Read KIMERU BIBLE PROTESTANT EDITION Ayub 24 Bible Online

Ayub 24 - KIMERU BIBLE PROTESTANT EDITION bible

Ayub 24

¹Nîkî gîtûmi Mweneinya atîîkaga îgiita rîa gûtua magamba? Nîkî gîtûmi barîa bamûthaathagia batîonaga ntukû ya îgamba?

²Antû barîa baaî beetaîtithagia mîanka bagîtuunyana ithaka. Baiyaga ndîîthia cia antû bangî bageeta kûmenyagîîra ndîîthia iu.

³Bajûkagia ntigiri cia aana barîa batî na aciari bageeta nacio na bakajûkia ndeegwa ya mûka ntigwa nîûntû bwa îraandû.

⁴Bathaamagia nkîa njîreene buru athîîni bonthe nthîgûrûûne bagatua gwiciithaga.

⁵Atîrî, nkîa icwagîra aana baacio biakûrîa rwanda o ta ûrîa ntigiri cia kîthaka icwaga ndûmo rwanda.

⁶Nkîa iicwagîra ndûmo miuundeene ya barîa baaî bakoothûranagia nzabibû miuundeene ya antû babathûûku.

⁷Bararaga ûtukû bunthe barî kîthûnû batî nguû batî na gîa kwiguîkîra nakîo mpioone.

⁸Nabo bauragîrwa nî ngai înene barî irîmeene, bakainya buru bagaituma maigeene bagîcwaa kîraro.

⁹Barîa baaî bajûkagia aana barîa batî na aciari bakabarita nyontoone bakajûkia aana ba antû nkîa nîkenda barûngamîîra îraandû

¹⁰Nkia nacio ciîtaga kîthûnû itî nguû irî na mpara no ikamatîte imaanja bia nkano.

¹¹Bakonyoraga nzeituni cia barîa baaî bakarita maguta, bagacoka bagootora nzabibû imiiriine îndî bo bagatigwa banyoonti.

¹²Kîrîro kîa barîa bagûkua nî gîkwigîîgua ntûûreene nabo barîa beekîri ngûma nî bakuuga mbu bateethua. Îndî Mûrungu atîtindanagîra na maromba jaao.

¹³Îndî kûrî barîa batîendeete weerû nabo nî barîa batiijî weerû nabo nî barîa batîendaga gûtongeerua nîbu.

¹⁴Mûûragani ookagîra kûrî na muundu kenda ooraga nkîa na barîa athîîni. Ningî ûtukû mûûragani aejaga mwamba.

¹⁵Kinya mûthûngîîri eetagîîra mwanka akoona gwatuka, nawe akauga, “Gûtî we ûkambona” rîu akathûngîîra na mûka kana ntomûrûme waitha.

¹⁶Ûtukû nîrîo aamba baunaga nyomba ciaitha, mûthenya bagatinda baciingîrîte. Batîendaga kwonana na weerû.

¹⁷Beendeete muundu nkûrûki ya weerû nîkwîthîrwa bo nî bamenyeretie muundu.

¹⁸Ayubu nawe arauga atîrî, “Gwe ûugaga atî, barîa baaî bakondoragua nî mûguû, nayo nthîgûrû îrîa baigwatîrîte nî îndume. Nabo nî batigîte kûrîma miuunda yaao ya mîzabibû.

¹⁹O ta ûrîa mûû na mûruutîra bithiragia nkamia, nîu gîkuû kîthiragia eeyia.

²⁰Bang'ina booragîrua nîbo najo mang'inyo jakoona biakûrîa. Barîa baaî bang'aûkaga ta mîtî yunîkangi.

²¹Gûgakara ûu nîûntû bwa kwagîra aka nthata nthoni kûrega kwigîîrua aka ntigwa kîaao.

²²Îndî Mûrungu nî athiragia inya ya barîa barî inya kinya baakara ta bakûthinyaara, bathiragîrwa nî wîrîgîîro bwa ûtûûro.

²³Mûrungu atûmaga bagaciigua barî kiindajî îndî agakara ategeete mîîtîre yaao.

²⁴Barîa baaî bagîîjaga îgweta îgiita rîrîkai îndî bakathira ntûti, banyaaraga ta îria rîrîmi kana kîmera gîkethi.

²⁵Nûû ûkwenda kuuga jau tî ja mma oonanie jau ndauga nî ja ûtheri?”