Read KIMERU BIBLE PROTESTANT EDITION Ayub 18 Bible Online

Ayub 18 - KIMERU BIBLE PROTESTANT EDITION bible

Ayub 18

¹Bilidadi wa kuuma Shua aracokia arauga atîrî,

²“Bûgakara bûtîgûkinyia ûgambi mûthia mwanka rî? Kirakira tûûmbe kwaria.

³Ga ûgûtwona tûriiti ta ng'ondu? Nîka meethoone jaaku tûkwoneka tûrî na waa?

⁴Gwe ûgwitambûranga na mûthûûro rî, ûriuga nthîgûrû yoomba gûtiga gûtûûrwa nîûntû bwaaku? Kana maiga jakeebaebua kuuma kûrîa jarî nîûntû bwaaku?

⁵ Îî, taawa ya muntû ûmûûî ka yooragua naru rûmûrî rwaawe rwa mwanki ka rûtigaga gwakana.

⁶Weerû bûkaa muundu nyombeene yaawe nayo taawa yaawe îrîa îmûmûrîkagîra yoorue.

⁷Matagaaria jaawe jamanene jakanyiua; nayo mîbango yaawe wengwa îkamûgwîthia.

⁸Nîkwîthîrwa magûrû jaawe wengwa nîjo jamwikagia mûtegoone, ageeta wengwa akagwa îrinyeene.

⁹Agwatagwa gateende nî mûtego mûkûmo jûkamûgwata akarika.

¹⁰Akûmîri ndeetho mûthetuune, eekîrwa mûtego njîreene.

¹¹Amakagua nî imakania kuuma nteere cionthe bitûûraga bimuumîte nyuma birî magûrûûne.

¹²Aathirîtue inya nî mpara mîthangîko ka îmwetereete agwa akî.

¹³Gîkoonde kîaawe kîrîjagwa nî mûrimo jûmûthûûku taju kîranga gîa gîkuû, jûkarîa njara na magûrû jaawe.

¹⁴Akuruthûrîîtwe arî gîkaroone kîaawe arîa arakaraga kindaajî, aareetwa kîrî mûnene wa imakania.

¹⁵Nyomba yaawe yoomba gûtûûrwa no ûrîa ûkwenda nîûntû tî yaawe kaîrî, na gîtûûro kîaawe kîaritwa mûgiro nî maiga jagwakana mwanki jwa ûbiriti.

¹⁶Akari ta mûtî jûrîa mîri yaaju yûûmaga îrî nthîgûrû nacio mpang'i ciaaju iinyaaraga irî îgûrû.

¹⁷Gûtionora wa kûmûririkana nthîgûrûûne antû batîîta bakîaragia ciaawe kaîrî.

¹⁸Ariti werûûne aagerwa muunduune aathaamua nthîgûrûûne buru.

¹⁹Gatîgatîîne ka antû baao we atî mbeeû kana nchiarwa, gûtî matigari ja nja yaawe jarî o.

²⁰Barîa batwîre bwa rûgûrû ka barigarîte nî mantû jarîa jakarîkîte kîrî we, na barîa batwîre bwa gaiti bagwati nî kîmako nîûntû bûu.

²¹Nî mma bûu nîbu ûtûûro bwa barîa batiijî Mûrungu. Ûrîa ûtîmwijî nîu akaraga ûu.”