Read KIMERU BIBLE PROTESTANT EDITION Ayub 40 Bible Online

Ayub 40 - KIMERU BIBLE PROTESTANT EDITION bible

Ayub 40

¹Ningî MWATHANI nî eetîre na mbere kwîra Ayubu atîrî,

²“Tontû nî wooneete ûûni Mweneinya ndî na maatia rî, nandî ncokeria biûria biu ndakûûria!”

³Ayubu nawe aracokeria MWATHANI atîrî,

⁴“Ûûni ntîgûcokeria nîûntû nî waa ndîraaragia.

⁵Nî nthirîtie kwaria mantû jamaingî na ntîîta na mbere kwaria kaîrî.”

⁶MWATHANI arî kîbubaniine nî aarîîrie Ayubu arauga atîrî,

⁷“Ikundîke kauna ta ntomûrûme, nkûûrie biûria naagwe ûncokerie.

⁸Nîka ûkwenda kwonania ntî ûûmeene? Ûrienda kwonania ûrîa nthûûki naagwe ûrîa waagîrîte?

⁹Ûrî inya ta ûûni Mûrungu? Ningî rî, woomba kûgondoka na kajû ta gaakwa?

¹⁰Igemie na ûnene na gîtîîo wîkîre ûkumio na mwago ta nguû.

¹¹Tûrîkîria aikumia mûthûûro jwaaku ûbagwîthie na mûthûûro jwaaku jûmûnene.

¹²Raithîîria aikumia bonthe ûbeekîrithie nthao na ûkinyangîre barîa baaî o arîa barî.

¹³Bathikîre bonthe mûthetuune ûbaingîre bonthe nthîgûrû gwa akuû.

¹⁴Wathithia ûu ngaagûkathîîria nîûntû inya yaaku wengwa îgûkûûmbanîra.

¹⁵Tega nyamû îrîa îtagwa nguû îrîa mîûmbîte ta ûrîa nkûûmbîte gwe îrîjaga nyaki o ta ndeegwa.

¹⁶Atîrî, inya yaayo îkaraga magûrû na îgakara mîkiiene.

¹⁷Yûûmagia mûnyiritha jûkooma ta mûtarakwa nayo mîkiia ya magûrû jaayo îrî inya mono.

¹⁸Marûitû jaayo nî ta mîberethi ya îturutia najo magûrû jaayo nî ta mîthîrî ya chuuma.

¹⁹Nayo nî ya kûrigaria kîrî biûmbe biaakwa bionthe Nî ûûni mûûmbi waayo akî mpûûmba kûmîûraga.

²⁰Nîkwîthîrwa irîma nî bimîonagîra biakûrîa gûntû kûrîa nyamû ingî cionthe ciîthagîrwa irî.

²¹Îmamaga rungu rwa mîtî ya miigua îgaiciitha îrimbeene rîa iteetema.

²²Yoonaga mûng'unye kuumania na kîthiîki kîa mîtî ya miigua, îcîgîîrîîtue nî mîtarakwa, îrîa yuumaga rûteere rwa tûmîuro.

²³Kinya mîuro îkaimba îkondoria rîtîmîmakia kinya mûuro jwa Jorodani jûkaunîkîîra kanyueene kaayo îtîmaka.

²⁴Nûû ûûmba kûmîrita meetho akamîgwata akamîgwatia nyiûrû na ndwano?”