Read KIMERU BIBLE PROTESTANT EDITION Ayub 29 Bible Online

Ayub 29 - KIMERU BIBLE PROTESTANT EDITION bible

Ayub 29

¹Ayubu nî aambîrîîrie kwaria kaîrî arauga atîrî:

²Wûi këethîra ndakara ûrîa ndaakari mbereene, ngakara ûrîa ndaakari rîrîa Mûrungu aankaragia.

³Kûrî rîo Mûrungu aamûrîkagîra kinya ndeetîîra muunduune.

⁴Wûi ngakara ta ûrîa ndaakari rîrîa ndaathinyaarîte rîrîa Mûrungu eethagîrwa arî mûcoore aakarîtie nja yaakwa.

⁵Nîrîo Mweneinya eethagîrwa arî amwe naani rîonthe na aana baakwa baakaraga akuî naani.

⁶Nîrîo ndaathambaga na îria na nkeethîrwa ndî na maguta jamaingî ja zeituni.

⁷Nîrîo ndaaumagaraga ngeeta mpingîroone ya ntûûra, ngakara na bangî kîaragoone.

⁸Antû babeethî baambonaga bakabebaebera na barîa akûrû bakarûngama bagîmpa gîtîîo.

⁹Atongeeria baagitagîra ndwaria ciaao, bagakira bagakiinda matû.

¹⁰Antû ba îgweta baragia na kîoe bamboona bagakira batîgûtumûra tûnyua.

¹¹Barîa baigagua mantû jaakwa nîka baantharimaga, nabo barîa boonaga jarîa nkûthithia bageetîkania najo.

¹²Nîkwîthîrwa nî ndaatunyûkagia nkîa îrîa cieethagîrwa irî thîîneene, na ngateethia aana barîa beethagîrwa bakuîri nî aciari.

¹³Antû barîa bathangîkaga mono nî ka batharimaga naani nî ndaatûmaga aka ntigwa bakagwîrua nîûntû bwa ûrîa ndaabateethagia.

¹⁴Ndeekagîra waagîru ta nguû na ngeekîra îota ta rwambambio kana kîremba.

¹⁵Kîrî atumuumu ndaakari ta meetho na kîrî ithua ndaakari ta magûrû.

¹⁶Ndaakari ta îthe wa nkîa na ndaatetagîîra kinya barîa ntaijî magambeene.

¹⁷Ndaaunangaga maîgo ja barîa baaî ngatunyûkia barîa baarûmi.

¹⁸Rîu ndaithûgaanagîria atî ngatûûra ûtûûro bûbûraaja nthinyaarîte, nkuîre nja yaakwa ndî ntindiri.

¹⁹Ndaakari ta mûtî jûrî na mîri îmîraaja îînamîte nthîgûrû rûûjîîne na jûrî na mpang'i igwatagia îme ûtukû bunthe.

²⁰Ndaakaraga ngîkumagua magiita jonthe, na gûtî rîo ndaagaga inya.

²¹Antû baakaraga beeteerete mbaarîria bagakira bakathikîîra nkîbaatha kîrîra.

²²Ndarîkia kwaria, gûtî we waacokaga kwaria kaîrî, nteto ciaakwa ciaabatonyaga bwega.

²³Baambetagîîra ta ûrîa beetagîîra ngai bakanyoontera ta ûrîa nthîgûrû înyoontagîra ngai ya mûratho.

²⁴Ndaabeekagîra nkerû kinya rîrîa baagîîte wîrîgîîro boona ngwîrîîtue bakagîa ûchamba

²⁵Ndaaboonagia njîra ya gwîtîîra rîu ndaakarî ta mûnene waao. Ndaakari ta mûtongeeria ûrûngamîrîte njûûrî yaawe, kana ta muntû ûkûboreria barîa bakuîri.