Read KIMERU BIBLE PROTESTANT EDITION Ayub 34 Bible Online

Ayub 34 - KIMERU BIBLE PROTESTANT EDITION bible

Ayub 34

¹Elihu nî eetîre na mbere kwaria arauga atîrî:

²“Thikîreeni ûrîa nkuuga buî barîa bûrî na kîrîra bûnkindîre gûtû buî barîa bûrî ûûme.

³Nîkwîthîrwa gûtû nîku kwathûranaga nteto o ta ûrîa rûûme rwathûranaga mûchemo jwa biakûrîa.

⁴Ga tûthuure jarîa jarî ûûmeene, tûtegeere bwega tûmenye jarîa meega.

⁵Nîkwîthîrwa Ayubu ariuga ‘Ûûni ntî na îgi. Îndî Mûrungu atînthithîrîtie ûrîa kwagîrîte.

⁶Ntarîîtwe ndî mûrongo kinya këethîra ndî ûûmeene. Iringîrwa birîa ndî nabio bitîûmba kwora kinya ndeethîrwa ntiunîîte Waatho.’

⁷Nî muntû ûngî ûrîkû ûkari ta Ayubu? We woonaga gûkurunga Mûrungu bûrî ûntû bûbûûthû o ta kûnyua rûûjî.

⁸We akaraga gîkaroone kîa barîa baaî na ageetania na barîa bathithagia ûthûûku.

⁹Ningî we augîte ‘Muntû atîgunagwa nî kwenda kûmenyana na Mûrungu.’

¹⁰Tontû bûû, nthikîîreeni buî antû baboome. Mûrungu atîûmba kûthithia ûthûûku; kana Mweneinya aangaratania mantû.

¹¹ Nîkwîthîrwa Mûrungu arîaga muntû kûringana na mathithio jaawe na akamûkanûkia kûringana na mîîtîre yaawe.

¹²Menyeni na mma atî Mûrungu atîthithagia wûûî, Mweneinya atîgarûraga îota.

¹³Nûû ûmûnenkerete nthî amûmenyereera? Kana nûû ûnenkanîrîte nthîgûrû yonthe kîrî we?

¹⁴Akëeja kwenda kûjûkia mîrukî yaawe, îrîa îtûmaga tûtûûra mwoyo,

¹⁵antû bonthe bathira o rîmwe bagakua bagacoka mûthetuune.

¹⁶Këethîra ûrî ûûmûûme thikîîra ûrîa nkuuga.

¹⁷Mûrungu akëethîrwa athwîre ûûma oomba kwaathana? Nîkî îndî ukûmûtuîrîîra mantû.

¹⁸We nî agiitagîra anene barîa bathithagia wûûî îgamba bûbûthûûku na akagambithia atongeeria barîa bathithagia ûthûûku.

¹⁹We ationanagia akîendeera anene kana oonania akîendeera itonga nkûrûki ya nkîa, tontû bonthe nowe woombîre.

²⁰Antû ba îgweta bakuujaga o ntûti, bakuujaga ûtukû batîîrîgîîrîte Mûrungu atîonaga kûrî na inya akîbathiria.

²¹Mûrungu nî oonaga jarîa jonthe muntû athithagia na nî oonaga mîîtîre yaawe yonthe.

²²Gûtî muundu, kinya jûmûnene atîa jûûmbîkia kwitha antû babaaî batîkoonwe nî Mûrungu.

²³Nîkwîthîrwa Mûrungu atî na ûbatu bwa gûtûa ntukû ya kûgambithia muntû.

²⁴Ebaebagia atongeeria atîambîîte gûcûûnkûûna mantû jaao, na agatûma antû bangî bagatongeeria antûûne a bau.

²⁵Nîkwîthîrwa nî aijî ûrîa bathithagia nî athiragia waathani bwaao na ûtukû bûmwe.

²⁶Abakanûkagia nîûntû bwa ûthûûku bwaao antû bangî bategeete;

²⁷na nîûntû bo nî bagarûkîîte baatîga kûmûthingata na batîtindanagîra na maathana jaawe.

²⁸Tontû bûû, nî batûmîte kîrîro gîa nkîa kîmûkinyîra, nawe nî aigîîtue gûkaya kwa barîa bathîîna.

²⁹Îndî Mûrungu akëenda gûkira rî, nûû uuga nî athithîtie bûbûthûûku? Akärega gûcionania kîrî bo rî, kûrî muntû kana mûgongo jûmwona?

³⁰Gûtî u mûgongo jûûmba kûthithia jûtîkaathwe nî muntû ûmûûî ûtîkîraga Mûrungu.

³¹Ayubu, ûbuîrîte kuumbûra meeyia jaaku kîrî Mûrungu na ûgaciîtia atî ûtîjacokera kaîri.

³²Ûûria Mûrungu akwonie meeyia jaaku, ûtîkeeje kûjathithia kaîrî.

³³Nîkwîthîrwa nî ûreganîte na jarîa Mûrungu athithîtie rî, nîka ûkwenda athithia ûrîa ûkwenda? Ntîkûgiitîra îgamba, giita gwengwa ûtwîre ûrîa ûkwona kwagîrîte.

³⁴Antû barîa barî ûûme bageetîkania naani, barîa barî ûmenyo bakauga atî,

³⁵Ayubu arîaria atîkûmenya ûrîa akuuga na nteto ciaawe nî cia waa.

³⁶Nî kaaba Ayubu ageeta na mbere kûthangîka mwanka mûthia nîûntû mûcokerie jwaawe jwa biûria nî ta jwa muntû ûmûûî.

³⁷Nîkwîthîrwa arîongeera irema îgûrû rîa meeyia jaawe agîcikûûraga Mûrungu arî mbere yeetû.”