Read KIMERU BIBLE PROTESTANT EDITION Ayub 5 Bible Online

Ayub 5 - KIMERU BIBLE PROTESTANT EDITION bible

Ayub 5

¹“Îtana nandî woone këethîra kûrî we ûgagwîtîka. Nî ûrîku wa barîa atheru ûûmba gûgûteethia?

²Nî mma mûthûûro jûrîjaga kîaa rûritho rûragaga muntû ûmûrigicanu.

³Nî mboneete kîaa kîgîîte mîri ya kûthinyaara, îndî ntûti, ndaratûma gîkaro kîaawe kîragwatwa nî kîrumi.

⁴Aana baawe batîkoroaga ûgwati bakaathiragîrua kûrîa magamba jagitagîrwa bakaagaga wa kûbateethia.

⁵Maketha jaawe jarîjagwa nî barîa barî na mpara, bajaritaga kinya miigueene nabo barîa barî na nyoonta, banyoontagîra ûtonga bwaawe.

⁶Mîthangîko îtiumaga mûthetuune kana thîîna yuuma nthî.

⁷Îndî muntû oonaga thîîna kuuma gûciarwa, O ta ûrîa nthande cia mwanki ciitagia îgûrû.

⁸Këethîra nî ûûni nî Mûrungu ncwaa Mantû jaakwa jonthe nkajeeka kîrî Mûrungu.

⁹We ûthithagia mantû jamanene jatîthimîka na ja kûrigarania jatîtarîka.

¹⁰Nîwe urithagia ngai nthîgûrû agatûma ngai miuundeene.

¹¹Nîwe ûthûngûraga barîa bainyiîtie na barîa baithikîrîte akabaa kûgwîrua.

¹²Njîra cia ûûme cia barîa baaîranagia nî athiragia, batîkoombe kûûmbana kîrî yo.

¹³ Barîa boome abagwatagîra wayieene bwaao, akathiria ntûti mîbango ya barîa aaîrania.

¹⁴Bau batirimanaga na muundu mûthenya, bagaataata mûthenya ta ûtukû barî.

¹⁵Îndî Mûrungu oonokagia nkîa itîkaamerue nî bau, agatunyûkia barîa barî na ûbatu kuuma kîrî barîa barî inya.

¹⁶Tontû bûû, nkîa nî cigîjaga wîrîgîîro, na barîa baaî bûgakirua buru.

¹⁷ Atîrî, kûgwîrua nî kîrî muntû ûrîa Mûrungu akanûkagia, tontû bûû, ûkamena gûkanûkua nî Mweneinya yonthe.

¹⁸ Eekagîra muntû rûgûma na nîwe ûrwogaga. Aringaga muntû, na akamworia na njara ciaawe.

¹⁹Oonokagia muntû kuuma mathîîna mwanya mwanya.

²⁰Mpareene agagûkûûra kuuma gîkuûne, na ndweene agakûmenyeera ûtîkooragwe.

²¹Agagûtunyûkia kuuma kîrî aguutani naagwe ûtîkîra ûthûûku bwakwîjîîra.

²²Gwe ûkathekagîra ûthûûku na mpara na ûtîkîra nyamû cia kîthaka.

²³Maiga jatîkûthangîkia muundeene nacio nyamû cia kîthaka itîkûûria.

²⁴Ûkamenyaga ikaro biaaku kûrî na thîîrî, na watara ng'ondu ciaaku ûkoona gûtî yûûrîte.

²⁵Ningî ûkaamenya nchiarwa ciaaku ikeethîrwa irî inyiingî, rûchiara rwaaku rwîthîrwe rwingîi ta nyaki ya kîthaka.

²⁶Naagwe ûgaakua watindira buru o ta ûrîa nkano ciûûragwa ciûma îgiita rîaacio.

²⁷Atîrî, tûmenyete ûntû bûu nîûntû bwa gûtegeera mantû kagiita. Jaigue na ûjamenye nîûntû jagakûguna.”