Read KIMERU BIBLE PROTESTANT EDITION Ayub 8 Bible Online

Ayub 8 - KIMERU BIBLE PROTESTANT EDITION bible

Ayub 8

¹Bilidadi wa kuuma Shua nî aarîrie arauga atîrî:

²Nî mwanka rî ûgeeta na mbere kwaria mantû jau, na ûkîonaga mantû jarîa ûkuuga jakari ta kîbubani?

³Mûrungu ka agarûraga matuîro ja îgamba? Kana Mweneinya agarûra ûûma?

⁴Aana baaku nîka beeîrie mbere yaawe, nawe aabakanûkîîrie meeyia jaao.

⁵Îndî gwe wacwaa Mûrungu, na wereenca Mweneinya,

⁶wëethîrwa ûrî ûmûtheru na mîîtîre yaaku îrî îmîega, nî mma agookîîra nîûntû bwaaku na agûcokerie ûtûûro bûrîa bûkwagîrîte bwa ûthinyaari.

⁷Birîa waarî nabio mwambîrîrioone bikoonekana birî binini nkûrûki ya birîa ûkoona nyumeene bibingî.

⁸Ndakwerenca, ûrithîrie mantû ja nthukî iria ikûrûkîte, ûmenya ûrîa biûjûjû bieenu biaijî.

⁹Tuî tûciarî rua na gûtî u tûîjî, nîûntû matukû jeetû nthîgûrûûne jakûrûkaga ta kîrundu.

¹⁰Antû bau ba karaaja anga batîûmba gûkûritana na bakwatha? Mantû jarîa baaragia kuuma nkoroone ciaao nî ja ûmenyo.

¹¹Îriimba nî rîkûraga kûrîa gûtî rûûjî? A nthanje nî ciumaga gûntû gûkûûmo?

¹²Cio inyaaraga irî na maûa mbere ya itemwa, ikaga rûujî, inyaaraga na mpwîî nkûrûki ya matî jangî jonthe.

¹³Îîu nîyo njîra îrîa antû barîa batîkîraga Mûrungu beetaga nayo, muntû ûtîgûkîra Mûrungu atî wîrîgîîro.

¹⁴Ûchamba bwaawe gûtîo bûrî wîrîgîîro bwaawe nî ta mîrigi ya nyomba ya mbûbûî.

¹⁵Aciigîkanagia na nyomba yaawe îndî îtîriki bwega. Aigwatagîîra nayo amîrûmatîte îndî îtîûmba kûrûngama.

¹⁶Aakari ja mûtî jûrîa jûriibaga riûene, mpang'i ciaaju igataamba muundeene jwaawe.

¹⁷Mîri yaawe îabacanîrîte kîthûmbeene kîa maiga atûûraga gatîgatîîne ka maiga.

¹⁸Akëeja gûkûûrwa kuuma antû au arî, kinya o no amûkaane auge, “Ntamwona ni!”

¹⁹Atîrî, kûgwîrua kwaawe nî njîra îîu kwonoraga o kûu nthîgûrûûne nîku bangî bakauma.

²⁰Atîrî, Mûrungu gûtî rîo agaatiganîîria muntû ûmwagîru; na gûtî rîo agateethia barîa baaî.

²¹Agaatûma ûûmbe kûtheka kaîrî atûme ûgwîrue mwanka ûtûmîîrie na kajû.

²²Barîa bakûthwîre bageekîrithua nthao Nakîo gîkaro kîa barîa baaî kîûre buru.