Read KIMERU BIBLE PROTESTANT EDITION Ayub 38 Bible Online

Ayub 38 - KIMERU BIBLE PROTESTANT EDITION bible

Ayub 38

¹MWATHANI arî kîbubaniine nî aarîîrie Ayubu aramwîra atîrî,

²“Gwe nîka ûrî ûû ûkûthûûkia kîrîra na nteto cia waa

³Ikundîke kauna ta ntomûrûme nkûûrie biûria naagwe ûncokerie.

⁴Nîkû waarî rîrîa ndeekagîra mûsingi jwa nthîgûrû? Këethîra ûrî ûûmûûme ncokeria.

⁵Nûu waamenyere ithimi biaayo? Mbîîra nîûntû no mwanka wîthîrwe wiijî. Kana rî, nûû waakuucîrie mûrigi jwa kûmîthima?

⁶Itugî birîa bimîgwatagîîra rî, bikinyithîtue kû? Kana rî, nûû wambîre maiga jaayo ja koona,

⁷rûkîîrî kainda rîrîa njota ciaainaga, rîrîa biûmbe bia Mûrungu bionthe biainaga bigwîrîîtue?

⁸ Nûû woombîre kûrigagîîria îria rîtîkaunîkare rîrîa îria riimbaga?

⁹Nî ni ndaakuîkîîre îria na matu jaraa ta nguû ciaarîo, ndîrarîkunîka na muundu.

¹⁰Rîu ndîrarîonia mîanka yaarîo îrîa rîtîbuîri kwagaara.

¹¹Ndîreera îria atîrî, ‘wîje mwanka aja îndî ûgaakûrûka o. Au nîo mîgombe yaaku îgaacokagîra’

¹²Kuuma ûraciarwa rî, kûrî rîo wauga rûkîîrî atî nî gûkîe?

¹³Kûrî rîo wauga gûkîe kunthe nthîgûrûûne barîa baaî baumîre kûrîa barî?

¹⁴Weerû bwa riûa rîkiuma bûgarûraga nthîgûrû îgakara ta nondo kana ta nguû întuune îkuuma rangi.

¹⁵Îndî weerû bwaingîa mono barîa baaî nî bathiraga inya ya kûthithia ûthûûku.

¹⁶Kûrî rîo weetîîra îrieene ndeene ûkinya kûrîa rûûjî ruumagîîra?

¹⁷Ûroonua mpingîro cia gwa akuû kana woona mpingîro cia kûrîa kûrî muundu jûmûnene?

¹⁸Nî ûmenyete ûrîa nthî îng'ana? Mbîîra, këethîra nî ûkûmenya jau jonthe.

¹⁹Nîkû weerû buumaga? A muundu jûtûûraga kû?

²⁰Womba kûmenya kûrîa bitûûraga; woomba kûmenya njîra ya kwaabio?

²¹No mwanka wîthîrwe ûkîmenyaga nîûntû ûrî ûmûkûûrû mma na nî waaciari rîu.

²²Ûratonya nyomba îrîa mbîîkaga nkamia woona nyomba îrîa mbithaga ngai ya nchûgû?

²³Biu nîbio mbîîkaga nîûntû bwa gûtumîra îgiita rîa thîîna, nkabitumîra îgiita rîa ndwaa.

²⁴Nîkû rweni ruumaga kana ruuo rwa bwa gaiti?

²⁵Nûû woonagia ngai kûrîa îbuîri kuurîîra kana oonia ngorogoro kûrîa îbuîrîte gwîtîîra?

²⁶Nûû ûtûmaga kuura rwanda kûrîa gûtîtûragwa nî antû?

²⁷Nûû wîtîkagîria rwanda rûûjî nîkenda nyaki yuuma?

²⁸Mbura îrî îthe? Kana rî, nûû ûciere mataanta ja îme?

²⁹Nî kîu kîaaû nkamia yaaumîre, na nûû waaciarîre îme rîa nkamia kuuma îgûrû?

³⁰Îme rîu rîûmagaraga ta iiga rîkaa nkamia rîrî îgûrû rîa îria.

³¹ Woomba kwogania njota irîa ciîtagwa karîmîra amwe, kana kwogora mîkanda îrîa îtheekaga nkûûnkû?

³²Woomba ûtongeeria njota irîa ciîtagwa mazarothi îgiita rîaacio rîakinya kana ûtongeeria njota îrîa îtagwa ndûû na biaana biaayo?

³³Woomba kûmenya mawaatho jarîa jaathaga îgûrû? Woomba kûjatumîra kwatha nthîgûrû?

³⁴Woomba kwîra matu jaure nîkenda uurîrwa?

³⁵Woomba kwîra ndweni cienie nacio ikeenia?

³⁶Nûû weete matu kîrîra, kana rî, nûû wîkîrîte nduume ûûme?

³⁷Nûû ûûmbîkia kwona ûûme bwa gûtara matu? Kana rî, nûû ûûmba gwîtûûra rûûjî rwaajo,

³⁸nîkenda tîîri yaa ntaka, natu tûtheng'eeng'e tûkagwatana?

³⁹Woomba kûthoogera ngatûnyi nyamû ya kûrîa kana rî, woomba kûnyiria bianaana biaacio,

⁴⁰rîrîa ciikindîte ikurunguune biaacio kana imami imamoone biaacio?

⁴¹Nûû ûnenkagîra nkûngûrû gîa kûrîa rîrîa bianaana biaayo bikaagîra Mûrungu bigîcwaa biakûrîa?”