Read KIMERU BIBLE PROTESTANT EDITION Ayub 36 Bible Online

Ayub 36 - KIMERU BIBLE PROTESTANT EDITION bible

Ayub 36

¹Ningî Elihu nî eetîre na mbere kwaria, arauga atîrî,

²“Ûkánoga nthikathikîîra anini nkwîre nîûntû kûrî bu nkwenda gûkwîra antûûne a Mûrungu.

³Nkaeejana kîrîra gîkiingî kîrîa ndî nakîo mbonanie waagîru bwa mûûmbi waakwa.

⁴Nî mma nteto ciaakwa tî cia ûrongo, naani ûkwona ndî mbere yaaku ndî na kîrîra gîa kûng'ana.

⁵Atîrî, Mûrungu nî Mweneinya, na gûtî we amenaga, agiitanagîra magamba ûrîa kwagîrîte.

⁶Atîrekaga barîa baaî batûûra mwoyo îndî barîa bainyîrîîtue nî atûmaga bathithîrua mantû ja îota.

⁷Gûtî rîo atigaga gûkaria barîa baagîru, nawe nî atûmaga bakaathanaga na kweejagwa gîtîîo o ta anene magiita jonthe.

⁸Nabo nî beethagîrwa batheeki baooganîtue nî mîkanda ya thîîna,

⁹Mûrungu athithagia ûu nîkenda aboonia meeyia na rwikumio.

¹⁰Nî atûmaga bakamûthikîîra rîrîa akûbakaania ûntû na agatûma bagatigana na ûthûûku.

¹¹Nabo bakëeja kûmwigua bakamûtumîkîra bagatûûra ûtûûro bwa kûthinyaara, batûûrage bagwîrîtue îgiita rîonthe.

¹²Îndî bakëeja kûrega kwigua Mûrungu bagaakua gîkuû gîkîthûûku bakue batîgîte ûûme.

¹³Barîa batiijî Mûrungu no gwîka beekaga mûthûûro, na kinya abakanûkia batîmûkaagîra abateethia.

¹⁴Nabo bakujaga o barî babeethî bagakinyia ûtûûro bwaao mûthia barî na nthao.

¹⁵Mûrungu aritanaga barîa baathangîka na mîthangîko yaao atumagîra mathîîna jarîa barî najo nîkenda bamwigua.

¹⁶Mûrungu akûritîte thîîneene agwikîîtie ûthinyaariine, na athûûmba meetha yaaku na biakûrîa bibiega.

¹⁷Îndî gwe ûkanûkîîtue ta ûrîa barîa baaî bakanûkagua gwe nî ûgiitîri îgamba ûrîa kwagîrîte.

¹⁸Imenyeere ûtîkaaîrue nî nkukumo kana ûteewa nî into biaingîa.

¹⁹Gûkaya gwaaku kwoomba kûrigîîria ûthangîka kana kûrigîîria ûtîkathîîne?

²⁰Ûkáirîrîria ûtukû bwîja rîrîa antû bakuujaangaga.

²¹Imenyeere ûtîkeeje gûtonya meeyiene ûmatûkîte mîthangîko.

²²Atîrî, Mûrungu arî inya înene, kûrî mûritani ûngî tawe?

²³Kûrî we wamwonia njîra ya kûthingata? Kana kûrî we ûûmba kûmwîra ‘Nî ûthithîtie bûbûûî?’

²⁴Ririkanaga gûkumagia ngûgî yaawe îrîa antû beekagîîra.

²⁵Antû bonthe nî boonaga ûrîa athithagia bakaraithîîria barî kûraaja.

²⁶Atîrî, Mûrungu nî ûmûnene îndî tûtîmwijî, na gûtî muntû wiijî ûkûrû bwaawe.

²⁷Nîkwîthîrwa nîwe ûkuucagia ntaanta cia rûûjî nacio ciagarûka ikaa ngai.

²⁸Nawe aurithagia ngai înyiingî ya kûng'ana nîûntû bwa antû.

²⁹Gûtî muntû ûmenyaga ûrîa Mûrungu atûmaga matu jeetaîta, kana ûrîa atûmaga ngorogoro îgamba.

³⁰Atîrî, nîwe ûtûmaga rweni rwenia kunthe, mwanka rukinya ituri bia îria.

³¹Gwakara ûu nîrîo antû banyiraga akaeejana biakûrîa na wingî.

³²Ajûkagia rweni akarûtûma rûtema o arîa akwenda.

³³Rwenagia kwonania atî ngai ya nchûgû nî îîtîte kuura.”