Read KIMERU BIBLE PROTESTANT EDITION Ayub 27 Bible Online

Ayub 27 - KIMERU BIBLE PROTESTANT EDITION bible

Ayub 27

¹Ayubu nî eetîre na mbere na rwaria rwaawe arauga atîrî,

²“Nî ngûciîtia na riîtwa rîa Mûrungu ûrîa ûtwîre mwoyo, We ûregeete kûnthithîria ûrîa kwagîrîte, Mweneinya ûrîa ûmbigithîtie mûrimo nkoroone,

³ndîîciîtia atî rîrîa rîonthe nkethagîrwa ndî moyo, na Roho wa Mûrungu arî ndeene yaakwa,

⁴mîromo yaakwa îtîkoroaria ûntû bûbûûî kana rûûme rwaakwa rwaria ûrongo.

⁵Gûtî rîo gûgaakinya mbuga bûkwaria ûûma. Ntîkarîtiga kuuga atî ntî na bwa kûgutîrwa mwanka rîrîa ngaakua.

⁶Ngeeta na mbere kuuga ndî ûmwagîru. Gûtî ntukû noo îmwe ûtûûroone bwaakwa nkaigambithia nkoroone yaakwa.

⁷Mûnthû waakwa arokanûkua o ta ûrîa muntû ûmûûî akanûkagua. Ûrîa ûrûjaga naani kinya we arokanûkua o ta ûrîa barîa batîagîrîte bakanûkagua.

⁸Tontû rî, ni wîrîgîîro bûrîkû muntû ûtiijî Mûrungu atigagwa nabu rîrîa Mûrungu akajûkia mwoyo jwaawe?

⁹A Mûrungu rî, oomba kwigua gûkaya kwa muntû ta ûu rîrîa mîthangîko îkamwîjîîra?

¹⁰A-muntû ûu mûûî rî, oomba kwenda Mweneinya? A we kwombîka akarombaga Mûrungu magiita jonthe?

¹¹Rekeeni mbûritane ûrîa Mûrungu aritaga ngûgî, ntîbuitha mîbango ya Mweneinya.

¹²Atîrî, buî bwinthe nî bûcionereete mantû jau. Nîkî îndî ûntû bûkwaria nteto itî kîrîkî?”

¹³Gankwîre ûrîa Mûrungu akanûkagia barîa baaî, na ûrîa antû babathûûku bakanûkagua nî Mweneinya.

¹⁴Kinya aana baao bakëeja kwingîa bagacoka booragîrwe ndweene. Nacio nchiarwa ciaao itîonaga irio bia kung'ana.

¹⁵Nabo bangî barîa bakeethîrwa batigeere bakooragwa nî mîrimo, nacio ntigwa itîrîrîra aana baao itîonaga kaanya ga kûbarîrîra.

¹⁶Kinya bakoothûrania fetha inyiingî ta tîîri, na bakarûûndanîîra nguû inyiingî ta mûthetu;

¹⁷nî barûndanîîre mma îndî igeekagîrwa nî barîa baagîru. Ningî nî boothûranagie fetha îndî ikaagagoa nî barîa eetîkua.

¹⁸Baciakagîra nyomba itî na inya ta nyomba cia mbûbûî, ikari ta kagaanda ka mûkaria wa muunda.

¹⁹Bamamaga barî itonga îndî bagîûkîîra ûtonga bwaao bûkeethîrwa bûthiri.

²⁰Imakania bikabakoondoria ntûtî o ta mûguû. Ûtukû bakajûkua nî kîbubani beetîwe nabo.

²¹Naru ruuo rwa bwa gaiti rûkabaojaojania rûkaabate rûbathaamie buru kuuma arîa batwîre.

²²Rûkabaringa rûtî na kîaao bageria kûrûmatûka bakarwîthîra.

²³Naru rûkabaringaringîra mpîî rûkîbacikûûraga rûrî o arîa rûkaraga.