Read KIMERU BIBLE PROTESTANT EDITION Ayub 3 Bible Online

Ayub 3 - KIMERU BIBLE PROTESTANT EDITION bible

Ayub 3

¹ Nyuma ya ûu Ayubu aratumûra kanyua kaawe araruma ntukû îrîa aaciarîrwe

²arauga atîrî,

³“Ntukû îroûra îrîa ndaaciarîrwe, na kinya ûtukû bûrorima buru bûrîa bwaugîre ‘Îu nî rîa kaîjî.’

⁴Ntukû îîu îrogarûka îkaa muundu! Mûrungu arî kûu îgûrû aroorîrua nîyo, na kinya weerû bûkáromîthaarîra.

⁵Muundu jûmûnene ta jwa gîkuû jûrokunîka ntukû îîu îkaa jaaju îrotûûra îkunîkîri nî îtu ntukû îîu îromakua buru nî ûrûrû bwaayo.

⁶Nabu ûtukû bûu bûrogwatwa nî muundu jûmûrito! Bûrotiga gûtaranîrua na ntukû cia mwaka mîeri îgîtarwa bûkéthagîrwa bûrî o.

⁷Îî ûtukû bûu bûrothaata bûtîkoone ûngî; Bûroaga kajû ga nkerû ka rûkemi.

⁸Arogi barîa boombaga kûruma mûthenya, baroruma ûtukû bûu, barîa barî inya gûûkaûkia kinya nyamû ya rûûjî îrîa îtagwa Leviathani baroruma ûtukû bûu.

⁹Njota cia gûkea kwaabu iroaga weerû bûrweteera weerû nabu bûkaûra buru bûkoroona weerû bwa riûa rîkiuma.

¹⁰Nîkwîthîrwa bûtaaingîre kîu kîrîa gîanciarîre, kana bûrigîîria ntîkoone mathîîna.

¹¹Nîmbi yaatûmîre ndega gûkua ngîciarwa, ntiga kweena nkiuma kîu o rîo?

¹²Nîmbi yaatûmîre mpaambîîrua bieroone kana mbona nyonto cia gwonka?

¹³Këethîra nî ndaakuîre ndîngî kwîthîrwa mami ntî na mûruru, ndîngî kwîthîrwa mami nogoki.

¹⁴Mami amwe na anene na athani ba nthî, barîa baakîte maganjo kaîrî nîkenda batûûra ku.[1]

¹⁵Kana mami amwe na atongeeria barîa baarî na thaabu, barîa boojûrîîtie nyomba ciaao fetha.

¹⁶Kana nîmbi yaatûmîre ndega gûciarwa ndî kiuno nkara ta nkenke îthiki îrîa îtoona weerû?

¹⁷Mbîrîreene, barîa athûûku batîthîînagia bangî, na barîa banogi nî banogokaga.

¹⁸Kûu athaîkwa batûûraga banogoki, batiigagua kûgondoka kwa aritithia ngûgî ba antû.

¹⁹Kûu, barî îgweta na batîrîo no ûmwe, na nkombo îtî waathoone bwa mwathi waayo.

²⁰Nîkî tontû muntû ûkûthîîna oonaga weerû, na ûrîa ûrî na ûrûrû nkoroone atûûra mwoyo?

²¹ Ûrîa ûnyoontagîra gîkuû îndî gîtîîje, agagîcwaa nkûrûki ya muntû ûgûcwaa gîntû kiithi kîa bata mono.

²²Antû ta bau bagwîragua na bagakena mono boona mbîrîra.

²³Nîmbi tontû muntû ûtîkwoona amûrîkagîrwa njîra, ûrîa Mûrungu eethagîrwa aingîrîte na rwego?

²⁴Tontû gûkaya nîku irio biaakwa nakîo kîrîro gîaakwa gîkanyûûrûka ta rûûjî.

²⁵Ûntû bûrîa nkîrîte nîbu bûmbîjîrîte, Nabu bûrîa bûmbîkagîra ûguaa nîbu ndî nabu.

²⁶Ntîkari bwega na ntiurûki, ntî na kînogoko nî mîthangîko yonka îkûmbîjîîra.”