Read KIMERU BIBLE PROTESTANT EDITION Ayub 19 Bible Online

Ayub 19 - KIMERU BIBLE PROTESTANT EDITION bible

Ayub 19

¹Ayubu aracokia arauga atîrî,

²“Nî mwanka rî bûgakara bûkînthîînagia na kûndigicania na biugo?

³Bûgûncikûûra mainda îkûmi amwe na bûu bûtîkwigua nthoni cia kûnthangîkia?

⁴Ningî kinya ndëethîrwa nî nthûûkîtie rî, yaatia rîaakwa tî o kîrî ni rîrî?

⁵Îndî kinya këethîra bûgûciimbaimbia kîrî ni, bwatua gûmpûûra na nteto nîûntû bwa mîthangîko yaakwa,

⁶menyeni atî nî Mûrungu ûtûmîte mbîthîrwa nkari ûjû. Nîwe ûmbîkîrîte mûtego antheekania.

⁷Atîrî, ndiikaîra nkauga ‘Nkûthangwa!’ îndî gûtî we ûkûmbîtîka. Kinya ndeereencana, gûtîkwoneka wa kûnthithîria ûrîa kwagîrîte.

⁸Ampingîrîte njîra ntîgakûrûke, na oojûria njîra ciaakwa muundu.

⁹Athirîtie îgweta rîaakwa buru, anthûkîria riîtwa.

¹⁰Ambunangîte nteere cionthe ndathira na wîrîgîîro bwaakwa abûkûranîria na mîri.

¹¹Mûrungu nî athûûri mono nî ni aambîrîria gûntaraga ndî mûnthû waawe.

¹²Njûûrî ciaawe ciûthûranîte nîûntû bwaakwa ciombaûmbania mîtaro kûnthiûrûkîra na ciaamba kambî nteere cionthe cia îema rîaakwa.

¹³Ambathûranîte na antû ba nja yaakwa buru, acoore baakwa baa ageni buru kîrî ni.

¹⁴Ndûgû ciaakwa amwe na acoore baakwa baantiganîrîtie buru.

¹⁵Barîa beejaga gwaakwa barî ageni nî boorîîrue nî ni, nacio nthûûmba ciaakwa cia aka imbonaga ta mûgeni, ta muntû wa kuuma kûngî.

¹⁶Ndeeta nthûûmba yaakwa, îtîmbîtîkaga, no mwanka nkare nkîmîerencaga.

¹⁷Mwekûrû waakwa atîûmîîria mûnuunko jwa mîrukî yaakwa, kinya ataana ba chiaa bongwa barîa nciaranîrîtue nabo batîgûnkuîrîria.

¹⁸Kinya twaana tûnyi no tûkûmena tûrîmbona tûkaambîrîria gûnkurunga.

¹⁹Acoore baakwa bonthe ba ndeene buru batîkwenda kûmbona, nabo barîa mpendeete mono nî bangarûkîte.

²⁰Ntigi mîîndîîndî akî ndî beco gûkua.

²¹Mbîgîîrueni kîaao! Mbigîîrueni kîaao itû buî acoore baakwa! Tontû nî Mûrungu ûmbithûkîrîte na njara yaawe.

²²Nîkî tontû kinya buî bûkûnthangîkia o ta ûrîa Mûrungu akûthithia? Nika bûtîkûng'anîrwa nî ûu mwîrî jwaakwa jûkari?

²³Wûi këethîra kwonora muntû wa kwaandîka nteto ciaakwa, ikaandîkwa yukuune.

²⁴Wûi këethîra ciandîkwa iigeene na kîandîki gîa chuuma itûûra kûthomagwa.

²⁵Nî nkûmenya mûkûûri waakwa arî mwoyo nawe akaambarîîria mûthieene.

²⁶Nyuma ya mwîrî jwaakwa kwînyangua kinya ndëethîrwa ntî na mwîrî nkoona Mûrungu.

²⁷Nkamwona arî rûteere rwaakwa ni ningwa nkaamwona na meetho. Naani nî nkwigua nkîenda gûkinya îgiita rîu mono.

²⁸Bûkëeja kuuga ‘Nîatîa tûkûmûthîînia?’ Na ‘Kaumo ka mantû no kîrî we.’

²⁹Nî kaaba bûgakîra îkanûkia rîa Mûrungu. Tontû bwa mûthûûro agakanûkia barîa baai nîkenda bûmenya nîwe ûgitanagîra îgamba.”