Read KIMERU BIBLE PROTESTANT EDITION Ayub 37 Bible Online

Ayub 37 - KIMERU BIBLE PROTESTANT EDITION bible

Ayub 37

¹“Ngai ya nchûgû îtûmaga nkoro yaakwa îkaigua ûguaa, nkoro îkaambîrîria kûringa na inya îkiumaga arîa îkaraga.

²Thikîîreeni bwigua kajû kaawe bûthikîîre bwigue ûrîa agandûkaga.

³Nî atûmaga rweni rûkeenia kuunthe kuuma mûthia jûmwe jwa nthîgûrû mwanka jûngî.

⁴Ngorogoro ciaawe igandûkaga ithingatîte ndweni kau nîko kajû kaawe ka ûnene.

⁵Mûrungu agandûkaga bwa kûrigaria akathithia mantû jamanene jarîa tûtîûmba kûmenya.

⁶Nîkwîthîrwa nî eeraga nkamia ‘Gwaa nthî,’ akeera ngai ‘ura na inya.’

⁷Nabu nî bûtûmaga antû batigatiga ngûgî ciaao nîkenda bathûgaania ûrîa inya yaawe îng'ana.

⁸Ningî bûgatûma nyamû cia kîthaka igacoka imamone biaacio, igakara biiciithoone biaacio.

⁹Kiurutani kiumaga bwa ûmotho nayo mpio îkauma bwa ûrîo.

¹⁰Mîrukî ya Mûrungu nî îreetaga nkamia na îgatûma ndûûjî inene ikaa nkamia.

¹¹Oojûragia matu rûûjî najo matu jakarita rweni.

¹²Atûmaga matu jakathiûrûka nthîgûrû yonthe jakathithia ûrîa akwenda.

¹³Aurithagia ngai akareeta îkanûkia kana itharimo.

¹⁴Thikîîra ûntû bûbû gwe Ayubu kira ki ûthûgaanie mantû jegiî irigaria bia Mûrungu.

¹⁵Nûû wiijî ûrîa Mûrungu aathaga irigaria biu kana amenya ûrîa atûmaga rweni rwenia matuune?

¹⁶Nî wiijî ûrîa matu jacuuracuraga, ûrîa ngûgî iu ciaawe cia kûrigaria ikari?

¹⁷Rîrîa ruuo rwa bwa ûmotho rûkuurutana ûkaigua kîrûûngûûjû kîa mwanki.

¹⁸Îgûrû rîrî rîkari ta kîoni rî, nîgwe ûgwatagia Mûrungu kûrîtambûrûkia?

¹⁹Tûritane ûrîa tûkwîra Mûrungu nîûntû tuî ga tûgwataata tûtîkwona bwa kûmwîra.

²⁰Ntîenda kwarîria Mûrungu ntîkeeje kûthirua.

²¹Antû batîûmagîria gûtega riûa rîrîa gûtî na matu.

²²Îndî mwago jwa Mûrungu jûrîa jwonagwa bwa ûrîo nîju jûthaaraga nkûrûki.

²³Mûrungu atîûmba kwonwa îndî arî inya înene na athithagia mantû na îota.

²⁴Tontû bûû, antû nî bamûkîrîte nawe atîtindanagîra na muntû wonthe wikumîtie na ûgûciona oomîi.”