Read KIMERU BIBLE PROTESTANT EDITION Ayub 20 Bible Online

Ayub 20 - KIMERU BIBLE PROTESTANT EDITION bible

Ayub 20

¹Zofari wa kuuma Naama aracokia arauga atîrî,

²“Tontû bûû, mathûgaanio nî jagûntindîka ngûcokeria, nîûntû nî nkwigua nkîthangîka nkoroone.

³Nkwigua jau wauga nîka ûgûntengûra, îndî mathûgaanio jaakwa nî jagûmpa bwa gûcokia.

⁴Nî mma gwe nî wiijî ûrîa kwîthîrîîtwe gûkari kuuma kîambîrîriene, kuuma rîrîa muntû eekîrwe gûkû nthîgûrû,

⁵atî ûchamba bwa muntû ûmûûî nî bwa kagiita gagakai, naku kûgwîrua kwa barîa batiijî Mûrungu kûthiraga ntûti.

⁶Kinya agaciitithia agakinya mwanka îgûrû buru, mûtwe jwaawe naju jûgatira matu,

⁷mûthieene akaûra buru ta ûrîa kîoro gîteejagwa. Nabo barîa batûûraga kûmwona booranagie ‘Nîkû areetîre?’

⁸Akaathira o ta kîrooto, we atîonekana kaîrî, arime buru ta kîoneki ûtukû.

⁹Barîa batwîre kûmwona batîkoromwona kaîrî, nja yaawe îtîkamûtûngia meetho kaîrî.

¹⁰Aana baawe bakarîwua birîa nkea îtuunyi nacio nchiarwa ciaawe icokie birîa bionthe biaiwa.

¹¹Maîndîîndî jaawe joojûri inya ya wîthî îndî o ntûti jakathirîra mûthetuune buru.

¹²Aigagua ûûî bûrî mûrîo mono kanyueene akaraga abwithîte rungu rwa rûûme,

¹³aathwîre mono kûbûrekeeria bwîta no gwîka abwîkaga kanyua.

¹⁴Îndî irio bikinyaga kîu kîaawe gîkaurugana bikaraga ta mata ja njoka ndeene yaawe.

¹⁵Into biaitha birîa aarîa, no mwanka abitaîke kaîrî, Mûrungu akaabirita kîu kîaawe.

¹⁶Atwîre gwonka mata ja njoka, na no maîgo ja kiuuwa jakamwîka nthî.

¹⁷Atîkoroona na meetho mîuro ya maguta kaîrî, îrîa înyûrûûkaga nainchû na maguta jamathuke.

¹⁸Nî ka ageetîthia rûmatho rwa rûûya rwaawe atîrûrûmîte, atîkorogwîrîrua kûthegea gwa ûtonga bwaawe.

¹⁹Nîkwîthîrwa athetherangîte nkîa ciatigwa itî gîntû na aijûkîria nyomba atîakîte.

²⁰Nîkwîthîrwa guuru yaawe îtiijî mwanka gûtîkîo akoomba kwonokia kîa birîa aciûthûranîrîtie.

²¹Tontû arîte atîgûtigaria, ûthinyaari bwaawe bûgûkinya mûthia.

²²Rîrîa oombanîte mantûûne mono mathîîna no jamûgwete. Agwîrwe nî ûrito bunthe bwa mîthangîko.

²³Nî arîe oojûrie kîu ndoo Mûrungu akaamûtûrîkîria marûrû jaawe, amûûre mpûûrwa atoona

²⁴Akîgeria kûmatûka rûchiû rwa chuuma mûgwî jwa îturutia jûkamûratha.

²⁵Mûgwî jûmûrathe juumîîre rûteere rûngî, nako kamûthia kaaju karîa gakenakenaga kaumîîre îtemene. Oona ûu ooragwe nî kîmako.

²⁶Bionthe birîa amaathîte bikaathirua nawe wengwa athirue nî mwanki jûtîgwatîtue nî muntû, ningî jûthirie matigari ja nja yaawe.

²⁷Îgûrû rîkaumîria meeyia jaawe nayo nthîgûrû îmûkaane.

²⁸Into bia nja yaawe bionthe bikeenyangua bithirue bionthe ntukû ya îkanûkia rîa Mûrungu.

²⁹Rîu nîrîo îringa rîa muntû ûmûûî kuuma kîrî Mûrungu. Nakîo nîkîo kiigai kîrîa agaagîrwa nî Mûrungu.”