Read KIMERU BIBLE PROTESTANT EDITION Ayub 22 Bible Online

Ayub 22 - KIMERU BIBLE PROTESTANT EDITION bible

Ayub 22

¹Elifazi wa kuuma Temani arauga atîrî,

² “Nî umithio bûrîkû Mûrungu oonaga kuumania na muntû? Kinya muntû ûmûûme atîûmba kûmûguna.

³Kwîthîrwa muntû arî ûmwagîru kwoomba kûguna Mweneinya? Kana muntû kwîthîrwa atî îgi kwoomba kûguna Mweneinya?

⁴Ûriuga Mûrungu agûkanûkagia na gûkûgambithia nîûntû bwa ûrîa ûmwîtîkîtie?

⁵Anga tî ûntû bwa ûthûûku bwaaku ûrîa bwingîîte? Anga tî ûntû bwa ûrîa meeyia jaaku jatî mûthia?

⁶Nîkwîthîrwa gwe ûtuunyaga antû bangî nguû nîkenda irûngamîîra marandû jaao.

⁷Kinya barîa banyoonti ûtîbakundagia rûûjî na barîa beethagîrwa barî na mpara ûtîbarûmagia biakûrîa.

⁸Ûtuunyanaga ithaka kwa inya, na ûgatûûra ku.

⁹Aka ntigwa ûbeengaga njara intheri, na kinya twaana tûkuîri nî aciari nî ûtwinyagîîria.

¹⁰Tontû bûû, mîtego îkûthiûrûkîrîte nakîo kîmako gîakûûjûra o ntûti.

¹¹Nabu weerû bwaaku bweete muundu ûtîûmba kwona, narîo îkoondoria rîa rûûjî rîkûrimanîtie buru.

¹²Mûrungu anga tî îgûrû buru arî? Kinya njota irîa ciîthagîrwa irî îgûrû mono Mûrungu acionaga irî nthî yaawe.

¹³Amwe na bûu, gwe ûûragia atîrî, ‘Nîatîa Mûrungu aijî? Oomba gûtûgambithia aithi nî matu?

¹⁴Gwe uugaga nî akûnîkeenue nî matu atîûmba gûtwona, na eetagîîra mîthia ya îgûrû.’

¹⁵Nîka ûkwenda kûthingata mîîtîre îmîthûûku îrîa yaathingatagwa karaaja nî antû babaaî?

¹⁶Bo baakuujaga îgiita rîaao rîtîkinyi bagakoondorua o ta ûrîa mûguû jûkoondoragia nyomba.

¹⁷Bo beeraga Mûrungu ‘Tigana naatuî!’ Na bakauga ‘Kûrî u Mweneinya oomba gûtûthithîria bûbûthûûku?’

¹⁸Rîu bakuuga ûu, nîwe wîthagîrwa oojûrîtie nja ciaao mantû jameega. Îndî ni nî ndeganîte na kîrîra kîa bau baaî.

¹⁹Barîa baagîru boonaga bau bakîthaangîka bakagwîrua, na barîa batî îgi bathekaga boona ûrîa bau baaî bakanûkagua.

²⁰Bakauga, ‘Nî mma anthû beetû bakûthirua nabio into biaao bienyangua nî mwanki.’

²¹Nandî rî, cwaa thîîrî na Mûrungu nîrîo ûkoomba kwona wega kaîrî.

²²Thikîîra ûritani bwaawe na wîke mantû jau nkoroone yaaku.

²³Këethîra ûgacoka kîrî Mweneinya winyiiyie kîrî we, naagwe ûthirie mantû jamathûûku jonthe jarîa jathithagua nja yaaku,

²⁴ningî ûgere thaabu yaaku mûthetuune ûte thaabu îrîa njega mono maigeene ja mûuro,

²⁵ûeethie Mweneinya thaabu yaaku, ûmweethie fetha yaaku îrîa njega buru,

²⁶rîu Mweneinya agatûma ûgwîrague na ûkoombaga kûmwîrîgagîîra.

²⁷Ûkamûrombaga nawe agakwigagua naagwe ûkoombaga kûûjûragia mîciîtio yaaku.

²⁸Mantû jarîa jonthe ûkaathithagia jakagîraga. Nayo mîîtîre yaaku îkaa ya weerû.

²⁹Mûrungu ekîrithagia aikumia nthao na akoonokia barîa bainyiagia.

³⁰Kinya barîa batîagîrîte nî boonokagua baambîrîîria kûthithia mantû jarîa jaagîrîte.”