Read KIMERU BIBLE PROTESTANT EDITION Ayub 41 Bible Online

Ayub 41 - KIMERU BIBLE PROTESTANT EDITION bible

Ayub 41

¹ “Woomba kûgwatia nyamû ya rûûjî îrîa îtagwa Leviathani na rwano rwa makûyû kana ûmîtheeka rûûme na mûrigi?

²Woomba gûtonyithîria mûrigi nyiûrû ciaayo? Kana ûmunta nkambatî ciaayo na rwano?

³Ûriuga yoomba gûgûkaîra? Ûriuga yoomba gûkwerenca?

⁴Yoomba gwîka kîrîkanîro naagwe nîkenda îgûtumîkagîra magiita jonthe?

⁵Woomba gûceetha nayo ta kanyoni ûgûceetha nako? Kana woomba kûmîtheeka nîkenda îgwîria nthûûmba ciaaku cia aarî?

⁶Aringi biashara boomba kûmîarîîria bakîmîgûra? Boomba kûmîgaania kîrî agûri?

⁷Womba gûtûranga gîkoonde kîaayo na nchibe? Kana ûmuntanga kîongo kîaayo na matumo?

⁸Û-mîtongithie na njara, woone ndwaa îrîa bûkarwaa naagwe ûtîgacoka kûthithia ûu kaîrî.

⁹Atîrî, muntû athiraga inya buru agatuîkangaga maru akagwa amîona akî.

¹⁰Nayo nî îng'eentu mono rîrîa îthangi gûtî we ûûmîria kûrûngama mbere yaayo.

¹¹Nûû nthîgûrûûne yonthe ûûmba kûmiithûkîra îkarega kûmûthiria?

¹²Ntîkira ntîarîîtie mantû jegiî magûrû ja nyamû ya rûûjî îrîa îtagwa Leviathani kana jegiî inya yaayo înene kana mûûmbîre jwaayo jwa kûrigaria.

¹³Nûû ûûmba kûmîûraga akamîrita mûgûûta? Nûû ûûmba gûtûûra gîkoonde kîaayo kîrîa kîûmo?

¹⁴Nûû ûûmba gûkandûra kanyua kaayo? Mpari cia maîgo jaayo nî cia kûmakania.

¹⁵Mûgongo jwaayo nî ta mpari cia rong'o igwatitheenue bwega ciarika.

¹⁶Ikirithene bwega ûrîa kinya ruuo rûtîkûrûkîîra gatîgatîîne gaacio.

¹⁷Igwatithanîtue bwega ciarûmatana buru ûrîa itîûmba kwathûranwa.

¹⁸Îtiiyaga na nyiûrû gûkeenia najo meetho jaayo nî ta weerû bwa riûa gûgîkîa.

¹⁹Kanyua kaayo kaumaga inyiinga bigwakana nthande cia mwanki ithandîkangaga ikiumaga ku.

²⁰Nyiûrû ciaayo ciumaga toogi ta îrîa yuumaga nyongûûne îkûtherûka.

²¹Mîrukî yaayo îgwatagia makara jagaakana na kanyueene kaayo gûkauma rûmûrî.

²²Nkiingo yaayo îrî inya îmbîî bonthe barîa batirimanaga nayo nîka bateetemaga nî ûguaa.

²³Mîkûnjo ya mwîrî jwaayo nîka îmamanîrîte îgwatanîte naayo ûrîa îtîûmba kwenyeenyua.

²⁴Nkoro yaayo nî înjûmo ta iiga îtî ûguaa.

²⁵Rîrîa Leviathani yookîîra barîa barî inya mono nîka bamakaga yaitambûrûkia bakathirîrwa nî ûûme.

²⁶Kinya îkamuntwa na rûchiû, kana îtumo, kana mûthîrî, gûtî u îkara.

²⁷Kîrî yo chuuma nî ta rûûa na îturutia nî ta mûtî jûmworu.

²⁸Mîgwî îtîtûma îmatûka kinya îkaringwa na maiga ja gîkûtha iigagua ja matî jamîringa.

²⁹Kîrî yo nchûgûma îkari ta mîbua yaigua matumo jeejîte îkatheka.

³⁰Mwîrî jwaayo bwa nthîgûrû jûkari ta ngîo cia nyongû, yaitambûrûkia îkagiita ntaka ta mûchumeno îgûtumîra.

³¹Îtûmaga kûrîa kworokeru kûtherûka ta nyongû, îgatûma îria rîtherûka ta nyongû ya maguta.

³²Îîtîte îtigaga mûkondo jûkwenia muntû no athûgaanie îria ka rîkuuma mûûjî.

³³Nthîgûrûûne gûtî nyamû îngî îkari ta Leviathani yo nî nyamû îtî ûgua.

³⁴Yoonaga nyamû irîa cionthe irî inya îgacimena. Nîyo yaathaga nyamû ingî cionthe.”