Read KIMERU BIBLE PROTESTANT EDITION Ayub 39 Bible Online

Ayub 39 - KIMERU BIBLE PROTESTANT EDITION bible

Ayub 39

¹“Ûûgwe nî wiijî rîrîa nthia iciaraga? Ûroona nkûrûngû igîciara?

²Ûratara mîeri îrîa ikamataga îîu, ûmenya rîrîa iciaraga,

³rîrîa ciînamagîîria nîkenda iciara bianaana?

⁴Bianaana biu bigîîjaga inya bigakûrîra bûûrîîne, na bieta bitîcokaga kîrîcio kaîrî.

⁵Nûû ûrekeeretie ntigiri cia kîthaka îciîtîra, na nûû ûcithaûraga?

⁶Nî ni ncieejaga rwanda rûkaa nja yaacio ngaciaa bûûrî ya chumbî îkaa gîtûûro gîaacio.

⁷Cio itûûraga kûraaja na kûrîa antû batûûraga nacio itîûmba kûbundithua.

⁸Îtarataraga irîmeene igîcwaa gîa kûrîa, ikarîa gîntû kîonthe kîrîa kîrî gîkîîthî.

⁹Nî ûkwona teka mbogo yeenda gûgûtumîkîra? Yeenda kûraara nkanateene yaaku?

¹⁰Woomba kûmîîkîra gîchooki nkingo îkûrîmîra? Kana rî, yoomba gûkûrîmîra na mûraû?

¹¹Woomba kûmîîrîgîîra nîûntû bwa inya yaayo înyiingî? Woomba kûmîtigîra ngûgî ciaaku îrita?

¹²Womba kwîrîgîîra îgukethera na îkûûrîra na îgwîkîra maketha nchukuune?

¹³Mathagu ja thirai nî jatabatabaga bwega îndî rî, yoomba kûng'uananua na mbûî cia namîtoori?

¹⁴Nîkwîthîwa thirai îtigaga nkara ciaayo nthîgûrû nîkenda iruutîrua nî mûthetu.

¹⁵Îkoorîrua ciomba gûkinywa nî muntû kana nyomoo ya kîthaka îkaithethera.

¹⁶Îthithagîria bianaana biaayo ûthûûku ta ka bitî biaayo îtînogagua nî ngûgî ya ûtheri gûciara na gûta.

¹⁷Nî ni ntûmîte yaga ûmenyo ndarega kûmîgaîra ûûme.

¹⁸Îndî îkauga nî gûûkîîra îmatûka îtîgwatagwatwa nî mbarathi na mwîtithia waayo.

¹⁹Nîgwe weete mbarathi inya yaayo? Nîgwe ûmîîkîrîte ruuri nkingo?

²⁰Nî ûûgwe ûtûmaga îthûngathûngûtha ta ngigî? Gûtiia kûrîa îtiiaga na nyiûrû nî gwa kûrigaria.

²¹Yuragia makaarî iguuruune îîtîte ndweene.

²²Îtîkîraga noo anini, îtîcokaga na nyuma rîrîa îrî ndweene.

²³Mathaga ja ndwaa jakîenagia jaringanagîra îgûrû rîaayo.

²⁴Îng'eentaga tarumbeta ya ndwaa yaringwa îkoombûra nthî îgeeta ndweene.

²⁵Tarumbeta ya ndwaa yaringwa, nayo îkaithuranîra gwîta ndweene iigagua mûrukî jwa ndwaa îrî kûraaja, îkaigua kajû ka mûtongeeria wa njûûrî.

²⁶Nîgwe ûritanaga rwîgî kûbuurûûka? Kana nîgwe ûrwîraga rûbuurûûke rwîtîte bwa ûmotho?

²⁷Nîgwe wîraga ndiiû iitie bwa îgûrû kana yake gîtara kîaayo irîmeene?

²⁸Îkaraga maigeene jakaa gîkaro kîaayo, îkaeethia ngejû cia maiga giiciitho kîaayo.

²⁹Kuuma au nî îraithagîria îgîcwaa gîa kûrîa meetho jaayo jagakîonera o kûraaja.

³⁰ Bianaana biaayo bikuundaga tharike na o arîa kiimba kîrî, nîo ciûthûranaga.”