Read KIMERU BIBLE PROTESTANT EDITION Ayub 9 Bible Online

Ayub 9 - KIMERU BIBLE PROTESTANT EDITION bible

Ayub 9

¹Ayubu nî aacokerie atîrî,

² Nî nkûmenya na mma ûu nîu gûkari. Îndî rî, nîatîa muntû oombîkia kwîthîrwa aagîrîte meethoone ja Mûrungu?

³Kinya muntû akeenda gûkararania na Mûrungu, muntû atîûmba kûmûcokeria kîûria kinya kîmwe kîrî biûria ngiri îmwe.

⁴Mûrungu arî ûûme na inya înyiingî. Nûû ûûmba gûcindana nawe oombana?

⁵Nîwe ûritaga irîma o na bitîmenye akabikuîkania nîûntû bwa mûthûûro jwaawe.

⁶Nîwe winainagia nthî na agatûma itugî biaayo biinaina.

⁷Nîwe waathaga riûa rîgatiga kwaara, agakunîkîra njota igatiga kûthaara.

⁸Nîwe wenka waambîre îgûrû arakinyanga mîgombe ya îrîa aramîatha.

⁹ Aroomba njota irîa nene ciîtagwa nkûnkû, na karîmîra, na mûkomweri na njota irîa ikaraga tûkundi tûkundi bwa ûmotho.

¹⁰We athithagia mantû jamanene jatîûmba kûmenyeka, na jamaingî ja kûrigaria jatîûmba gûtarîka.

¹¹Atîrî, eejagîîra akuî naani na ntîmwoone, agakûrûka na ntîmenye.

¹²Ningî akajûkia rî, nûû ûmûgiria? Nûû ûûmba kûmûûria, “Nîatîa ûkûthithia?”

¹³Mûthûûro jwa Mûrungu jûtîthiraga ûtheri. Nî aakinyangîre ateethia ba Rahabu mwanka baramwathîkîra.

¹⁴Nîatîa ni îndî mpûûmbîkia gwiteteera kîrî we? Nîatîa mpûûmbîkia kwona mantû ja kûmwîra?

¹⁵Kinya ndëethîrwa ntî na meeyia ntîona bwa kûmwîra, no kûmûrîrîra mpûûmbîkia kûmûrîrîra kenda ambigîîrua kîaao.

¹⁶Kinya nkamwîta na akaambîtîka rî, ntîûmba gwîtîkia nî anthikîîrîte ûrîa nkuuga.

¹⁷Nî antûmîrîte îkoondoria akaambunanga narîo ningî akarîte agîmpongagîîra ngûma ûtheri

¹⁸Atîndekagîîria mbikia mîrukî îndî no ûrûrû ambûjûrîîtie.

¹⁹Tûkauga nî bwa inya, we nîwe ûrî na inya înyiingî. Twauga nî mantû ja kûgamba tûcwaa ûûma, nûû ûûmba kûmûthitanga?

²⁰Kinya nkëethîrwa ntî na meeyia; nteto cia kanyua gaakwa ikangambithia. Kinya ndëethîrwa gûtî ûthûûku nthithîtie, We angambithia, akoona ûthûûku bwaakwa.

²¹Ni gûtî ûthûûku nthithîtie îndî bûu bûtîkûnogia, ûtûûro bwaakwa nî bûnogeetie.

²²Mantû jonthe no ûmwe nîkîo tontû nkûûga, We athiragia barîa baagîru na barîa baaî o ûmwe.

²³Rîrîa ûntû bûbûthûûku bûûragaga antû ntûti We athekagîra barîa baagîru.

²⁴Anenkanîrîte nthîgûrû kîrî barîa baaî na aathika meetho ja agambi, këethîra tî we ûthithîtie ûu rî, nûû?

²⁵Matukû ja ûtûûro bwaakwa joogîîte nkûrûki ya mûtangurutani jamatûkîte jathirîkîria na jatîreetaga wega.

²⁶Jarîkûrûka na mpwîî ja gatarû ka nthanje kana ja ndiiû îkîgwata kanyomoo ga kûrîa.

²⁷Kinya nkauga “Nî mbûrîrue nî mathîîna jaakwa nthirie kwithikîîra ngwîrue,”

²⁸nkagwatwa nî ûguaa ndaririkana mîthangîko yaakwa yonthe, tontû nî nkûmenya gûtî rîo ûkauga ndî ûmwagîru.

²⁹Nî ka nkagiitîrwa îgamba bûbûûî nîmbi îndî nkwinogeria ûtheri?

³⁰Kinya nkathaamba na sabuni, na nkathaamba njara ciaakwa na rûûjî rwa mwonyo,

³¹Mûrungu noka ûkaangera îrinyeene rîa rûko naani ndegwe kinya nî nguû ciaakwa ciongwa.

³²Tontû we tî muntû ta ûûni, ûrîa mpûûmba kûmûcokeria ûntû, na ntîûmba kûgambana nawe îgambeene.

³³Gûtî mûgambi ûûmba kwîja gatîgatî geetû atûgitira îgamba atwathûrana.

³⁴Mûrungu, tiga gûmpûûra! Ebaeberia rûturo rwaaku, ntige gûkara ngîtemûragwa nî kûmakania gwaaku.

³⁵Nîrîo nkoomba kwaria ntîgûkîra, nîûntû ntîkari ûu nkûthûgaanîrua.