Read KIMERU BIBLE PROTESTANT EDITION Ayub 21 Bible Online

Ayub 21 - KIMERU BIBLE PROTESTANT EDITION bible

Ayub 21

¹Ayubu arabacokeria arauga atîrî,

²“Bûkëethîrwa nî bûkwenda kûmboreria nthikîîreeni bwega.

³Rekeeni mbarie, rîu no bwîte na mbere kûmeneeria.

⁴Ûûni tî muntû nkûnung'unira nîkîo gîtûmi nkûremwa nî kûûmîîria.

⁵Mpeeni meetho naabuî bûkaarigara bûkamakua nî jarîa bûkoona.

⁶Ûûni ningwa ndathûgaania ûrîa nkari ga nkûmaka, ngateetema mwîrî junthe.

⁷Nîmbi îtûmaga antû babaaî beethîrwa barî na ûtûûro bûbûraaja? Bakûraga bathinyaarîte mwanka bagatindira.

⁸Batûûraga mwanka bakoona aana baao bagîkûra na kinya nchiarwa cia aana baao.

⁹Nja ciaao itûûraga na thîîrî, na gûtî gîa gûkîra nawe Mûrungu atîbakanûkagia.

¹⁰Ndegwa ciaao ibaandaga ng'ombe îgiita riacio nacio ng'ombe ciaao iciaraga itîkuunithia njaû.

¹¹Barekagîîria aana baao bageeta gûceetha bakaina, bakîthûngathûngûthaga ta tûng'ondu.

¹²Bainaga bathingatîte kajû ga tamburini na wandîîndî, bakagwîrîrua mîtûrirû îrîa îkûringwa.

¹³Bakinyaga mûthia jwa ûtûûro bwaao bagakua na ukiri bathinyaarîte.

¹⁴Bo beeraga Mûrungu ‘Tigana naatuî! Tûtîkwenda kûmenya ûrîa weendaga.

¹⁵Ka Mweneinya arî ûû nîkenda tuî tûmûtumîkagîra? A-kinya twamûromba rî, nîmbi tûkoona?’

¹⁶Baugaga nîka bathithinîrîte ûtonga bwaao, îndî ûûni ntîkwenda kîrîra kîaao.

¹⁷Antû babaaî batîkuujangaga bo batîîjagîîrwa nî ûthûûku, Mûrungu atîbakanûkagia na mûthûûro.

¹⁸Kûrî rîo banyagagua nî ruuo ta rûûa, kana baurutwa nî kîbubani ta matî?

¹⁹Kuugagwa atî ‘Aana bakanûkagîrua meeyia ja aciari baao,’ îndî nî kaaba bakanûkîrîîtue meeyia jaao bongwa nîkenda bamenya nî beîîtie.

²⁰Nî kaaba bagakanûkua barî mwoyo ka baceme mûthûûro jwa Mûrungu Mweneinya.

²¹Muntû akua rî, oomba kwigîîrua antû ba nja yaawe kîaao?

²²Kûrî we ûûmba kwaa Mûrungu kîrîra? Mûrungu agambithagia kinya barîa barî îgweta mono.

²³Antû bamwe bakuujaga bathinyaarîte bagwîrîtue na batî na mîruuru.

²⁴Bakuujaga banori na maîndîîndî jaao jarî na maguta.

²⁵Antû bangî bakuujaga na mîthangîko nkoroone na bataacema kawega noo karîkû.

²⁶Îndî bonthe bakuujaga bakathikwa na bakarîîwa nî mang'inyo.

²⁷Nî nkûmenya mîbango îrîa bûmbangîrîte îrîa bûthûgaanîtie kûnthithîria.

²⁸Kuugagwa atîrî, ‘Mbonia nja ya muntû ûrî îgweta ûrîa ûthithagia ûthûûku!’

²⁹Ka bûtîûragia barîa baumaumagaraga gûntû kûngî bwigua? Kana ka bûtîîtîkagia ûkûûjî bwaao?

³⁰Bûrîngî bwijî atî muntû ûmûûî nî acaagîrwa îgiita rîa thîîna na agatuunyûkua kuuma kîrî îkanûkia rîa Mûrungu.

³¹Kûrî we waamûmenyithia ûthûûku bwaawe kana amûkanûkîria mantû jarîa athithia?

³²Kinya athikwa îrinyeene, mbîrîra yaawe nî ka îkaragua.

³³Mûthetu nî jûgwîragua kûmwambîrîria nakîo kîrîndî kîîthagîrwa kîrî gîkiingî mathikoone jaawe.

³⁴Nîatîa îndî buî bûûmba kûmboreria na nteto itî na gîtûmi? Gûtî ûntû bûtigeerie bwa kûmbîîra tiga nteto cia ûrongo akî.”