Read KIMERU BIBLE PROTESTANT EDITION Ayub 35 Bible Online

Ayub 35 - KIMERU BIBLE PROTESTANT EDITION bible

Ayub 35

¹Elihu nî eetîre na mbere kwaria arauga atîrî,

²“Nîka ûkwona kwagîrîte kuuga atî ûtî na yaatia mbere ya Mûrungu?

³Ningî ûriuga atî warega kwîyia gûtî umithio ûkoona.

⁴Ûûni Elihu ngaacokia biûria biaaku, na ncokie kinya bia acoore baaku.

⁵Kûnîîra îgûrû na ûrîtege bwega ûraithîrie ûrîa matu jarî îgûrû rîaaku.

⁶ Kwîyia gwaaku gûtî u kûthithia Mûrungu kinya maangaratania jaaku jakaingîa jatîmûthûûkia.

⁷Wëethîrwa ûrî ûmwagîru rî, nîmbi Mûrungu oonaga kuuma kîrî bu; kana nîmbi ûmûteethagia nayo?

⁸Nî antû akî boomba kûthûûkua nî meeyia jaaku na nîbo boomba kûgunwa nî waagîru bwaaku.

⁹Antû barîraga bainyîîrua mono bagaikaîra bagîcwaa ûteethio.

¹⁰Îndî gûtî muntû ûûragia, ‘Arîkû Mûrungu ûrîa waampûûmbîre! We ûrîa weejanaga wîrîgîîro îgiiteene rîa thîîna.

¹¹We atweete ûûme nkûrûki ya nyamû cia kîthaka na atûûmîyia nkûrûki ya nyoni.’

¹²Barîa baaî baikaagîra îndî Mûrungu atîbaigagua nîûntû bwa rwikumio rwaao.

¹³Nî mma kîrîro nî kîa ûtheri Mûrungu Mweneinya atîûmba gûkiigua.

¹⁴Nî mma kinya gwe atîkûthikîîra nîûntû ûtîgweteera akûgiitîra îgamba!

¹⁵Ûrîthûgaania atî Mûrungu athûûra atîkanûkanagia, kana anogua nî meeyia ja antû?

¹⁶Ûtîkûmenya ûrîa ûkuuga na nteto irîa cionthe warîîtie nî cia ûtheri!”