Read KIMERU BIBLE PROTESTANT EDITION Ayub 28 Bible Online

Ayub 28 - KIMERU BIBLE PROTESTANT EDITION bible

Ayub 28

¹Kûrî naarîa fetha îînjagwa na kûrîa thaabu îtheragîrua.

²Chuuma îritagwa mûthetuune narîo îturutia rîgakerûrwa kuuma gîkameene.

³Antû barîa beenjaga maiga ta jau beenjaga bamûrîkîte bakajarita ndeene kûraaja.

⁴Antû bau beenjaga ikurungu igwanthîîne kûraaja kuuma kûrîa antû batûûraga na kûraaja kuuma kûrîa antû beetagîîra bakeenja maiga bacuuracuurîte na mîkanda.

⁵Nthîgûrû kûrîa antû batûûraga nî kwaandagwa imera îndî nthîgûrû ndeene maiga jaatûrangagwa na mwanki.

⁶Kûu nthîgûrû nîku kwonekaga maiga ja rangi ya wiirû bwa îgûrû, na thaabu nîku yuumaga.

⁷Njîra îrîa îtumagîrwa gûtonya kûrîa maiga jau jeenjagwa îtîîtagîîrwa nî nyoni ndîîi nyama.

⁸Nyamû ing'eentu itamîkinya na gûtî ngatûnyi yeetîîra njîra îîu.

⁹Antû barîa beenjaga maiga, baatûraga kinya maiga jarîa moomo mono bakatheethera irîma baumîte bwa nthî.

¹⁰Batûraga tûjîra kûu maigeene bakoona maiga ja goro jarîa jarî ku

¹¹Beenjaga bagakinya kûrîa ndûûjî ciumaga ningî bakaumîria birîa birî withoone.

¹²Îndî nîkû ûmenyo bwonorekia? Nîkû ûûme buumaga?

¹³Gûtî muntû wiijî kûrîa ûûme buumaga, nabu bûtîonekaga kûrîa barîa barî mwoyo batûûraga.

¹⁴Mborokeri ciugaga “Bûtî kîrî ni.” Îria narîo rîkauga “Ûûni ntî na bu.”

¹⁵Bûtîûmba gûkûranua na thaabu, na bûtîûmba kûgûrwa na fetha.

¹⁶Bûtîûmba kûgûrîka na thaabu ya Ofiri, kana na maiga ja goro ja onikisi kana na maiga ja goro ja rangi ya wiirû bwa îgûrû

¹⁷Thaabu na maiga ja makengi bitîng'ananua nabu, na bûtîûmba gûkûranua na thaabu îrîa ntheru.

¹⁸Bûtîûmba kûgwetanîrua na maiga jarîa jeethagîrwa jarî rûteere rwa îria kana twiga twa goro twa makengi. Ûgûri bwaabu nî nkûrûki ya maiga ja goro ja rangi intuune.

¹⁹Maiga ja goro ja kuuma Ethiopia ja rangi ya mûkûjûni jatîûmba kûng'ananua nabu, ningî bûtîûmba gûkûranua na thaabu îrîa ntheru buru.

²⁰Nîkû îndî ûmenyo bwonorekia? Nîkû ûûme buumaga?

²¹Bwithi ûrîa bûtîûmba kwonwa nî barîa bonthe barî mwoyo, na bwaithwa ûrîa bûtîoneka nî nyoni.

²²Gwa akuû kuugaga atîrî, “Ni mbigîîtue rûguutû rwa ûmenyo na matû jaakwa.”

²³Mûrungu akî nîwe wiijî njîra yaabu ningî nîwe ûmenyaga kûrîa bûkaraga.

²⁴Nîkwîthîrwa wee oonaga mwanka mîthia ya nthî na nî oonaga bionthe birîa birî rungu rwa riûa.

²⁵Rîrîa aaeejaga ruuo ûrito bwaaru, na aathimaga rûûjî na kîthimi,

²⁶rîrîa aaritaga waatho bwa kwoneeria ngai narîa îkaura rîrîa oonagîîria matu ja ngai naarîa jageetagîîra,

²⁷nîrîo aathimîre aroona gîtûmi kîa ûmenyo nîrîo aabûrikîrie arabûtharima.

²⁸ Mûrungu areera muntû ûjû, “Atîrî, gûkîra MWATHANI nîbuûûme, na gûtigana na ûthûûku nîbu ûmenyo.”