Read KIMERU BIBLE PROTESTANT EDITION Ayub 2 Bible Online

Ayub 2 - KIMERU BIBLE PROTESTANT EDITION bible

Ayub 2

¹O kaîrî nî gwakinyîre ntukû ya biûmbe bia Mûrungu gûcionania mbere ya MWATHANI. Nkoma kinya yo nî yeetîre îrî amwe nabo gûcionania mbere ya MWATHANI.

²MWATHANI nî oorîrie Nkoma atîrî, “Nîkû uumîte?” Nkoma nayo îramûcokeria, îramwîra, “Mpûmîte maitia na meenama nthîgûrûûne, na meeta na macoko ku.”

³MWATHANI arooria Nkoma atîrî, “Ûgûtegeera nthûûmba yaakwa Ayubu bwega woona gûtî ûngî ûkari tawe nthîgûrûûne, muntû ûtî ûntû bwa kûguutîrwa na ûrî mîîtîre îmîega, muntû mûkîri Mûrungu na ûtîthithagia mantû jamaaî? No eetîte na mbere kwîthîrwa arî mwîtîkua mwanka nandî, kinya wëethîrwa nî ûratûmîre ndeetîkîîria kûmûthîînia gûtî na gîtûmi.”

⁴Nkoma areera MWATHANI atîrî, “Muntû oomba kûnenkanîra bionthe birîa arî nabio kenda mwîrî jwaawe jûtîkaringithue atûûre mwoyo.

⁵Îndî nandî û tambûrûkia njara yaku na wîînyangie mîrûitû yaawe na nyama cia mwîrî jwaawe woone këethîra atîkûruma ûtegeete.”

⁶MWATHANI areera Nkoma, atîrî, “Ndîkûmûnenkanîra njareene ciaaku bunka akî ûkaamûraga.”

⁷Tontû bûû, Nkoma îrauma mbere ya MWATHANI îreeta îrajithia Ayubu mûrimo jwa maûûtî kuuma îkinya rîa kûgûrû mwanka mûtwe kathûmbî.

⁸Ayubu arajûkia rûgîo rwa kwithoa naru, na arakara nthî mûjuune.

⁹Mwekûrû waawe aramûûrîa atîrî, “Kinya nandî ûrî o mwîtîkua? Nî kaaba ûkaruma Mûrungu ûgakua.”

¹⁰Îndî Ayubu aramûcokeria, “Gwe ûrîaria ta ûrîa mûka kîaa aaragia. Tûjûkagia mawega kuuma njareene cia Mûrungu, nîatîa tûkarega kûjûkia maûûî?” Mantûûne jau jonthe Ayubu ateeyia rwarieene rwaawe.

¹¹Acoore ba Ayubu tabo Elifazi wa kuuma Temani, na Bilidadi wa kuuma Shua, na Zofari wa kuuma Naama, rîrîa baigîrue mantû jamathûûku jonthe jarîa jeejîîrîte Ayubu, nî beetîre kûmûboreria na kwithikanîîria amwe nawe.

¹²Îndî rîrîa baamûraithîrîîrie barî gataaria batoombîre kûmûmenya. Rîrîa bamûmenyere, nî baugîre mbu bakîrîraga. Baratambûranga ndwambambio ciaao na baraigerera tîîri biongo.

¹³Ningî barakara nthî amwe nawe ntukû mûgwanja, mûthenya na ûtukû, îndî gûtî waao wamwîra ûntû kinya bûmwe, nîûntû nî boonaga mîthangîko yaawe nî yaarî îmingî mono.