Read KIMERU BIBLE PROTESTANT EDITION Ayub 32 Bible Online

Ayub 32 - KIMERU BIBLE PROTESTANT EDITION bible

Ayub 32

¹Nabo acoore barîa bathatû ba Ayubu nî baikirîîre baratiga kûmûcokeria noo atîa, nîûntû Ayubu nî aacionaga aagîrîte.

²Îndî Elihu ûrîa waarî au athikîîrîte nteto irîa baaragia nî aathûûrîre mono. Nawe aathûûrîrue nî Ayubu nîûntû bwa gûciona arî ûûmeene na akanung'unira Mûrungu. Elihu aarî mûtaana wa Barakeli. Barakeli aarî wa rûrîîjo rwa Buzi, na mûciî jwa Ramu.

³Elihu nî aathûûrîrue nî acoore ba Ayubu bo bathatû nîûntû bwa kwaga bwa gûcokeria Ayubu kinya këethîra nî baugaga arî na maatia.

⁴Elihu nîwe waarî ûmwanake kîrî bau bangî na nîkîo gîtûmi aakirîre baraamba kwarîria Ayubu.

⁵Elihu akwona atî antû bau bo bathatû gûtî ûntû bakwîra Ayubu, aragwatwa nî mûthûûro.

⁶Nawe Elihu araaria arauga atîrî: Ûûni ndî ûmwanake naabuî bûrî babakûrû kîrî ni, nîkîo kîratûmaga nkîra kûbwîra ûrîa nkûthûgaania.

⁷Ndîraugîîte atîrî, “Barakûrakûra, ka baeejane kîrîra.”

⁸Îndî menyeni atî muntû arî roho ndeene yaawe kuuma kîrî Mweneinya ûrîa ûtûmaga amenya mantû.

⁹Tî ûkûrû bunka bûtûmaga antû bagîa ûûme ningî tî barîa akûrû bonka barî ûmenyo.

¹⁰Tontû bûû, ndîbwîra atîrî, Nthikîîreeni kinya ni mbuge ûrîa nkûthûgaania.

¹¹Nî ndîrathikîîrîte bwega rîrîa bûraaragia bûgîcwaga biugo bia ûmenyo.

¹²Ndîrabûthikîîrîre buru ndaigua gûtî we weenu ûroomba kwonania maatia jarîa Ayubu arî najo kana noo amûcokeria nteto ciaawe.

¹³Imenyereni bûtîkeeje kuuga “Nî tûgîîte ûmenyo, rekeeni Mûrungu amûcokerie nîûntû nî bûremi.”

¹⁴Tî ni Ayubu aareeraga mantû naani ntîmûcokeria ûrîa bûramûcokagîria.

¹⁵Bûkûriita buru, bwaaga ûntû bwa kuuga.

¹⁶Ga ngakara mbeteereete na bûtîkwaria na nîka bûrûngami au ki gûtî u bûgûcokia?

¹⁷Nandî ka mbarie kinya ni mbuge ûrîa nkwona.

¹⁸Ndîîna mantû jamaingî ja kuuga najo nî jambatîkîte mono.

¹⁹Nkëeja kwaga kaanya ga kwaria ndaataambûka ta gîkîri kîrî na ndibei îtî na a kûritîîra mîrukî.

²⁰No mwanka mbarie kenda nogoka no mwanka ntumûre mîromo mbuge ûntû.

²¹Gûtî muntû nkeendeera nkûrûki ya ûngî, kana mûkaathîrîîria o ûu ûtheri.

²²Nîkwîthîrwa ntiijî gûkaathanîîria nîûntû nkathithia ûu nîka Mûrungu anthiria buru.