Read KIMERU BIBLE PROTESTANT EDITION Ayub 42 Bible Online

Ayub 42 - KIMERU BIBLE PROTESTANT EDITION bible

Ayub 42

¹Ayubu nî acokerie MWATHANI aramwîra atîrî,

²“Nî mbijî atî gwe woomba kûthithia mantû jonthe na mîbango yaaku îtîûmba kûrigîîrîka.

³ Gwe MWATHANI ûrîûria, ‘Nûû ûûjû ûgûkararia kîrîra gîaakwa, gûtî u akûmenya.’ Gûtî nkaanja ni Ayubu nî mbarîîtie mantû ntîûmba gûciûra, mantû jamanene ja kûrigaria ntîûmba kûjamenya.

⁴ Gwe MWATHANI ûmbîrîte ‘Thikîîra naani mbarie; nkûûrie biûria naagwe ûncokerie.’

⁵Ni Ayubu nî gûkwigua ndaakwigîîtue na matû akî îndî nandî kinya gûkwona nî nkwoneete na meetho.

⁶Tontû bûû, nî nkwimena nîûntû bwa mantû jau mbugîîte na nî nkwigerera tîîri na mûju kwonania kwirira gwaakwa.”

⁷Nyuma ya MWATHANI kwarîria Ayubu nteto iu, MWATHANI nî aacokere areeta Elifazi ûrîa wa kuuma Temani na aramwîra atîrî, “Ûûgwe na acoore baaku bobaîrî nî bûnthûûrîîtie mono. Nîkwîthîrwa buî gûtî mantû ja mma bwarîîtie jarîa jambegiî tiga jarîa jaarîîtue nî nthûûmba yaakwa Ayubu.

⁸Nandî îteeni kîrî nthûûmba yaakwa Ayubu abûrombere, naabuî bûrite kîgongwana gîa gwakîîria kîa ndeegwa mûgwanja na ntûrûme mûgwanja nîûntû bwa meeyia jeenu. Naani nkaigua îromba rîaawe ntîkeeje kûbûkanûkia kûringana na waa bweenu. Nîkwîthîrwa gûtî mantû ja mma bwarîîtie jarîa jambegiî tiga jarîa jaarîîtue nî nthûûmba yaakwa Ayubu.”

⁹Tontû bûû, Elifazi ûrîa wa kuuma Temani na Bilidadi wa kuuma Shua na Zofari wa kuuma Naama nî beetîre barathithia ûrîa MWATHANI aabeerîte. MWATHANI araigua maromba ja Ayubu.

¹⁰ Nyuma ya Ayubu kûrombera acoore baawe, MWATHANI nî amûcokerie ûtonga bwaawe. MWATHANI aranenkera Ayubu ûtonga mainda jaîrî ja into birîa aarî nabio mbereene.

¹¹Nabo ataana ba ng'ina bonthe, na aarî ba ng'ina bonthe na antû bonthe barîa baamwijî mbereene bareeta nyomba yaawe. Beetîre nîkenda bamûboreria nîûntû bwa mantû jamathûûku jonthe jarîa MWATHANI aamûretereete. Nabo bonthe; o muntû aramwaa fetha na kîmata kîa thaabu. Ayubu arabathithîria kîatho.

¹²MWATHANI nî aatharimîre ûtûûro bwa Ayubu nkûrûki ya ûrîa aamûtharimîte mbereene. Aramûtharima na ng'ondu ngiri îkûmi na inya (14,000), na nkamîîra ngiri ithanthatû (6,000), na ndeegwa cia mûraû ngiri ijîîrî (2,000), na ntigiri cia nka ngiri îmwe (1,000).

¹³Ningî Ayubu nî agîîre na ataana mûgwanja na aarî bathatû.

¹⁴Ayubu eetîre mwarî waawe wa mbere Jemima, wa baîrî aramwîta Kezia, na wa bathatû aramwîta Kerenihapuki.

¹⁵Nthîgûrûûne kunthe gûtaarî na aarî bangî babathongi ta aarî ba Ayubu. Îthe arabagaîra rûgai amwe na ataana ba ng'ina.

¹⁶Kuuma rîu Ayubu nî aatûûrîre mîaka îgana rîa mîrongo îna (140). Ningî nî oonere aana baawe, na aana ba aana baawe, mwanka nthukîîne ya inya.

¹⁷Ayubu nî aakuîre arî ntindiri îrî na ûkûrû bûbwega mma.