Read KIMERU BIBLE PROTESTANT EDITION Ayub 6 Bible Online

Ayub 6 - KIMERU BIBLE PROTESTANT EDITION bible

Ayub 6

¹Ayubu aracokia arauga atîrî:

²Wûi këethîra mathîîna jaakwa jaathimwa, na mîthangîko yaakwa yonthe îgeekîrwa kîthimine!

³Îrîngîkwîthîrwa îritûi nkûrûki ya mûthanga jwa îria, nîkîo gîtûmi nkwaria nteto thûrûthûrû.

⁴Nayo mîgwî ya Mweneinya yonthe nî îmuntîte mwîrî jwaakwa naju jwanyua ûbai bwaayo. Nabio imakania bia Mûrungu nî bimbithûkîrîte.

⁵Ntigiri yoomba kûgamba yeene nyaki? A ng'ombe rî, yoomba kwania îkîrîîjaga?

⁶Kûrî we ûûmba kûrîa irio bitî mûchemo atîîkîrîte chumbî? A-rî, mûruru jûrîa mwerû jwa nkara jûrî mûchemo?

⁷Ntiigagua nkîenda kûrîa into ta biu îndî nîbio nandî irio biaakwa.

⁸Wûi këethîra jarîa nkwenda joombîka, këethîra Mûrungu anthithîria jarîa nkwîrîrîîria.

⁹Wûi këethîra Mûrungu anthetheranga buru, Wûi këethîra atambûrûkia njara akambûraga kubu!

¹⁰Bûu bwangwîria mono, nkathûngûtha nkeneete kinya ndëethîrwa ndî ûrûrûûne bûbûnene. Tontû ntaakararia rûteto rwa Ûrîa Mûtheru mono.

¹¹Ndî na inya ya kûûmîîria? Wîrîgîîro bwaakwa bûrî kû kenda mpûûmba kûûmîîria?

¹²Ka ndî inya ta iiga? Ka mwîrî jwaakwa jûrî jwa îturutia?

¹³Ningwa ntîûmba gwiteethia. Gûtî inya îtigeere ndeene yaakwa ya gûciûmbanîîra.

¹⁴Ûrîa ûtigaga kwigîîrua mûcoore waawe kîaao eethagîrwa atigîte gûkîra Mûrungu.

¹⁵Ataana ba baaba bampaîrîîtie ta rûûjî rûrîa rûgûjaga thaano.

¹⁶O ta nkamia îrîa yûûjûraga rûûjîîne îndî îgakerûka îkaûrîra ku.

¹⁷Îgiita rîa mûû îkarima buru na kwara mono îgakerûka îkauma o.

¹⁸Ageendi beetaga na njîra bagîcwaa rûûjî nabo bakaûrîra rwanda bakathira buru.

¹⁹Ageendi ba kuuma Tema nî barûcwaga nabo ageendi ba kuuma Sheba barûcwaga na wîrîgîîro.

²⁰Baakinya mîuroone baraigua nthoni nîûntû nî baraarî na wîrîgîîro baracokerwa nî nthao nîûntû nî yoomi.

²¹Kîrî ni bûkari o tabo bûmakîîte bwona mîthangîko yaakwa

²²Bûraigua mbugîîte, “Mpeeni kîewa? Kana mbwîra bûnkukumanîre na into bieenu?

²³Kana mbwîra bûntunyûkie njareene cia mûnthû? Kana bûnkûûre njareene cia mûnthîînia?”

²⁴Nditaneeni naani nkathikîîra, mbonieni maangaratania jaakwa naani nkamenya.

²⁵Nîatîa nteto cia mma irî inya! Îndî rwaria rwaaku nî atîa rûgûnteethia?

²⁶Bûriuga nîka nkwaria nteto cia ûtherî rûoone? Nîmbi îndî bûkûngambithîria cio?

²⁷Buî bwaringaga kinya kuura nîkenda bûgûra aana barîa batî na aciari bûbaethia nkombo, na bûkaarîria ûrîa bûûmba kwendia mûcoore weenu.

²⁸Îndî nandî ntegeeni tontû ntîûmba kwaria ûrongo tûtegeene.

²⁹Garûkeni bûtige kûngitîra ûthûûku garûkeni bwoone ndî ûûmeene.

³⁰Nîka bûkûthûgaania nîka nkwaria ûrongo? Kana bûriuga ntîûmba kûmenya ûntû bûbûthûûku?