwa nî îthûûkîîtue, na kinya jarîa mpendeete.

¹²Acoore baakwa beendaga kwonania ûtukû nîbu mûthenya, bakauga nî gûkûgîa weerû rîrîa kûrî muunduune gatîgatî.

¹³Kinya ngacwaa gwa akuû nkîenda kwaa nyomba yaakwa, nkaaraa ûrûri bwaakwa muunduune,

¹⁴kinya nkeera mbîrîra, “Nîgwe baaba” na nkeera mang'inyo, “Nîbuî maama” kana “Nîbuî mwarî wa chiaa” rî,

¹⁵nîkû wîrîgîîro bwaakwa buumîkia? Nûû ûûmba kûndeetera wîrîgîîro?

¹⁶Wîrîgîîro bûu bwoomba kwînamania naani mwanka gwa akuû? Nîka tûgaatonyania mûthetuune tûrî amwe?