Read KIMERU BIBLE PROTESTANT EDITION Ayub 30 Bible Online

Ayub 30 - KIMERU BIBLE PROTESTANT EDITION bible

Ayub 30

¹Îndî nandî mpeete gîntû gîa kûthekerwa kinya nî antû babaanake kîrî ni barîa beethe baao baarî antû ba ûtheri mono nkûrûki ya kurû irîa ciaandîthagîria.

²Nî ngûgî îrîkû barîngînditîra, antû baathirîri nî inya buru?

³Baatîki nî thîîna na mpara bagaceng'a beetaga gûcwaa gîa kûrîa gûtîtûûri nî antû.

⁴Baarîîjaga mabûûra na matî, bakarîa mîri ya mîtî nîkenda mîîrî yaao îgia mûruutîra.

⁵Beengagwa buru kuuma kîrî antû bangî Ningî beengagwa bakiugagîîrwa mbu ta aamba.

⁶Nabo baatûûraga ikurunguune bia ndûûjî, na marinyeene na mîanyeene ya maiga.

⁷Baakaraga mathakeene bagiikaagîra baikûthanîrîte amwe miigueene.

⁸Antû bootheri batî îgweta baagûrûkagua bakeengwa nthîgûrûûne buru.

⁹Îndî nandî nî ni bainaga ndwîmboone ciaao bagatua kweejanaga rûgono rwaakwa.

¹⁰Baamenere barambîrûkîra buru na bataigagua nthoni bakîngera mînyîrî.

¹¹Tontû Mûrungu nî atûmîte nkaaga inya gûtî u beenda kûnthithîria batînthithîrie.

¹²Bambithûkagîra barî gîkundi bakeengana naani bakîendaga kûnthiria

¹³Baingîte njîra cionthe ntîkoone a kûmatûkîîra nabo nî booneete kaanya ga kûnthiria buru na gûtî we ûbakaanagia.

¹⁴Baantonyeerete ta ntûûra îrî na rûthingo rûrî na makutho, bampingiritîra banthiria buru.

¹⁵Imakania bimpumbîte buru gîtîîo gîaakwa kîthirîte ta kiuruti nî ruuo, ûthinyaari bwaakwa bwakûrûka ta îtu.

¹⁶Nandî ka ûtûûro bwaakwa bûrî akuî kûthira, nkûthangîka îgiita rîrîraaja, nandî ndîkûûmbwa.

¹⁷Ndaaraga gûkangaatwa nî mîîndîîndî, nabu ûrûrû bûrîa bûndîîjaga bûtî mûthia.

¹⁸Mûrungu athûûkangîtie gîkoonde kîa mwîrî jwaakwa aakînyang'inyûranga buru.

¹⁹Mûrungu angereete ntakeene ndaa ntaka akî.

²⁰Ndîgûkaîra îndî gwe ûtîkûmbigua ndaakûromba no meetho ûmpeete

²¹Ûnthûûkîrîte waa ûmûûî kîrî ni, wampûûra na inya yaaku yonthe.

²²Gwe ûrîmbûkîîria îgûrû ruuoone watumîra kîbuubani kûngeragera îgûrû.

²³Îî nî mbijî ûmbîkîîtie gîkuûne kûrîa bonthe beetaga.

²⁴Anga muntû ûrî thîîneene atîaraga njara akîromba ûteethio?

²⁵Ûûni nî ndaarîraga ndoona ûrîa antû baathîînaga nkaigua bûbûûî nkoroone ndoona nkîa.

²⁶Ndeerîgagîîra wega îndî nkoona wûûî ndeeteera weerû muundu jûkeeja.

²⁷Nkoro yaakwa îthîînîte mono îtîkwona thîîrî, naani nthangîkaga ntukû cionthe.

²⁸Mbîtagîîra muunduune nî kwaga weerû, ndî kîameene no ûteethio ndoombaga.

²⁹Ntûûraga kûrîra ta mbwee nkaithikîîra ta ntuuntuguru.

³⁰Gîkonde kîa mwîrî jwaakwa kîriiroa gîgatuîkanga gîkagwa nayo mîrûitû yaakwa nîka îkwîîthua nî rwakaî.

³¹Ndwîmbo ciaakwa nandî nî cia kîrîro ndwîmbo cia kwithikîîra nîcio mbinaga.